Read bura-pabir Ayuba 36 Bible Online

Ayuba 36 - bura-pabir bible

Ayuba 36

¹Antə Elihu ləkəma ka pəla,

²“Jaktə mbwi ɗəffa ga ali raka kəi ngkərɓəla ala gə su, kamnyar I tsu ka su tə I ata pəla ala ga ata vəya Hyel.

³I ata gari ala ga atar səndə su tə I kəgari, antə I ata gari ni akwa laku tə ga ata nggaɓəlari. Tsuwa jirkurərna ni thlata akəla mdə na alaktə ra.

⁴Kamnyar jirkur swakti antə I ata pəla ala ga, aɗi thlandər wa, tsa nghyinghyari ka sənda ar mdə na adzə ngə ni.

⁵“Jiri, Hyel ka duna swaiswai, amma wala apani tsa aɗi ana rutə mdə wa, tsa ka dunar kuthlikur ka sənda japu.

⁶Tsa aɗi ana zhar mji na ɗimi ka da fəi wa, amma tsa ana hamta su tə kalkal ka mjir bwani wuta.

⁷Tsa ana wulwul mji na ana hara su kalkal, ka haptə ɗa, ka na ɗa dəkəl kuthlikur, apa kuthlyayeri ba saka madi.

⁸Antə wala ma mdə ku pu məsəsal akwa səla ɗa, ka ngkau ɗa akwa səwur bwani apa mafayeri,

⁹tsa ata ncaɓəla ala ɗa su tə da hara, abbər da ku hara biku, ka hara su ka gaya.

¹⁰Tsa ana ndəkər thləma ɗa ka tsaktə ɗa abbər ka da zhar hara su na ɗimi.

¹¹Antə ma da ku psi thləm alari ka nu ni akwa shanga su, da ata kuri səm far ɗa akwa msərakur ka ncir wutə su.

¹²Amma ma da ku nggəlari, mda ata kurəmta ɗa, antə da ata mta kamnyar mdlangkurər ɗa.

¹³Mji na kula thlivər Hyel akwa ɗəffa ɗa ana hir ndzi ka ɗəffə ɓzəɓza, antə wala ma mda akwa ɗi ɗa, da aɗi ana tuwa dlar wa.

¹⁴Da ana mta akwa ngkyarkurər ɗa, ka kuri ndzəndziyir ɗa akwa sur səli.

¹⁵Hyel ana thlipə su aka mji atar zhar ɗa ka da ɗar bwani, tsa ana kəthlər ka bwani kamnyar ka tsa kəlar nca ɗa.

¹⁶Hyel ku ndəkərɓəla nga akwa bwani, ka səntə nga akwa vəi ngga msəra ka msərmsərkur, susəma na msəra ta shang antə mda ata tsaptari akwa vəi səm susəmər nga.

¹⁷“Kulini mda akwa ɗi nga ka su tə kalkal ka mdə hara mji na kəmanggar. Amma ga aɗiya damitədzə wa, kamnyar mda ata hara shariyar jirkur ata kəra ga.

¹⁸Ga aɗiya hir ka gəna ndəkərtə hangkala gə wa, wala zhar ka sur dzəɓə mnya hilantə nga, ka namtə ngə mdər biku wa.

¹⁹Gənar nga amzhi ndəkəmta nga ka bwani wa, shanga duna tə gə kəgari amzhi dlar ngə wa.

²⁰Ga aɗiya ngguka abbər ka viri hara wa, kamnyar an sakatə mji ana mta.

²¹Ka gə hara hangkal ta ga ajaktə ngka akwa hara ɗimikur, natə kamnyar ni antə ga akwa ɗar bwani ngəni ni.

²²Ngga ja, Hyel ka səli na ol ka duna! Maləm aɗi na ola apa tsa wa.

²³Mda aɗi na ata nca alari lakur hara su wa, wala nggəl ni abbər tsa ku hara su na ɗimi wa.

²⁴“Ka gə ɗangtə hu Hyel kamnyar su tə tsa hara, suayeri tə mji ana hu ni ata kər.

²⁵Shanga mji ku wutə suayeri ngəni, amma da akwa wulari cijuwa.

²⁶Jiri, Hyel ku hara olta mburu amzhi nggaɓəla ni, wala mzhi səndə hangkur məvari.

²⁷Tsa ana ndəkərtə yimi duku duku ka tsapta amtazi, ka namtə ni ka yimərhyel na ata təra,

²⁸ka vu ka dlambayeri ni tər yimi aka mji, ka waskəi nggatə msərakurari.

²⁹Mda aɗi na asəndə laku tə dlambayeri ana mwa akwa ya, wala laku tə dlərərhyel ana mwa amtazi akwa vəi tə Hyel ata?

³⁰Tsa ana vu ka wurkərni dlarhə shanga vəi na kalaktə ni, amma tsa ana zhar kira manda tsu akwa kuthlu.

³¹Kamnyar atar suayeri ngəni ol'ol ni, antə tsa ana ndlantə mji, atar apani antə tsa ana hamta ala ɗa susəm hang.

³²Tsa ana ngkəi wurkə ni akwa tsiyari, ka thlentə ni ka tsa pthli su tə tsa vəi.

³³Kuraka tsa surni ana ɗangta aka mji ata kəra bwarbwarkur ɗəffari, wala thla ana sənda abbər shambar yimi akwa si.”