Read bura-pabir Ayuba 2 Bible Online

Ayuba 2 - bura-pabir bible

Ayuba 2

¹Vir laga, sakatə mjirthlentərhyel akwa jaktə tsaptədzi akəma MTHLAKU, antə Shatan si akwa nca ɗa.

²Antə MTHLAKU yu Shatan ni abbər, “Ar ngə gə thlata ama tsu ri?” Antə Shatan ni shinau alari abbər, “I akwa ləghəi ka ləmta, I akwa kadla akwa dlarhə shanga duniya.”

³Antə MTHLAKU pəla aka Shatan, “Ga ku wutə Ayuba na buɗarna ya? Ai mda aɗi na ana hara su kalkal ka jirkur apa tsa akwa duniya ni wa. Tsa ana thlivər ɗəffa Hyel, antə tsa aɗi ana hara su na ɗimi wa. Ga ku kiɗə ra kəi zhar nga kamnyar ka gə nar bwani aka Ayuba gapani, amma wala apani su aɗi na kənggərantə hamta jirərni wa.”

⁴Antə Shatan ni shinau abbər, “Ai mda ata hir ka tsa shamta gənarni shang kamnyar ka tsa ndzi ka mpika.

⁵Amma ar nga ngkərtə ja apa ga ata tsəkwar dzari ka shilku, ma ga aɗi wuta abbər tsa ata nggəl ngə wa!”

⁶Antə MTHLAKU pəla aka Shatan, “To kalkal, hara su tə gə hira ka tsa, amma ga aɗiya tsəkwar mpikari wa.”

⁷Antə Shatan ni psi laku ka təra ka hara bwani na mwavər aka Ayuba. Shatan ni vu tə mbəlkəu ku səɓəla hang ata shanga dza Ayuba, baɗita ata səlari har kərari.

⁸Antə Ayuba təra ka ra ndzəndzi ata mnya kumba, akwa ɓəɓa mbəlkayeri ni ka hangdlya.

⁹Antə mwalankiɗa pəla alari, “Ba kulini gə tsu akwa ndzi ka hamta jiri apa na waci ni ya? Kamnyar mə tə ga anggəl Hyel ka gə mtə wa ri?”

¹⁰Amma Ayuba shinau alari abbər, “Kamnyar mə tə ga ata gari apa mwala tə kərari ku tsa nə ri? Sakatə Hyel na ala mwa msərakur, mwa ku dlu ka kucali. Kamnyar mə tə ma tsa na ala mwa bwani mwa aɗi ata dluwari wa ri?” Akwa shanga bwani tə Ayuba ɗar ni, tsa aɗi pəla su laga ɗimi ata kəra Hyel wa.

¹¹Elifaz na mdər Teman, ka Bildad na mdər Shuwa, ka Zofar na mdər Naama an pazhayeri na makər ar Ayuba. Sakatə da nggatə jili bwani na wutə Ayuba antə da ɗəmhə ka thlamta viri tə da ata sə ra thlawar ni ka səzəmta ni.

¹²Sakatə da wutə Ayuba təng tə da tsu ciju, da aɗi nggaɓəla abbər tsa wa. Sakatə da hara kudzəhə ka nggaɓəla abbər ngəni an Ayuba, təng da put tuwa ka kuraku, ka kukwahəmta ləptər ɗa, ka takəla ata di har ka thlentə bərbər ahar hyel.

¹³Antə da thlatə ka ndzəndzi adzə ni mnyar vir murfa ka pci murfa, mda aɗi na mzhi ndər wa, kamnyar laku tə da wutə bwani tə tsa akwa ni.