Read bura-pabir Ayuba 32 Bible Online

Ayuba 32 - bura-pabir bible

Ayuba 32

¹Kamnyar tə Ayuba ku ndzangkir abbər tsa ka jiri antə pazhayeri arni na makər ni ku nggəlar ta shinangkər alari.

²Antə ɗəffa Elihu na ɓzər Barakel ku ɓzi ata kəra Ayuba kamnyar Ayuba ku kəcimta kərni abbər tsa aɗi ka biku adzə Hyel wa. Elihu an kəkar Buz, na akwa nyarmbwar mjir Ram.

³Tsuwa ɗəffari ku ɓza adzə pazhayeri ar Ayuba na makər ni. Kamnyar wala tə da ku pəla abbər Ayuba ka biku, da aɗi mzhi hamta amsa na kalkalari alari wa.

⁴Kamnyar tə Elihu an ɓzəngkyar akwa nca ɗa, tsa zhar ka mji na ol'ol ta tsa kuri gariyir ɗa katagu.

⁵Sakatə tsa wuta abbər mji ngəni makər ni aɗi mzhi hamta amsa na kalkalari wa antə ɗəffari ɓza.

⁶Antə Elihu na ɓzər Barakel na mdər Buz ni shinau ka pəla, “Arna I ɓzəngkyar, giri an mji ol'ola, antə I akwa thlivər pəla ala giri dzamərna.

⁷Antə I pəla akwa ɗəffi abbər kuji I zhar ka mji ol'ola an gari, kamnyar mji ol'ola an kalkalər thlipə ɗəɗukur aka mji.

⁸Amma kulini I ku nggaɓəla abbər mambələr Hyel na akwa ɗəffa mda, Hyel na ka Duna ta Shang andər hara ka mdə nggaɓəla su ni.

⁹Aɗi hangkur məva an ɗəɗukur wa wala fəyir mda an səndə su na kalkal wa.

¹⁰Apani I akwa kiɗa abbər ka giri psi thləm ali, kəi pəla su tə I sənda.”

¹¹“Apatə I akwa pəlari ni, I ku dləɓ səri ka ngga su tə giri akwa pəlari, sakatə giri akwa dzam su tə giri ata pəla alari.

¹²I ku vədzə hangkali ɓɗaku ka ngga giri, amma mda aɗi akwa nca giri na mzhi pəlangkər aka Ayuba wa.

¹³Ka giri hara hangkal ta giri asə pəla, ‘Yeru an mji na ɗəɗu. Tar Hyel shini an ata mzhi nggyari Ayuba, aɗi mdə wa.’

¹⁴Ayuba aɗi akwa gari ni ka i'i wa, tsuwa I aɗi ata nu laku tə giri hamta amsar giri akwa wa.

¹⁵“Shanga giri ku ndzi ndəndandəndari, mda aɗi na ka sur pəla kəra wa.

¹⁶Antə kəi ndzi akwa sək giri ya wala tə mdər gari aɗi wa? Ai giri thləthlatə ni kamnyar giri aɗi ka sur pəla wa.

¹⁷I ma I ata hamta amsarna, I ata pəla su tə I wuta abbər kalkal.

¹⁸Kamnyar I ka su hang tə I ata bara pəlari, I amzhi kəsi ɗa akwa kuti wa.

¹⁹Ma mda aɗi ni lakur gari wa, I ata ndəla apatə thləvur yimər anap na ku nghyi ka yimər anap bilən ana ndəla.

²⁰Ku ndzi dwali kəi gari kamnyar kəi sarar mpikəi, antə ndzi kəi hamta amsarna.

²¹I aɗi ata nca zumzumkur aka mda, wala gari ar haptə kəra wama wa.

²²Kamnyar I asəndə lakur gari ar haptə kəra mdə wa, wala ma I ana sənda antə I hara, Mdə na həntə ra ni ata tsi ra təkəma.”