Read bura-pabir Ayuba 18 Bible Online

Ayuba 18 - bura-pabir bible

Ayuba 18

¹Antə Bildad na mdər Shuwa shinau abbər,

²“Haba Ayuba, nawa antə ga ata sə zhar jikamnya ngəni ri? Pəla su na jirari, ma ga ata bara ka yeru shinau ala ga.

³Kamnyar mə tə gə namtə yeru apa mwaɓi nə ri? Ga ana wula apa shanga yeru kula kər ya?

⁴Ga akwa dəkəi kər ngə diya ka jili ɗəffə ɓzəɓzə ngəni ni. Ga ana wuta apa mda ata zhar duniya ni kamnyar ngə ya, nənga mda ata ntsumta gar kamnyar namtə ɗəffa gə ri?

⁵“Jiri, dwali ka mdə tsi parakər u'ur kəmanggar, tə kyanggyara u'ur kəmanggar aɗi ata hamta parakə wa.

⁶Parakə na akwa mbwarni ata ndzi kuthlu, tsuwa pitəlarni na abwa kərari ata mta.

⁷Mda ata kəmta dunar mwar kəmanggar, sauriyirni na ɗimi an ata psu ni akwa sha.

⁸Kəmanggar ana mwari akwa dərku ka səlari surni, ma tsa ku ntsari kəra ku ni tsa ata ndla akwa.

⁹Kantara ni ata fatə səlari, antə ndələr wulya cim ni ata mbwahə ni.

¹⁰Mda ata nggəi kantara ni akwa mnya lakurni, ka ɗuwar səwu ni akwa bərbər.

¹¹“Sur thlivər ana kalaktə kəmanggar akwa kəlara bwa, ka kədlə ghəlari akwa shanga bwa tə tsa nuwa.

¹²Sakanda da ka su, amma kulini məi akwa tsi ɗa, antə asar akwa səksəkə ɗa akwa kəlara bwa.

¹³Shilkər na ɗimi an ata kwasəmnya kəsəmər dzari, ka tsa hiɗamta shahari kəga kiɗari shang.

¹⁴Mta ku ndəkəmta ni ka kəyirni tə tsa ana ndzəndzi akwa kula thlivər ni, ka mwantə ni akəma kuthlir mta na ana hara thlivər aka mdə ni.

¹⁵Mda aɗi na ata ndzi akwa kəyirni ni wa, kamnyar u'ur an ata hartə kəyirni ni.

¹⁶Shanga nggilangayerari na akwa di ata ula, antə tsiyayerari na amta ata tətəɓumtadzi.

¹⁷Mda ata fwari su ata kərari pətəku akwa duniya, mda aɗi na ata jaktə ɗangtə ni kəra wa.

¹⁸Mda ata kədləɓəla ni kazhar dunya ni, ka kədləɓəla ni kazhar parakəu, ka mwantə ni akwa kuthlu.

¹⁹Tsa aɗi ata ndzi ka maɗar wala kəkayeri wa, mda aɗi na ata mbila aghəlari ka mpikə wa.

²⁰Kamnyar laku tə tsa sə kuri ndzəndziyirni akwa, mji na bwar raghəi ata sə ndatədzi ata kərari, mji na abwar ramta ata sə yakata ka duna.

²¹Ngəni an su na ata wutə shanga mji na ɗimi, mji natə da aɗi ana thlivər Hyel wa.”