Read bura-pabir Ayuba 37 Bible Online

Ayuba 37 - bura-pabir bible

Ayuba 37

¹“Shambar yimi ana nthlə hyali, ka shangguri fəla.

²Psi gir thləma giri ka hangkal aka dlərər Hyel, aka kurakari na akwa mpa su ka thlivərantə mdə ni.

³Tsa ana vu ka wurkə mbəlantə shanga kutahyel, ka shanga kuɗəma ar duniya.

⁴Aghəla wurkə ni antə tsa ana dləra ka kurakər kuthlikur, sakatə wurkə ni tsu akwa hara.

⁵Hyel ana dləra ka kuraku na ola na ata ndatə mda, tsa ana hara suayeri na ol'ola tə mburu amzhi nggaɓəlari wa.

⁶Tsa ana tsawa aka handzəkəla abbər ka da pughəidzi akwa duniya, ka pəla aka yimərhyel ka tsa təra.

⁷Tsa ana thləthlatə ka shanga kəthlərər kəlara mda, ka mji sənda abbər tsa ka dunar hara shanga su tə tsa hira.

⁸Tsa ana vu ka mwaɓi mtakə ngka akwa kur ɗa, ka ndzəndzi anda har ka shambar na mwavər təramta.

⁹Tsa ana vu ka shambar yimi thlata akwa bwar anəm, ka shambar na mtathlaku thlata abwar yala.

¹⁰Mpikər Hyel ana mtathləmta zərkayeri ka da ndzi ləɗəɗu, ka mtathləmta yimi ka tsa ndzi ɓəɓal apa handzəkəla.

¹¹Tsa ana nghyantə zhimaru ka yimi ka wurka, ka thlentə ɗa ata kəma duku akwa kəlara vəi.

¹²Antə dlambayeri ni ana kawartə ka kawartə kəra duniya, apatə tsa ɗəmha ala ɗa, kamnyar hara shanga su tə tsa tsawa ala ɗa ata kəra duniya ni.

¹³Hyel ana vu ka yimərhyel təra ka ləɓantə di, saka laga kamnyar ɗi mburu, saka laga tsuwa kamnyar ncantə hirkurərni.

¹⁴“Səntə hangkala ga, Ayuba, kara dzama ata kəra surndatayeri tə Hyel ana hara.

¹⁵Ga asəndə laku tə Hyel ana ngkəkahə dlamba ka shambar akwa ya, ka vu ka wurkə səɓəla akwa dlamba ni?

¹⁶Ga asəndə laku tə Hyel pwi dlambayeri ka da mwa ata hyel akwa ya? Tsa ana hara kəthlərayeri na ata ndatə mda, kamnyar tsa asəndə shanga su karkar.

¹⁷Ga asəndə su na hara tə ga ana fa vəi gərgər akwa ləptər nga, wala sakatə shambar bwar anəm ku mtathli di ni ya?

¹⁸Ga ata mzhi dlar Hyel akwa pəbəlar vəi na amtazi, ka tsa ndzi ka duna apa kutəram liya tə mdə fatəɓəla ya?

¹⁹Thlipa ala yeru su tə ka yeru pəla aka Hyel, kamnyar yeru mdlang, su aɗi tə yeru asəndə ka mzhi pəla alari wa.

²⁰I aɗi akwa bara ka mdə kəta abbər I akwa bara gari ka tsa wa diya! I an ata bara ka Hyel tsi ra ya?

²¹Nggədza ma mda aɗi na ata mzhi wul pci, sakatə tsa akwa mbəl dzau ka fəi nca mda, sakatə shambar ku famta dlambayeri kazhar nca hyel wa.

²²Hyel ata səɓəla akwa bwar yala ka səliyirni olta ɓɗakkur mbələr dinar, hahari ka ləptər kuthlikur na ata thlivərantə mda.

²³Dunar Hyel ni ol kamta, antə mburu amzhi si adzə ni wa, tsa ana hara ala mburu su na kalkal ka jirkur.

²⁴Kamnyar ngəni mji ana thlivər ni, tsa aɗi damitədzi ka mjir namtə kərɗa apa mji na ɗəɗu ni wa.”