Read bura-pabir Ayuba 33 Bible Online

Ayuba 33 - bura-pabir bible

Ayuba 33

¹“Antə kulini Ayuba, psi thləm aka shanga su tə I ata pəla ala ga.

²Kulini I ata baɗitə gari, antə I ata ləkəma ka gari ni kulini.

³I ata pəla su na akwa ɗəffi ka kuti duku, antə su tə I ata pəlari an jiri

⁴Hyel na ka Duna ta Shang an namtə ra, ka fiu shambar mpika akwa dzi.

⁵Pəla apani wa ja, ma ga amzha, ɗəmhədzi ka suayeri na damitə nga ka mwa kəɓa.

⁶Kara sənda abbər ma akəma Hyel I tsu apa ga, japwa mwa mdə nam mwa ka həi.

⁷Antə sur hara kara thlivər ra aɗi wa, wala dzama abbər I ata hara ala gə bwani wa.

⁸“Ngəni an su tə I nggatə nga akwa pəlari, tsuwa I ku nggatə ndərayeri ar nga.

⁹Gə pəla, ‘I kəcəkəcari, I aɗi ɓzamtə su wa, I ndəlang, kula biku.

¹⁰Amma təng Hyel an akwa bara sur vəta, ka tsa hara ali bwani, ka namtə ra apa I dawarni.

¹¹Tsa mbwau səli akwa gang, akwa dingngga wul mwarna.’

¹²“Amma I akwa pəla ala gə Ayuba, abbər atar gari apani ga ku sha, Hyel ku hara olta mda ayu mnyari.

¹³Kamnyar mə tə ga akwa nggungguni ata kərari abbər, ‘Tsa aɗi ata shinau ali wa' nə ri?’

¹⁴Kamnyar Hyel ana pəla su ka jaktə zwarəngkər ka hang, amma mda aɗi na ana vədzə hangkal aka su tə tsa akwa pəlari wa.

¹⁵Aviri sakatə heni ku famta mda, antə Hyel ana gari aka mda akwa suni ka wulsu.

¹⁶Sakanda antə tsa ata pəla aka mji su tə tsa akwa bara ka da sənda, ka vəi seɗa na ata tsaktə ɗa.

¹⁷Hyel ana gari aka mda apani kamnyar ka tsa zhar hara biku, ka ngkatə ni ta tsa gaya.

¹⁸Apani tsa ana msərantə ni ta suayeri na ata tsi ni, ka msərantə ni ta tsa ləkwa kula.

¹⁹Hyel ana ɗi mda ka shilku na mwavər ata vəi piyirni, ka vu ka dzari kətə ni ka duna.

²⁰Apani antə məyir susəma ata ləɓəla kazhar mnyari, wala susəma na msəra ata shar ɗəffari.

²¹Kumər dzari ata thlarəmtadzi ka sha, antə ga ata wul ɗethlayeri arni ata bəbal.

²²Tsa ata suni abbər mji akwa bara kəl mpikari, ka ngga shiwur kula kudzəha.

²³“Amma ma abbər pal akwa nca mjirthlentərhyel an adzə ni, pal akwa nca ɗa na ana thləthlata akwa daɓwa mdə ni, na ana ngkərɓəla aka mda su na kalkal alari ni.

²⁴Mdərthlentərhyel ni ata kətadzə ni ka pəla aka Hyel abbər, ‘Msərantə ni bu! Ga aɗiya hir ka tsa mtə wa, nggədza kwabar pəli ni ka mdə msərantə ni.’

²⁵Zhar ka kumər dzari jaktə ngka bilən apa ɓzəngkyar, ka tsa jaktə ndzi ka duna apa sakatə tsa kusta.

²⁶Antə ma tsa ku hara adduwa, Hyel ata nggatə ni, antə tsa ata sə vəngkər səli aka Hyel ka kucali.

²⁷Tsa ata hara ha ka pəla aka mji abbər, I ku hara biku ka hara su na ɗimi, amma Hyel aɗi hir ɗi ra kalkal ka bikərna wa.

²⁸Tsa ku msərantə ra akwa tsiya mta, kəi ləkəma ka ngga msərakur mpikəi.

²⁹“Hyel ana hara shanga su, ka jaktə zwarəngkər ata kər ata kər,

³⁰kamnyar ka tsa msərantə mpika mda akwa mta, ka vu ka tsa nggatə msərakur ka hara kucali.

³¹Apani Ayuba, jaktə psi thləma ga ɓɗaku aka su tə I ata pəlari, mbwi ɗəffa ga kəi kuri gariyirna.

³²Amma ma su aɗi tə ga ata bara pəlari, pəla kəi nggata, kamnyar I ata hir kəi ncanta abbər gə kula biku.

³³Amma ma apani wa, to, ka gə psi thləm ali, antə I ata thlipa ala gə laku tə ga ata ndzi ɗəɗu akwa.”