Read bura-pabir Ayuba 28 Bible Online

Ayuba 28 - bura-pabir bible

Ayuba 28

¹“Jiri, kur la adzərfa aɗi, ka vəi tə mda ana kəcə dinar ata.

²Mda ana la liya mənggəl akwa di, ka juwaɓəla nggirkumi akwa pela.

³Mjir la pelar daraja ana kədləmta kuthlu akwa pakə pela na akwa kuthlu ni, akwa vəi kuthlu na zurang.

⁴Da ana ntuli ku akwa di, ciju kazhar vəi tə mda ata, akwa vəi tə səla mda amzhitə wa, Da ana ləghəi ata səwa akwa tər banjuwuli bwakəma ka bwahili.

⁵Ata kəra di aɓəla mda ana wutə susəma, amma akwa kirari aghəi tsa ana ndzi apa u'u.

⁶Pelayeri na akwa tsa an pelar daraja apa sapfiya, tsuwa mda an wutə dinar akwa bərbərari.

⁷Ɗikar ngka kum asəndə lakur mwari akwa vəi ni wa, tsuwa nca mbələm aɗi wutari wa.

⁸Mwaɓi mtakə na ana hwava aɗi ɗar ntsari bwa nda wa, wala tsəngi ma aɗi na ɗar təramta abwanda wa.

⁹“Mda ana cikthlə pirakthlayeri na ɓəɓal ɓəɓal, ka la ku ata garayeri har ka ləghəi akwa kira ɗa.

¹⁰Sakatə tsa akwa ntul pirakthlayeri ni, tsa ana karəngkər aka suayeri na ka daraja.

¹¹Tsa ana mbwahə thlyaghayeri ta da huyimta, ka səɓəla ka shanga suayeri na ɗuwarɗuwarari.

¹²“Amma ama antə mda ata mzhi wutə ɗəɗukur ri? Tsuwa ama antə mda ata wutə nggaɓəla su ri?

¹³“Mda aɗi na asəndə lakur mwari ata vəi ni wa, mda amzhi wutə ni akwa duniya ngəni wa.

¹⁴Kira yimi akwa pəla, ‘Tsa aɗi akwa Iyi wa,’ antə manda pəla akwa pəla, ‘Tsa aɗi adzə ra wa.’

¹⁵Mda amzhi mastari ka dinar wa, tsuwa kəgəɓkur adzərfa aɗi tə mda amzhi girari ka tsa wa.

¹⁶Mda amzhi gira darajarni ka dinar na ɓɗakta shang wa, wala ka mdə gira ni ka darajar oniks wala sapfiya wa.

¹⁷Mda giri ni ka dinar wala gəlas shang wa. wala mzhi palɓəla ni ka sur dəɓa tə mdə nam ka dinar shini wa.

¹⁸Mda ghər kamnya alari pela mamza wala pela tə mda wul su akwa wa.

¹⁹Mda amzhi gira ɗəɗukur ka topaz na ar mjir Ithliyopiya wa, wala gira darajarni ka dinar na shini wa.

²⁰“Ka, ɗəɗukur ni ana thlata ama ri? Tsuwa mda ana wutə nggaɓəla su ni ama ri?

²¹Mdə ɗuwamta ni ta shang su na ka mpika, ɗuwarɗuwarari ta nca ɗikar kutahyel.

²²Wala duniyar mji mtəmta pəla, ‘Təng thləma yeru an nggatə mji akwa ngkərari daci.’

²³“Tar Hyel shini an asəndə lakwari, tsa an asəndə vəi tə ɗəɗukur ata.

²⁴Kamnyar tsa ana wutə datər duniya, ka wutə shanga suayeri na akira hyel.

²⁵Sakatə Hyel ɗəmhə kəgəɓkur shambar, ka ɗəmhə hangkur yimi na akwa dlambayeri,

²⁶sakatə Hyel ɗəmhə tsawu natə ka yimərhyel nuwa, ka laku tə ka wurkər dləra nuwa,

²⁷antə tsa wutə ɗəɗukur ni, ka ngkərtə ɓɗakkurərni, tsa vəi ni ka wulɓəla su ata kərari ɓɗak laga.

²⁸“Antə tsa pəla aka mda abbər, ‘Nggədza ni, thlivər ɗəffa MTHLAKU an ɗəɗukur ni, tsuwa nggəlar ɗimikur an nggaɓəla su ni.’ ”