Read bura-pabir Ayuba 17 Bible Online

Ayuba 17 - bura-pabir bible

Ayuba 17

¹“I aɗi akwa mzhi mpikə kəra wa, virayeri arna abaka kura, kulini kula an akwa səkə ra.

²Jiri, mjir hara kyartəkur an kalaktə ra, halər ɗa na fa hangkala mdə antə I akwa wulari.

³Ka gə thləthlata ata vəyi bu, kamnyar wa damwa an ata hir mbuli ra ri?

⁴Ga ku hartə kəra ɗa antə da amzhi nggaɓəla su kəra wa, apani ga aɗiya hir ka da mula ali wa.

⁵Apatə mnya dəɓa aɗi laga pəla, ‘Mdə na ku səm mdəkur pazhayeri arni kamnyar bara sur duniya, maɗa'ni ata sə pi ka mi.’

⁶“Ga ku namtə ra tə I ndzi sur kumshi aka mji, tə I ndzi mdə tə mji akwa tifəngkər alari mtili.

⁷Nci aɗi akwa wulɓəla su kəra wa kamnyar tuwa, tsi kəga səli ku shushurəmnyadzi ka ndzi apa shimtu.

⁸Mjir jirkur ku ndatədzi sakatə da wutə ra, mji na kula biku ku damitədzi ka duna ata kəra mji na kula thlivər Hyel.

⁹Wala apani mdər jirkur ata ləkəma ka kəla, tsuwa mdə na ka tsiyari kəcəkəcari ata ləkəma ka wutə duna.

¹⁰“Amma ar giri, wala shanga giri an jaktə ngka, ka kəɗari ka damwa, shanga I aɗi ata wutə mda wala duku na ɗəɗu akwa nca giri wa.

¹¹I aɗi ka saka kəra wa, shanga su tə I akwa bara harari ku hili, məyir su aɗi akwa kuti kəra wa.

¹²Pazhayeri arna amzhi ndəkɓəla kuthlu ka parakə wa, ma aviri da ana pəla təpci, ma viri abaka hara, da ana pəla viri abaka kura.

¹³Kulini I aɗi ka su tə I akwa səkari wa, tar kula, kəi pshari sərpiyirna akwa kuthlu.

¹⁴I ata pəla aka kula, ‘Ga an baba'na,’ ka aka kulamnya, ‘Ga an mama'na wala ngkwarma' na.’

¹⁵Man su tə I ata jaktə səkari akəmazi ri? Mda aɗi na ata wutə vəi vəkər ali ya?

¹⁶Nənga su tə I vəkər kari ni ata ləkwa kula, ka ləghəi ata kəma duku ka iya akwa bərbər nə ri?”