Read bura-pabir Ayuba 27 Bible Online

Ayuba 27 - bura-pabir bible

Ayuba 27

¹Antə Ayuba jaktə baɗitə gari ka pəla,

²“I kahyel ka Hyel na ka mpika, na nggəlar hara ali jirkur ni, ka kahyel ka na ka Duna ta Shang, na vu ra akwa bwani abbər,

³ma I tsu ka mpika, tə Hyel akwa ni dunar mpika,

⁴I aɗi ata thlandər wa, tsuwa I aɗi ata pwaktə mdə wa.

⁵Ka hyel ngkatə ta I apəla abbər giri ka jiri, har kəi mta, I aɗi ata pali jirkur tə I kəgari ni wa.

⁶I ata kəsi jirkurərna, I aɗi ata psi ni wa, Tsuwa akwa shanga ndzəndziyirna, jirkur tə I kəgari ni aɗi vu ra akwa sur səli wa.

⁷“I akwa kiɗa abbər ka mdə na nggəlar ra ɗar bwani apa mdə na kəmanggar ka mdə ɗi mdər hara dawakur ka iya tsu apa tə mda ata hara aka mdə na ɗimi.

⁸Kamnyar ma sakatə Hyel ku yu mdə na kula thlivər Hyel, man tə tsa ata vəkər kari ri, ma sakatə Hyel ku dlu mpikari?

⁹Ma sakatə bwani ku si ata kərari, Hyel ata psi thləm aka tuwarni ya?

¹⁰Tsa ata nggatə msərakurər na ka Duna ta Shang ya? Nənga tsa ata mzhi kəga thləma Hyel akwa kəlara saka ri?

¹¹“Ndzi kəi ngkər ala giri su ata kəra dunar Hyel, I aɗi ata ɗuwar su tə na ka Duna ta Shang ɗəmhə wa.

¹²Ai shang giri ka kər giri ku wutə su nayeri ni, kaha, kamnyar mə tə giri ata mnya gapangapani ri?

¹³Ngəni an nəɓwar kəmanggar akəla Hyel, ngəni an watsəɓər mjir hara bwani aka mji akəla na ka Duna ta Shang.

¹⁴Wala ma tsa an wutə maɗangkyar hang, da ata kurəmtadzi akwa mpa, tsuwa mjir nyarmbwarni aɗi ata səm ka ndlə wa.

¹⁵Mji na ku mbili aghəlari asar ata kurəmta ɗa, wala mwankir ɗa aɗi ata tuwa mtər ɗa wa.

¹⁶Wala ma tsa an tsaptə adzərfa apa bərbər, ka tsaptə ləptayeri hang apa həi,

¹⁷tsa ata mzhi tsapta suayeri ngəni, amma mdə na pwa laga an ata sə hamnyari, ka mji na kula biku ndəkəi adzərfa ni.

¹⁸Mbwa tə kəmanggar hənta aɗi ana fəi wa tsa ata ɓzə taktar apa zakur tətau, tsa ata hil taktar apa mbwar səka akwa fakəu natə mdər səka latə ka thlali.

¹⁹Kəmanggar ana ra pəpəi gəna, amma su ngənda aɗi ata jaktə hara kəra wa, ma tsa kəlar ncari ɗəɗəpa, gənarni aɗi kəra wa.

²⁰Sur thlivəra ata si kakər ata kərari apa pərtu, tsu aviri nda antə shambar ata təra ka tsa.

²¹Shambar bwar raghəi ata kətə ni ka təra ka tsa, tsa ata kələmta ni kazhar vəi ndzəndziyirni.

²²Shambar ni ata fatə ni ka duna kula kətadza, antə tsa ata hwi apa ka tsa ɓələmta səlari.

²³Antə mji ata ɓumta tsiya ɗa, ka kumshi ni ka hara kyartəkur alari.”