Read bura-pabir Ayuba 22 Bible Online

Ayuba 22 - bura-pabir bible

Ayuba 22

¹Antə Elifaz na mdər Teman pəla abbər,

²“Mda ata mzhi ndzi ka ampani aka Hyel ya? Wala mdə na ɗəɗu ma ampaniyir ni aɗi aka Hyel ya?

³Ɓɗakkur nga ata mzhi ndzi ka ampani aka Hyel ya, nənga ma ga ndzi kula biku ata dlar Hyel ri?

⁴Ga ana wuta apa kamnyar tə ga ana thlivər Hyel, antə tsa akwa mpa ala gə ka burka ngə ni ya?

⁵Awa. Tsa akwa mpa ni kamnyar bikər nga ku hara hang dzau, tsuwa kəmanggarkur nga na ku hara ɗimi kamta.

⁶Kamnyar nuhum ga ku hamta təpa aka maɗama' nga, ka dlutsə ləptər ɗa kamnyar nuhum da aɗi sə mzhi ntəmtari wa, har tə ga ku fəi ləptər ɗa kazhar ɗa tə da mwa dura.

⁷Ga ku nggəlar ta na yimi aka mji na ka thləli, ka ngkatə ɗəvər nga aka mji na ka mi.

⁸Ga ku kəthlər ka duna ga ka gənar nga, ka dlutsə vəyayeri tə da ndzi ar nga.

⁹Ga ku nggəlar ta dlar kughungayeri, ka nar bwani aka maɗangkyar na muta.

¹⁰An su na hara tə kuayeri ka sur thlivəra zumzum, akwa kalaktə nga kulini kula gə sənda.

¹¹U'ur nga akwa mta antə ga amzhi wutə su akwa kuthlu wa, tsuwa pərtu akwa hartə nga.

¹²“Hyel akwa vəi na amtazi, haptə nca ga amta kara wul sasəlkayeri, da amta ciju.

¹³Amma ba kulini ga akwa pəla, ‘Man tə Hyel asəndə ri? Tə kuthlə ku ɗuwamta ni apa madi tə tsa ata mzhi hara shariya ala mburu ri?

¹⁴Dlambayeri ku hartə ni tə tsa amzhi wutə su wa, antə tsa ana mwa ata jikwara vəi na amtazi ni.’

¹⁵“Ga ata ləkəma ka mwa akwa laku na waci, natə mji na ɗimi nu ni ya?

¹⁶Apatə avava ana ndlamta ka famta mbwa, antə da ku mti ɗəm kwabə sakar mtər ɗa ahara.

¹⁷Da ana nggəlar Hyel na ka Duna ta Shang, ka pəla ka tsa təra kazhar ɗa, kamnyar ka kəta abbər su aɗi tə tsa ata mzhi harari ala ɗa wa.

¹⁸Amma tsa an nghyantə kəyayeri arɗa ka suayeri na ɓɗakɓɗaku, apani dzamər ɗa ni zum ka arna.

¹⁹Mji na jirkur ana hara kucali, sakatə asar ku wutə kəmanggar, mji na kula biku ana kumshi ɗa, ka hara kyartəkur ala ɗa.

²⁰Da ana pəla, ‘Jiri Hyel ata kuri ka dawayeri ar mburu, ka mbamta shanga sur ɗa na ku mbili ka u'u.’

²¹“Antə Kulini Ayuba, nggaɓəla girdzi ka Hyel, antə ga ata nggatə msərakur ndzəndziyir nga.

²²Psi thləm aka su tə tsa akwa thlipa ala ga, ka gə kəsi ɗa akwa ɗəffa ga.

²³Jiri, ma ga ata tərghəi kəra ga ka ngka adzə ni, ka ngkatə ta mda avəyarngkiri ajaktə hara biku, ga ata nggatə msərakurari.

²⁴Ma ga ata namtə kwaba suma wa apa bərbər, ka pumta dinar na ɓɗak ta shang akwa nca pela kuta zərkəu,

²⁵ma ga ata namtə Hyel na ka Duna ta Shang, ka tsa ndzi ala ga apa dinar ka adzərfa na ɓɗak ta shang,

²⁶antə Hyel na ka Duna ta Shang ata na gə msərakur, antə ga ata mzhi si akəmari kula thlivəra.

²⁷Ma ga ku kiɗə su akəlari, tsa ata hamta ala gə suari, antə ga ata nghyaɓəla alkawal tə gə kəta alari.

²⁸Ga ata mzhi hara kəlara su tə gə ɗəmha abbər ga ata bara harari, tsuwa shanga vəi tə ga ata mwari ata, ga ata mwa akwa parakəu.

²⁹Ma Hyel ku kəli səliyir mda, ga ata pəla tsa hara kamnyar tə mdə ni ka kər olkur, amma ngəni an laku tə Hyel ana mbantə mda akwa.

³⁰Ma ga aɗi ka biku wa Hyel ata msərantə nga, kamnyar tsa ana msərantə mji na kula biku.”