Read bura-pabir Ayuba 21 Bible Online

Ayuba 21 - bura-pabir bible

Ayuba 21

¹Antə Ayuba pəla,

²“Psi gir thləma giri ka hangkal bu usama aka su tə I ata pəlari ni, ngəni an kəmar tə I akwa turari akəla giri.

³Mbwi giri ɗəffa giri ali kəi gari, aghəla nda giri ata mzhi ləkəma ka mnya ɗimi ar giri.”

⁴“I aɗi akwa kampiku ni ka mdə mai, ka Hyel surni, apani kamnyar mə tə ɗəffi aɓzə wa ri?

⁵Wul giri ra bu, I ku ndzi sur kətadza, ma giri an ata dzam su tə Hyel hara ali ni giri ata kəsi mnya giri.

⁶Kəlara sakatə I dzam ata kəra laku tə I ɗar bwani akwa ni, dzi ana mta, antə I ana thlivər ka yakata.

⁷“Kamnyar mə tə Hyel ana zhar ka kəmanggarayeri fi, har ka da kəla ka hara gəna nə ri?

⁸Kamnyar mə tə tsa ana zhar ka maɗa' ɗa kəla ka ndzi mji, har ka da wutə kəkayeri arɗa ka mpikə nə ri?

⁹Da ana ndzi akwa kəyayeri arɗa akwa msərakur kula thlivəra, tsuwa Hyel aɗi ana ɗi ɗa wa.

¹⁰Gyalayeri arɗa aɗi ana fəl mwala kula kətə hur wa, mwala thlayeri arɗa ana ya kula hur təri adzə ɗa.

¹¹Maɗa' ɗa ana hwihwi ka gyali kəga nvwa ɗa apa maɗa təma, da ana ɓathla kəga hwada.

¹²Da ana hara ha ata mnya guləm ka kəcaikəcai, ka hara kucali ata mnya shwala.

¹³Da ana kuri ndzəndziyir ɗa akwa msərakur, ka mta akwa msərakur kula bwani.

¹⁴“Mji na ɗimi ana pəla aka Hyel abbər tsa aɗiya damitə ɗa wa, da aɗi ata bara səndə su tə Hyel akwa barari wa.

¹⁵Da ana pəla Hyel ni mə laga ri tə da ata vəngkər səli alari ni? Wala man riɓar hara adduwa alari nə ri?

¹⁶Da ana kəta abbər da an ka kuthlikur ata kəra gənar ɗa, amma dzamər kəmanggarayeri ni zum ka arna.

¹⁷“Amma wala apani ka yiɗau tə giri wutə kəmanggar mtə kula virərni ri? Ka yiɗau antə asar ana si ata kəra jili mda apani ri? Ka yiɗau antə Hyel ana ɗi mjir biku akwa ɗəffə bwarbwarkurərni ri?

¹⁸Ka yiɗau antə tsa ana fimta ɗa apa su tə shambar ana hara ka kusar ri, wala təra ka da apa ɓaɓiya tə shambar kəta?

¹⁹“Giri ana pəla Hyel ana yu bikər mdər ya akəla maɗa'ni, amma I akwa pəla abbər, mji na hara biku ni antə ka Hyel ɗi ɗa, kamnyar ka da sənda abbər da ku ɓzamtə su.

²⁰Ka da wutə watsəɓər ɗimikurər ɗa ni pwa ata kəra ɗa sur ɗa, ka da nggatə mwavərkur ɗəffə bwarbwarkur ar Hyel na ka Duna ta Shang ni.

²¹Kamnyar ma da ku mti, man ata jaktə damitə ɗa ka lapiyakur kutakəyir ɗa ri?

²²Mda aɗi na ata mzhi thlipə su aka Hyel ya, tsa na ata hara shariya aka mji na ol'ola ata kəra mji?

²³“Mdə laga ata mta ka gəna akwa ngga msəra ka lapiyakur,

²⁴ka dza ɗa tsu ɓɗaku ata mbəlmbəla, akwa ncantə ndləndləkur ka səm msəra.

²⁵Mdə damwa ata mta akwa bwani ka ɗəffə ɓzəɓza, kula ɗar nggatə msəra.

²⁶Amma japwa ɗa ata mta apa nvwani ka mdə harəmta ɗa, ka kulamnya kwasəmnya ɗa.

²⁷“I asəndə jili dzam na ɗimi tə giri kəgari, ka laku tə giri ɗəmhə ka giri dəkəi ra akwa.

²⁸Kamnyar giri ata pəla, ‘Ama kəyir mdə ol ni kulini ri, kəi mdə na kəmanggar ni?’

²⁹“Ga aɗi ɗar yu mji na ana lənggu akwa vəyayeri na ciju ciju wa ya, nənga ga aɗi ana kələngkər aka su tə da pəla wa ri?

³⁰Ai ka hang Hyel aɗi ana tsəkwar mji na ɗimi, akwa vir tə matsifa ku si ata kəra mji wa. Kamnyar Hyel ana msərantə ni akwa vir tə ɗəffari ku ɓzi tə tsa akwa ɗi mji.

³¹Mda aɗi na ana nggitə pəlangkər aka mdə na ɗimi wa, wala ɗi ni kamnyar su tə tsa hara wa.

³²Sakatə mdə ku mwantə ni akwa kula, mjir səka na ol'ola ana sək kəra kulərni.

³³Dlamar mji andər pwar mshiyirni ka mwantə ni ata kula, antə wala həi tə mda ana pungkər alari ana ndzi msəra alari.

³⁴“Apa madi tə giri ata mzhi shiktə ra ka ndərayeri na kula kər apani ri? Kamnyar thlandər an nghyantə gariyir giri ni daci.”