Read bura-pabir Ayuba 19 Bible Online

Ayuba 19 - bura-pabir bible

Ayuba 19

¹Antə Ayuba pəla,

²“Nawa antə giri ata sə zhar ɗar bwani ali nə ri, kazhar dəkəi ɗəffi ka jili ndərayeri ngəni?

³Giri akwa nggənggəl ra ka kum ka kuma. Aɗi akwa hara səli ala giri wa ya tə giri akwa taratə ra apani ni?

⁴Ai wala ma I an ɓzamtə su, I shira an ɓzamtə su ni, aɗi giri wa.

⁵Giri ana wuta apa giri təramta ra ya, tə giri akwa pəla I akwa ɗar bwani kamnyar bikərna ni?

⁶Giri amzhi nggaɓəlari wa ya, abbər Hyel an vu ra akwa bwani ngəni ni? Tsa an ngkau ra akwa dərkurni.

⁷“Wala ma I hara kuraku abbər ka mdə dlar ra, mda aɗi na ahir ndər wa. I ku kəga ka kuraku, amma mdər hir hara ali su na kalkal aɗi wa.

⁸Tsa ku dzəɓtə lakurna, antə I aɗi ka vəi təramta wa, tsa ku hartə lakurna akwa kuthlu.

⁹Tsa ku ndəkəmta ra ka darajarna, ka kəli dzakwar olkur ata kəri.

¹⁰Tsa ku hilantə ra akwa kəlara bwa, ka kuri ka iya, laku tə mda ana ntsumta nfwa akwa, antə tsa hilantə mwaɓərna.

¹¹Ɗəffa Hyel akwa mbwa ata kəri, ka namtə ra apa I dawarni.

¹²Tsa akwa thlentə sojayeri arni ata kəri, antə da ku kalaktə ra ka kur mpa ar sojayeri, ka ncigəmta tentər ɗa ka kalaktə ra.

¹³“Tsa ku ndəkəmta daɓwa yeru ka maɗama'na, ka ndəkəmta daɓwa yeru kəga pazhayeri arna.

¹⁴Yangkuri ku təra kazhar ra, tsuwa hermayeri arna ku fwari ata kəri.

¹⁵Mətəpiyayeri na aharngkəya ku fwari ata kəri, buɗayeri na mwanki ku namtə ra apa mətəpi, I ku ndzi ala ɗa apa I mdə gapani.

¹⁶Ma I kəga buɗarna, tsa aɗi ata si wa, wala I an kiɗə kərari apa mə ri.

¹⁷I ku ndzi sur shiwur na ɗimi aka mwalangkəya, ka ndzi sur cika aka maɗama'na.

¹⁸Wala maɗangkyar na raka raka akwa rutə ra, ma I pəla I ata thlatə kəi gari, da ata kumshi ra.

¹⁹Shanga hermayeri arna akwa cikə ra, mji natə I hir nggwa an akwa shinadzə bwahila ɗa ali.

²⁰I ku thlarəmtadzi ka ndzi ncir ɗethlu, har mda ata mzhi jikatə ɗa akwa kəsəm dzi, mbil raka I ata mta.

²¹Pazhayeri arna, kətadzə ra bu, kətadzə ra! kamnyar Hyel ku tsa ra ka tsiyari ka dəkəi ra.

²²Kamnyar mə tə giri akwa ɗar bwani ali apatə Hyel akwa harari nə ri? Bwani tə giri akwa hara ali ni aɗi mzhi giri apani wa ya?

²³“Apa ka rəbuta ali ndərayeri arna ni! Apa ka ɗahəi ɗa ali akwa kakaɗu!

²⁴Ka mdə rəbutə ɗa ali ka mnya liya mənggəl ka dalma ri, ka thlaɓəla ndərayeri ni ata pela kamnyar ka mdə sə ɗangtə ɗa ba saka madi.

²⁵Kamnyar I asənda abbər mdər mbuli ra aɗi amtazi, na ata sə si vir laga akwa duniya ni.

²⁶Wala aghəla tə shilku ku kwasəmnya dzi ni, tsu ka dzi ngəni antə I ata sə wutə Hyel.

²⁷I ata sə wutə ni ka nci surna, aɗi mdə damwa an ata pəlari ali wa, tsuwa I ka kucali kamnyar bara kəi wutə ni.”

²⁸“Ma giri pəla, ‘Laku madi tə mburu ata nar ala bwani akwa ri?’ Wala ma giri pəla, ‘Tsan bara bwani aka kərari,’

²⁹to, kuji ka giri thlivər asar na ata si ata kəra giri. Kamnyar kalkal ka mdə ɗi giri ata kəra hala giri ni, antə giri ata sənda abbər azha shariya aɗi.”