Read bura-pabir Ayuba 24 Bible Online

Ayuba 24 - bura-pabir bible

Ayuba 24

¹“Kamnyar mə tə Hyel aɗi ana pəla vir tsa ata sə hara shariya aka mji na ɗimi wa nə ri? Kamnyar mə tə mjir nu ni aɗi ana wutə ni akwa hara shariya aka mji na ɗimi wa nə ri?

²“Mji na kəmanggar ana həl vəi atar tərar pela kəla fakər ɗa, ka thla laku ka dlutsə təmar mji ka pu akwa ciɓər ɗa.

³Da ana ndəkəmta mutayeri ka kwarar ɗa, ka dlutsə thlar mwala kughung abbər tar ma tsa ku ntəmta təmbəl na ata kərari ni.

⁴Da ana tərəmta mjir bwani kazhar laku, tə kəlara saka mjir tursu ni ana hwi ra ɗuwardzi.

⁵“Apani mji turtura ana ləɓəla kamnyar bara susəma, apatə kwaramtaku ana ra bara susəma akwa mtakəu, da ana ləɓəla akwa mtakəu kamnyar bara susəma aka maɗa' ɗa.

⁶Da ana ra pakə susəmər kuta ɗa akwa fakər mji damwa, ka hwilkə susəma akwa fakər anap ar mji na kəmanggar.

⁷Da ana pəpəi dura har ka vir kura kula sur pudza, da aɗi ka barkwa akwa sakar vəi mtathlaku wa.

⁸Yimərhyel ana dlaɓu ɗa akwa garayeri, ka da həlamta akira pela na ol'ola.

⁹“Mji na aɗi na ana dlutsə ɓzər muta ata uwa, ka dlutsə ɓzər maɓir ar mdər bwani ka kəsi, har tar ma tsa ku ntəmta təmbəl arni.

¹⁰Mjir bwani ana mwa dura kula ləptu, ka fa julangayeri ata kəra ɗa ka mi.

¹¹Da ana ntsar mal zaitun akwa daɓwa bwarayeri ar nfur zaitun, kula da ɗari, ka ɓukci ka thləli akwa ghər ntsar yimər anap.

¹²Akwa kuta bərni, mda ana nggatə kuraka mji na akwa tuwa kamnyar bwani, ka kuraka mji tə mdə dəkəi ɗa akwa tuwa dlara, amma Hyel aɗi ana damitədzi ka tuwar ɗa wa.

¹³“Mji aɗi na ana hara dawakur ka parakəu, mji na aɗi tsəli ka lakurni ni wa, antə da aɗi ana nu lakurni ni wa.

¹⁴Mdər tsi mda ana thlata aviraviri akwa kuthlu, kamnyar ka tsa tsi mjir bwani ka mjir tursu.

¹⁵Mdər karwakur ana sək sakatə vəi ku hara zhim, antə tsa ata hartə kəmari ta mda anggaɓəla ni, ka pəla, ‘Mda aɗi na ata wutə ra wa.’

¹⁶Aviri antə da ana ɓəl kəyayeri, amma ma təpci da ana ɗuwardzi avəi kamnyar da aɗi tsəli ka parakə wa.

¹⁷Kamnyar kuthlu na pələku an baltiyir ɗa, kamnyar da ku tsəli ka sur thlivər na aviri.

¹⁸“Amma mji na ɗimi ana səkwi sha wa, da ndzi apa mbur yimi na ata kəra yimi, mdə ku shuwumta shanga surni akwa tsəɗi ni, antə mjir ntsar yimər anap aɗi na ata jaktə nu təbwar fakər anapər ɗa kəra wa.

¹⁹Apatə handzəkəla ana lusa akwa vəi bwarbwar ka sakar ulta, antə kula ana hara aka mjir biku.

²⁰Wala mama' ɗa ku fwari ata kəra ɗa kulini, kulamnya ku kwasəmnya ɗa, mda aɗi na ana ɗangtə ɗa kəra wa. Apatə shambar yimi ana ntsugəmta nfwayeri, antə mda ata shamta mji na kəmanggar.

²¹“Mdə hara ala ɗa apani ni kamnyar tə da ana ɗəɗuɓəla mwala na ana ya wa, ka nggəlar ta dlar mwanki na kughung.

²²Amma Hyel akwa kuthlikurərni ana kədləmta mjir duna, wala ma da an thlata ka duna, da aɗi hamta jiri ar ndzi ka mpikə wa.

²³Hyel ata mzhi zhar ɗa ka da ndzi lapiya kula thlivəra, amma ncari akwa wul mwar ɗa.

²⁴Kəmanggarayeri ana mzhi ndzi mji ol'ola akwa saka laga raka, aghəla nda da aɗi suma kəra wa. Da ana nggyarghəi kəra ɗa apatə pukdla ana tətəɓwa ka təri, ka ndzi apa kədlar mthli natə mdə ku thli sanggamərni.

²⁵Mda aɗi na ata kampiku abbər su aɗi apani wa ya? Ma mdari aɗi ka mthlakari ncanta ali vəi sharna ata bəbal.”