Read bura-pabir Ayuba 20 Bible Online

Ayuba 20 - bura-pabir bible

Ayuba 20

¹Antə Zofar na mdər Naama shinau aka Ayuba abbər,

²“Gariyir ngə ni akwa thlentə hangkali, antə dwali kəi shinau ala ga.

³I ku nggatə gariyir rutə tə ga akwa hara ali ni, tsuwa atar su tə I asənda antə I ata hamta ala gə amsa ni.

⁴“Ai ga səndə su nayeri ni təng waci, sakatə Hyel baɗitə vəi mda akwa duniya,

⁵abbər kəmanggar ana fəi akwa msərakur wa, abbər sakar kucalər mji na kula thlivər Hyel an kwadang.

⁶Wala ma tsa an kəl saɓəl apa nfur məna ka mzhitə dlambayeri, tə jikwarari akwa tsəkwar dlamba,

⁷tsa ata sha apatə kinərni ana sha ata di ba saka madi. Mji na asəndə ni waci ata sə yuwa abbər, ‘Kulini wani ama kwang kadzang?’

⁸Tsa ata təra ka sha apatə suni ana sha aka mda aviri, mda aɗi ata jaktə wutə ni kəra wa.

⁹Mdə na asəndə ni aɗi ata jaktə wutə ni kəra wa, mjir ɓukcirni aɗi ata jaktə wutə ni wa.

¹⁰Maɗa'ni ata sə kiɗə kəra mji tursu kamnyar tar ka da ntə gəna tə baba' ɗa həlta.

¹¹Wala tə mdə na ɗimi ata nggari ka dunari, tsa ata mtə tsu akwa ngkyarkurərni.”

¹²“Wala tə ɗimikur ana ndzi msəra akwa mnya mdər harari, har tə tsa ata ɗuwar mbilari akira kyanggyarari,

¹³wala tə tsa aɗi na hir puɓəlari kazhar mnyari wa, tə tsa ana kəsi bwaduku akwa mnyari kamnyar msərakurərni,

¹⁴tsa ata ndzi ɗəɗahu apa ɗiɗiwar ma tsa ku ləghəi akwa kutari, tsa ata ndzi apa gwarər pwapu akwa dzari.

¹⁵Kəmanggar ata tapərɓəla shanga gəna tə tsa ndasəmnya, Hyel ata vu ka tsa tapərɓəla wala su na akwa kutari.

¹⁶Su tə mdə na ɗimi ku səma, suari ata ndzi apa gwarər pwapu, tsa ata ɓɗəɓɗə ni apa gwarər fufukər ka tsi ni.

¹⁷Tsa aɗi ata fəi ka wutə thlyaghayeri ar mal zaitun, wala zərkayeri na ata hwi uwa ka məma wa.

¹⁸Tsa ata hamta shanga su tə tsa ghəra akwa kəthlərari, kula ɗar su akwa, tsa aɗi ata wutə sakar nggatə msərakur gənarni wa.

¹⁹Kamnyar tsa ku nggəlar mji turtura ka hara ala ɗa bwani, ka dlutə kəyayeri natə aɗi tsa an hən wa.

²⁰“Tədəku tsa akwa hara mbulamkur, amma tsa aɗi ata mzhi vəi su aka kərari wa.

²¹Tsa aɗi ana səm su ka mbilar wa, antə msərakur tə tsa akwa nggari ni aɗi ata fəi wa.

²²Wala akwa sakar kərathlər gənarni, tsa ata ləkwa bwani, asar na ola ata si ata kərari ka dəkəi ni.

²³Zhar ni ka tsa səm su tə tsa hira! Hyel ata ɗi ni akwa ɗəffə bwarbwarkurərni, ka shirəngkər asarayeri ata kərari apa susəmərni.

²⁴Ma tsa pəla tsa ata huyimta katsakar liya mənggəl, afə əmza ata shimta ni.

²⁵Tsa ata ntsuɓəla afə ni aɓəla bwanda ata bwahilari, afə ni ata səɓəla akwa mbəlmbəla ka mamshi akwa njinja ata, antə thlivər na mwavər ata ngkəi ni.

²⁶Shanga su tə tsa tsaptə ka pwi aka kərari ni ata sha, u'ur Hyel an ata mbamta ni kəga mjir kutakəyirni, shanga su na ku mbila akwa kutakəyirni ata mbamtadzi.

²⁷Vəi na amtazi ata ndzi seɗar ɗimikur tə tsa hara, ka psəmnya abbər tsa ka biku. Duniya ata ndzi apa seɗa na ata thlata akəma alkali, ka pəla abbər tsa ka biku.

²⁸Ɗəffə bwarbwarkurər Hyel ata si apa avava, ka famta shanga su na avəyarngkiɗa.”

²⁹“Ngəni an su na akwa səkə mdə na ɗimi, an jili watsəɓa tə Hyel ku ɗəmha alari.”