Read bura-pabir Ayuba 34 Bible Online

Ayuba 34 - bura-pabir bible

Ayuba 34

¹Antə Elihu pəla aka pazhayeri na makər ni,

²“Psi gir thləm ali, giri na kəta abbər giri ɗəɗu ni, ka giri nggatə ra, giri na pəla giri asəndə su ni.

³Kalkal apatə mnya mda ana nggaɓəla msərakur susəma, antə ka thləm nggatə ndər ka ndəkɓəla su na kalkal.

⁴Mburu awul damitədzi na akwa daɓwa Ayuba ka Hyel ni ka hangkal, ka mburu wutə amsa na ata dlar mburu akwa damitədzi ngəni.

⁵Kamnyar Ayuba akwa pəla, ‘Su aɗi tə I ɓzamtə wa, təng Hyel an akwa ngkata ali su tə kalkal kəi wuta.

⁶I ka jiri, amma da akwa pəla I mdər thlandər, su aɗi tə I ɓzamtə wa, amma wala apani mbəlki akurkur wa.’

⁷“Ai mda aɗi apa Ayuba wa, tsa na akwa sa kyartəkur apa mdər sa yimi!

⁸Tsa na ana mwa kəga mji na ɗimi, ka kadlə kəga mji na kəmanggar.

⁹Kamnyar har tsa pəla, ‘Su aɗi tə mda ana wuta akwa namtə ɗəffa Hyel wa.’

¹⁰“Antə psi giri thləma giri ali, giri na ana nggaɓəla su, Hyel aɗi ana hara kəmanggarkur wa, na ka Duna ta Shang aɗi ana ɓzamtə su wa.

¹¹Kamnyar tsa ana ntə mda kalkal ka kəthlər tə tsa hara, ka wuta abbər kəlara mdə ku dlu watsəɓə na kalkal ka kəthlərərni.

¹²Jiri, Hyel aɗi ata hara kəmanggarkur wa, na ka Duna ta Shang aɗi ana ndwali jirkur wa.

¹³Wan na alari dunar kuthlikur ata kəra duniya ni ri? Tsuwa wan vəi duniya ni akwa vəi ndzəndziyirni nə ri?

¹⁴Ma Hyel an ata kəɓəla mpikə tə tsa vu dza mda, ka tsa tsaptə surni akəlari,

¹⁵shanga su na ka mpika ata mta ata saka duku antə mda ata jaktə shin bərbər.

¹⁶“Antə kulini ma gə ɗəɗu, nggatə su ngəni, psi thləma ga aka su tə I akwa pəlari ni.

¹⁷Ma Hyel aɗi ka jirkur wa, tsa ata mzhi hara kuthlikur ya? Ga ata mzhi pəla abbər tsa aɗi hara kalkal wa ya, tsa na ka jirkur ka duna shang?

¹⁸Kamnyar tsa andər pəla aka kuthli, ‘Gə kəmanggar,’ ka pəla aka mji na ol'olər di abbər, ‘Ga aɗi ka jirkur wa.’

¹⁹Tsa aɗi ana nca zumzumkur aka kwakunayeri wa, wala hir mjir gəna təramta mjir bwani wa, kamnyar shanga ɗa tsa an namtə ɗa.

²⁰Akwa məcikər nca da ata mta, ata kərathlər viri da ata kənggərantədzi ka sha, mjir duna ata kurəmtadzi kula tsiya mdə tsəkwar ɗa.

²¹“Kamnyar Hyel akwa wul shanga su tə mda akwa harari, tsa akwa wul shanga mwarni.

²²Vəi aɗi na zhimzhim wala na ka kuthlu pələku, na amzhi ɗuwar mji na ɗimi ta Hyel wa.

²³Kamnyar Hyel aɗi ata tur thlamta saka laga, tə ka mdə mwari akəmari kamnyar shariya wa.

²⁴Tsa aɗi ata tur yuɓəla su ata kəra mji ol'ola kwabə tsa fəi ɗa ka putə mji damwa wa.

²⁵Kamnyar tsa asəndə surharar ɗa cai, antə tsa ana fəi ɗa aviri ka kurəmta ɗa.

²⁶Tsa ana tsa mji na kəmanggar kamnyar kəmanggarkurər tsu akəma mji,

²⁷kamnyar da aɗi akwa nu ni kəra wa. tsuwa da aɗi akwa ɓəla tsawayeri arni wa.

²⁸Da ana vu ka tuwar mjir bwani mwari akəmari, antə tsa ana nggatə tuwar ɗa.”

²⁹“Amma wala tsa dləɓ səri, wan ata yu mpa alari ri? Wala tsa an ɗuwamta kəmari, wan ata wutə ni ri? Wala an ata kəra mdə pal, wala an ata kəra mji,

³⁰Hyel ata mzhi carɓəla mdə na kula thlivər ni, ka tsa hara kuthlikur, kamnyar ka tsa nggəi dərku aka mji.

³¹“Ai kuji ka mdə pəla aka Hyel abbər, ‘I ku dlu ɗirna, antə I aɗi ata ɓzamtə su kəra wa.

³²Thlipa ali su tə I aɗi nggaɓəla wa, ma I ku hara biku, I aɗi ata zwartari kəra wa.’

³³“Təng tə ga aɗi ata kələngkər aka su tə Hyel ana hara wa ni, kalkal ka tsa ɗi jili mda apani ya? Tar ka gə carɓəla su pal, aɗi I an ata cara ala gə wa, pəla ala yeru su tə gə kwamta ata kər.

³⁴“Kəlara mdə na ana nggaɓəla su ata pəla ali, tsuwa mdə na ɗəɗu na ku nggatə ra ata pəla,

³⁵‘Ayuba aɗi səndə su tə tsa akwa pəlari wa, su aɗi tə tsa pəla na ka ampani wa.’

³⁶Apa ka mdə hara shariya aka Ayuba akəma alkali, har ka mwanta aka tsikərari nggu, kamnyar tsa akwa hamta amsa ni apa mji na kəmanggar.

³⁷Kamnyar tsa akwa hara kər ɓəɓalkur ata kəra biku tə tsa hara ni, tsa akwa nca halər ruta ka tsiyari akwa nca mburu, ka jikamnya ata kəra Hyel.”