Read bura-pabir Ayuba 16 Bible Online

Ayuba 16 - bura-pabir bible

Ayuba 16

¹Antə Ayuba pəla,

²“I ku nggatə shanga jili mnya tə giri akwa harari ni, shanga giri an mji hilhila atar shiktə mda!

³Mnyar shambarkur tə giri kəgari ana kurəng? Man akwa mba ɗəffa gə ri Elifaz, tə ga amzhi hartə mnya gə wa ni?

⁴Ma abbər giri an akwa vəi ndzəndziyirna sakani I ata gari tsu apa giri. I ata mzhi kənggələmta kəri, kəi mzhi giri ka mnya ɗimi ni.

⁵Amma ata vəyari, arna I akwa dunautə giri, kəi shiktə giri ka mtathli ala giri ɗəffa giri.”

⁶“Amma ngəni shanga su tə I akwa pəlari ni aɗi ata kəmta ali bwani ni wa, tsuwa wala I an dləɓ səri hərkari aɗi wa.

⁷Ai Hyel ga ku ghərantə ra, gə zhar tə mdə kurəmta mjir kutakəyirna.

⁸Gə hara tə I thlarəmtadzi ka ndzi ɗethlu shini, tə su ngəni ku ndzi seɗa ata kəri, tsuwa thlarəmtadzi ni ku hara ɗimi kamta, har mji akwa wulari ata kəmi abbər bikərna an sənta.

⁹Kamnyar ɗəffə bwarbwarkur arni tsa ku nggəlar nci, tsa ku ɓɗə thlirari apa ka tsa kukwahuwa ra.

¹⁰Mji ku kəlar mnya ɗa akwa wul ra, da ku tsaɓəngkərdzi ali ka tsa ra akwa pukəmi ka kəli səliyirna.

¹¹Hyel ku hamta ra aka mji na ɗimi, ka psu ra akwa tsiya kəmanggarayeri.

¹²Hwatu I akwa ndzəndzi akwa msərakur, antə Hyel mbwatə ra ata wulyi ka pupukthləhə ra ka ɓəɓəgəlwa ra. Tsa akwa həla ra ka tsa wutə ra.

¹³Tsa vu tə mjir sha arni kalaktə ra, ka ntsəntsəvtə ra ba akwa kulshi kula kətadza, har tə hyali puɓəladzi ata di.

¹⁴Tsa fələngkər ali ata kər ata kər ka dəkəi ra, ka dlidlirəmta ra apa soja na katsala.

¹⁵Kəsəmər dzi ku ndzi ləptər jikatuwa arna, I ku pumta darajarna akwa bərbər.

¹⁶Nci ku ta pitu kamnyar tuwa, nci ku kəthla ka mbwi kuthlu,

¹⁷wala tə su aɗi tə I ɓzamtə wa, tsuwa adduwarna ma kəcəkəcari.”

¹⁸“Aiyi həi, ga aɗiya hartə kəra mamshirna wa, zhar ni ka tsa tuwa ata vəya iya bu.

¹⁹Wala kulini ma seɗarna ni amtazi, mdə na ata mbuli ra ni ma tsa amtazi.

²⁰Pazhayeri arna an akwa mnya ɗimi ata kəri, amma I akwa tuwa aka Hyel ka tsa dlar ra.

²¹I akwa bara mdə na ata ndzi akwa daɓwa I ka Hyel, apatə mda ana vu mnyari akwa daɓwa mdə ka ntəwulərni.

²²Kamnyar azi ka məva yiɗauwa I ata mwari akwa vəi tə mda ana ngka kəra wa ni.”