Read bura-pabir Ayuba 29 Bible Online

Ayuba 29 - bura-pabir bible

Ayuba 29

¹Antə Ayuba jaktə ləkəma ka gari akwa pəla,

²“Apa ka jaktə namtə ra apa tə I aɗi waci! Apa akwa sakayeri na təramta, sakatə Hyel akwa wulwul ra.

³Sakanda pitəlarni ana mbəla abwa kəri, tə parakərni akwa pwar ra kəlara sakatə I akwa mwa akwa kuthlu.

⁴Sakanda I akwa kustakurərna, sakatə Hyel na pazhirna akwa ɓəla kutakəyirna.

⁵Sakanda na ka Duna ta Shang tsu adzə ra, sakatə maɗangkyarərna ana kalaktə ra.

⁶Sakanda I ana pər ka uwa, sakatə mal nfur zaitun akwa puɓəla ali mal hang apa zərkər mal.

⁷Sakanda I ana mwari akwa tsaptədzər mji ol'olər kutadi, kəi ndzəndzi akwa vəi ndzəndziyirna akwa vəi tsaptədzi ni,

⁸Ma kustayeri ku wutə ra da ana sharardzi kazhar laku ali, tsuwa mji na ku hali ana thlatə ka thləthlata kamnyar ni səli.

⁹Mji ol'olər di ana zhar mnya ka dləɓ səri ali, da ana kəsi mnya ka tsiya ɗa.

¹⁰Wala mji na ka olkur ana hartə mnya ɗa ka dləɓ səri akwa ngga ra.

¹¹Sakanda kəlara mdə na ku nggatə ra ana hu ra, kəlara mdə na ku wutə ra ana mbərsa ka iya.

¹²Kamnyar I ana nggatə tuwar mjir bwani ka dlar ɗa ka dlar mutayeri na kula mdər dlar ɗa.

¹³Mji natə mbil raka bwani ata tsi ɗa ku kiɗəngkər ali barka, I ku hara tə kughungayeri ku hara ha kamnyar kucali na akwa ɗəffa ɗa.

¹⁴I fatə jirkur ka hata apa ləptu, jirkur ndzi ali apa ləptu ka sur barkər.

¹⁵I ku ndzi nca aka mji na mdlyang, ka ndzi səl akwa mji na nggurdəkəi.

¹⁶I ku ndzi aka mjir bwani apa baba' ɗa, ka dlar mətəpiyayeri akwa su tə da akwa turari.

¹⁷I ku ɓələmta thlira mji na ɗimi, ka vu tə tsa psi mji natə tsa ngkəi akwa tsiyari.”

¹⁸“Sakanda I ana dzama abbər I ata sə mta akwa kəyirna, tsuwa I ata hara məva hang apa wuyaku.

¹⁹I ku ndzi apa nfwa natə nggilangayerari ku mzhitə yimi, ka kəlangkəu ata tsiyayerari har ka vir kura.

²⁰Parang saka mji akwa ni səli, tədəku I akwa wutə duna bilən.

²¹“Mji ana ndzəndzi ka səkə ra, ka psi thləm ali, da ana ndzi ɗiɗi ka psi thləm aka sauriyirna.

²²Ma I ku kuri gari da aɗi ana vəngkər wa, kamnyar gariyirna ana kəskəra ɗa apa yimi mtathlaku.

²³Da ana ndzəndzi ka səkə ra apatə mda ana sək yimərhyel, da ana kəlar mnya ɗa akwa səkə ra apa mdər səkə yimi na ntangkəma.

²⁴I ana kumshi ala ɗa sakatə dza ɗa ku mti akwa su, antə ma I ku wul ɗa ka kəmar ɓɗakkur, da aɗi ana gyal kəgari wa.

²⁵I ana dzaɓəla ala ɗa su tə ka da hara, ka pwar ɗa akwa sauri apa I an olər ɗa, I ana pwar ɗa apatə kuthli ana pwar sojayeri arni apa mdə na ana shiktə mji tə su hara ala ɗa.”