Read bura-pabir Ayuba 23 Bible Online

Ayuba 23 - bura-pabir bible

Ayuba 23

¹Antə Ayuba pəla,

²“Ashina ma nggungguniyirna ni ata ndzi mwavər! Ata kəra shanga tuwarna ni, ba kulini hərkər bwani ni aɗi wa.

³Ma abbər I ana səndə vəi tə I ata wutə ni ata, I ata mwantə tuwarna ni ba adzə dəkəl kuthlikurərni.

⁴I ata jikata alari su na akwa damitə ra, ka jikaɓəla shanga su na hara tə I akwa nggungguni ni.

⁵Antə I ata nggatə su tə tsa ata pəla ali ata kər, kəi nggaɓəla su tə tsa ata pəla ali.

⁶Hyel ata sə nca ali dunarni ya? Awa, tsa ata psi thləmari ali.

⁷Anda mjir jirkur ata mzhi gari ka tsa, tsuwa I ku hamta jiri abbər alkaliyirna ni ata pəlaɓəla aka mji abbər I kula biku.

⁸“Amma wala I an pakə ni bwar raghəi, tsa aɗi anda wa, wala I an pakə ni bwar ramta, I aɗi ata wutə ni wa,

⁹wala I an pakə bwar yala, I aɗi amzhi wutə ni wa, wala I an shinardzi bwar anəm, ba kulini I aɗi ata wutə ni wa.

¹⁰“Amma tsa asəndə laku tə I ana nuwa, ma tsa ku ngkərtə ra, tsa ata wutə ra kula biku.

¹¹I akwa nu ni kur səlari kur səli, I aɗi ɗar pəra kazhar lakurni wa.

¹²I aɗi ɗar ɓəli tsawurni wa, I ku kəsi shanga ndərərni akwa ɗəffi.

¹³Amma ma tsa ku ɗəmhə surni, mdər mzhi paliyari aɗi wa. kəlara su na ku kəskərari, tsa ata haratari.

¹⁴Kamnyar tsa ata nghyaɓəla su tə tsa ɗəmha ata kəri, ka shanga jili suayeri na mbila akwa ɗəffari.

¹⁵Antə kamnyar su ngəni I akwa thlivər ni ni, kəlara sakatə I dzama ata kəra su ngəni, I ana yakata.

¹⁶Hyel na ka Duna ta Shang ku tsi dzi, tsa ku thlivərantə ra ka duna.

¹⁷Amma wala tə kuthlə ku hartə ra, ka namtə ra apa I mdlyang, I aɗi hartə mnyi wa.”