Read bura-pabir Ayuba 30 Bible Online

Ayuba 30 - bura-pabir bible

Ayuba 30

¹“Amma kulini mji tə i təra ɗa ka olkur an akwa mnya ɗimi ali nggwa! Mji natə sakanda I ata mzhi kyar kəkayeri arɗa, natə I ahir paktə ɗa ka kilar sək kəra təmarna wa.

²Man su tə I ata mzhi wutari akəla mji na kula duna ri, mji tə duna ɗa ku kurtə kura?

³Mji ngəni akwa ɗar bwani kamta, natə ma məi kətə ɗa aviri, da ana hwi mwari akwa mtakəu, ka laɓəla nggilanga nfwa akwa di, ka ɓɗa.

⁴Da ana mwari adzə nfu laga ka ɗəmtsə thlali nfu laga məmashu ata mnya kufa, ka laɓəla nggilanga nfur shimtu ka ɓɗa apa susəma.

⁵Mjir di ni ana kədləɓəla ɗa kazhar nca mji, akwa hara kuraku ala ɗa apa dlu da həlayeri.

⁶Antə tar ka da ra ndzəndzi akwa thləhur zərkayeri, akwa kuayeri ka akwa gula pelayeri.

⁷Akwa nca nfur mtəhəra na raka raka akwa mtakəu, antə da ana tuwa apa kwarar mtakəu, ka tsaptədzi akira nfwayeri na ka mtəhəra.

⁸Da jili mji laga caku, na aɗi hara thləm wa, antə mjir di ni ku dlaɓu ɗa ka kədləɓəla ɗa kazhar tsəɗi.

⁹“Antə kulini maɗa' ɗa nggwa an ata si ka kumshi ra, har ka da mnya ɗimi ali!

¹⁰Har da akwa cikə ra, ka hwi vəi tə I ata, har ma da akwa tifə mtili ata nci.

¹¹Kamnyar Hyel ku fəi duni ka kəli səliyirna, da akwa ngkahədzi ata kəra su tə da ata harari akəmi wa.

¹²Antə maɗashambar ngəni thlatə ba abwa mazəmi akwa thlentə hangkali, da akwa kədlə ra, ka ɗəmha ali laku tə da ata tsi ra akwa.

¹³Da hartə shanga lakwayeri tə I ata mzhi nuwari kəi msəra, ka hara shanga su tə da amzha ka da tsi ra, da aɗi akwa bara dlara akəla mdə wa.

¹⁴Da ɓələmta katangga na ana mbuli ra, ka puvidzi ata kəri ka mpa, tsu sakatə katangga ni akwa huza antə da puvidzi ata kəri.

¹⁵Thlivər ku nghyantə ra, ka kədləmta darajarna apa ka shambar, antə gənarna tsuwa təra apa dlamba.

¹⁶“Antə kulini məyir ndzi ata wula aɗi ata kuti kəra wa, bwani ku ndlangkərdzi ali kulini.

¹⁷Aviri shanga dzi ata kətə ra, dzi na akwa ɓɗəɓɗə ra ni aɗi ana thləthlatə wa,

¹⁸Hyel ku fatə wulya ləptərna ka ɗəffu, ka mbwahə ra ɓəɓal apa ləptu na ɓingɓing.

¹⁹Tsa ku ndzəhəmta ra akwa vəi pumta diɗi, ka namtə ra kula ampani apa bərbər ka pənju.

²⁰“I ku tuwa dlara akəla ga, Hyel, amma ga aɗi shinau ali wa, I ku thləthlata akəma ga, amma ga aɗi damitədzi ka i'i wa.

²¹Ga ku hara ali kəmanggarkur, ka hara shanga su tə ga amzha, ka vu ra akwa bwani.

²²Ga ku vu tə shambar ku kətə ra ka təra ka iya, ka vu tə shambar na mwavər ku dingngga haptə ra.

²³I ka səndari abbər ga akwa lakur mwantə ra akwa mta, akwa vəi tsaptədzər shanga mji na ku mti.

²⁴“Jiri mda aɗi na ana nggəlar dlar nvwani, sakatə nvwani ku tuwa dlara kamnyar bwani tə tsa akwa wa.

²⁵I aɗi tuwa kamnyar mji sakatə da akwa bwani wa ya? I aɗi kətadzə mji na ka tur su wa ya?

²⁶Amma kəlara sakatə I bara su na ɓɗaku, təng asar an ata wutə ra, ma I ku bara parakəu, kuthlu an ata si ata vəyari.

²⁷Ɗəffi akwa mba ra antə sur mtathli ni aɗi wa, virayeri ar bwani ku si ata kəri.

²⁸I akwa mwa ka dzi mənggəl, amma aɗi pci an hara wa, mtəmtari, I ana thləthlata akwa vəi tsaptədzi, ka kiɗə dlara akəla ɗa.

²⁹I ku ndzi apa ɓzərma kilamtakayeri, apa pazhir zhimnakayeri.

³⁰Kəsəm dzi ku ngka mənggəl ka ləkwa surka, dzi akwa təla kamnyar dzəkdzəku.

³¹Guləmərna ku ndzi sur jikatuwa, shwalarna ku ndzi sur pwar mjir tuwa.”