Read bura-pabir Ayuba 31 Bible Online

Ayuba 31 - bura-pabir bible

Ayuba 31

¹“I ku kurtə kətə alkawal ka nci, abbər I aɗi ata jaktə wul ɓzərngkwa ka nggukə ni wa.

²“Man ata sə ndzi nəɓwarna akəla Hyel na ka duna ri? Man tə I ata sə wutari na ka Duna ta Shang na amta ri?

³Tsa ata sənta matsifa ata kəra mji na ɗimi, ka asar ata kəra mjir hara ɗimikur.

⁴Hyel asəndə shanga su tə I ana hara, ka shanga vəi tə I ana mwari ata.

⁵“Ma har I ku ndzi kula jiri, ka ɗar thlandəra aka mji,

⁶ndzi ka Hyel ngkərtə jirkurərna ata səkel na ɓɗakari, antə tsa ata səndə laku tə I ka jiri akwa.

⁷Ma I ku pəramta kazhar laku na kalkalari, wala zhar tə ɗəffi ku nutə su tə nci mwaɓta, ma har I ku diɓərantə tsi ka biku,

⁸to ka mdə ntsumta shanga su tə I thləka, ma apani wa ka shanga su tə I thləka ndzi nəɓwar mji.

⁹“Ma I ku ngguktə mwala' ntəwulərna, antə I ku ra nggwar mwala ni akwa nyarfurni,

¹⁰to ka mwalangkəya ndzi aka sal damwa, ka mji damwa pəi ka tsa.

¹¹Kamnyar ləka an biku na ɗimi kamta, natə tar alkaliyayeri an ata thlamta ɗi tə ka mdə hara aka mthlakari.

¹²Kamnyar ləka ndzi apa u'ur bara na ana mbamta su karkar, antə tsa ata mbamta shanga surna ba akwa nggilangari.

¹³“Kəlara sakatə buɗarna sal wala mwala ku səntə tuwarni akəmi, I ana hara kəthlər na kalkal ata kər.

¹⁴Ma apani wa man su tə I ata harari ma sakatə Hyel ku thlata kamnyar hara shariya ri? Ma sakatə Hyel ata yu mnyi, man su tə I ata pəla alari ri?

¹⁵Kamnyar tsu Hyel duku na həntə ra an həntə buɗayeri arna. Tsu tsa an alaktə yeru japu akwa kuta.

¹⁶“Su aɗi tə mdər tursu ku ɗar barari akəli antə I ngkata alari ya, nənga I ku ɗar fəi duna kughungayeri ri?

¹⁷I ku ɗar səməmnya susəma I shira, kula I nar aka mutayeri ya?

¹⁸Kamnyar I ku wulwul ɗa apa I an baba' ɗa parang I akwa dlar kughungayeri. təng akwa ngkyarkurərna,

¹⁹“Kəlara sakatə I ku wutə mda akwa tur ləptu, wala mdə na amzhi wutə sur hartə ashirari wa,

²⁰I ana hamta alari barkwa tə mdə nam ka shishir təmarna, antə tsa ata vədza ali barka.

²¹“Ma I ku ɗar nca kuleng aka ɓzər na muta, kamnyar tə I mbərsa I ata mzhi mula alari akəma shariya,

²²to ka ɗethlər pathlahəi ntsuɓəladzi kazhar pathlahəi, ka tsi tərɓəla kazhar məngdlari.

²³Kamnyar I akwa thlivər abbər Hyel ata sənta asar ata kəri, antə I aɗi mzhi hara su nayeri ni wa.

²⁴“I aɗi ɗar mbərsa ka gənarna wa, wala namtə ni abbər tsa su laga wa.

²⁵I aɗi ɗar hara kucali kamnyar hangkur gənarna wa, wala abbər I wutə gəna ni ka dunar ɗəva wa.

²⁶I aɗi ɗar zuzuri aka pci wala sakatə tsa akwa mbəl wa, wala aka thliya kəga ɓɗakkurərni wa.

²⁷Su aɗi na ku ɗar tsəkwar hangkali wala akwa ɗuwari, abbər kəi namtə ɗa ka da ndzi haptərna wa.

²⁸Tar alkaliyayeri an ata mzhi thlamta ɗi tə ka mdə hara aka mdər nu haptu, kamnyar ngəni ku ncanta abbər mdari ku nggəlar Hyel na amtazi.

²⁹“I aɗi ɗar kumshi dawarna kamnyar bwani na wutə ni wa, wala hara kucali kamnyar asar na si ata kərari wa.

³⁰I aɗi ɗar hara biku atar hara adduwa abbər ka dawarna mtə wa.

³¹Shanga mjir kutakəyirna asənda abbər kəlara mdə na si adzə ra ana səm susəma na ku kəskərari.

³²Mətəpi aɗi na ku si aharngkəya ka ra pi ata matəngndlə wa, parang nyarfurna bwang aka mjir lənggu.

³³“I aɗi ɗar ɗuwar bikərna ta mji apatə mji laga ana hara wa, ka ɗuwar bikərna akwa ɗəffi wa.

³⁴I aɗi ɗar thlivər su tə mji ata sə pəlari ata kəri wa, I aɗi ɗar ndzi ɗiɗi wala dləɓa avəi kula ləɓəla abbər I akwa thlivər kyartəkurər mji wa.

³⁵“Aiyi, apa ka mdər nggatə ra aɗi kwang! I ata vu tsi akwa kakaɗə ni, ka ncanta abbər shanga su tə I pəla ni jiri! Apa ka namtə ka dawarna ni rəbutə su na ɓzamtə ɗəffari adzə ra ni.

³⁶“Sakani I ata haptari ata pathlahəi ka mji wuta, sakani I ata tsangkərari ata kəri apa dzakwar kuthlikur.

³⁷Sakani I ata jikaɓəla alari shanga suayeri tə I hara, I ata si akəmari kula thlivəra apa mdə ola.

³⁸“Ma fakərna ku nggungguni ata kəri, tə bwarayeri arni ku tuwa ata kəma duku,

³⁹ma I ku səm sur fakə ni kula ntə kwabari, wala ma I ku vu ka mdə kurəmta mthlakayerari,

⁴⁰to ka mtəhəra ptsa akwa fakərna ata vəya alkama, ka sazau ptsa ata vəya mthli.” Antə Ayuba ku kuri gariyirni.