Read bura-pabir Ayuba 38 Bible Online

Ayuba 38 - bura-pabir bible

Ayuba 38

¹Antə MTHLAKU hamta amsa aka Ayuba akwa shambar yimi.

²“Ngəni wa ri an akwa hilantə su tə mdə ɗəmha ka ndərayeri na caku caku ni?

³Dzahədzi apa mdə sal, kamnyar I ata yu nga, ka gə hamta ali amsari.

⁴Ga ama ri sakatə I akwa nci səla duniya? Pəla ali, ma ga asənda.

⁵Wan ɗəmhə olkurərni ri, ka baukurərni, ka saɓəlkurərni ri? Ga asəndə mdə na ndərar səwu ka ngkərɓəla olkurərni ni ya?

⁶Ata mi antə I nci səla duniya ni ata ri? Tsuwa wan nci pelar kuɗəmari,

⁷sakatə dzardzarayeri baɗitə hara ha, tə mjirthlentərhyel kəli yarali nə ri?

⁸“Wan dzəɓtə nyarmbwar mandayeri, sakatə tsa tsaɓəla kərni akwa di nə ri?

⁹I an pərwa manda ni akwa barkwar dlambayeri, ka ɗuwar ni akwa ɗuzə na kəkəsu.

¹⁰I an thlamta alari kəla vəi tə tsa ata ɓəlta ata, ka dzəkatə ni ka tsau bwaltəu akwa nyarmbwari.

¹¹Antə I pəla alari, ‘Azi an vəi ɓəltər nga, ga aɗiya kəl səla ga azi wa! Azi antə hwiyir nga na ka ufti ni ata ɓəlta.’

¹²Ayuba, akwa ndzəndziyir nga ga ku ɗar tsawa abbər ka vir kura ka pci səɓəla ya?

¹³Ga ku tsawa aka pci ka tsa tamtə mnya duniya, ka ɓuɓəla mji na ɗimi akwa vəi ɗuwardzər ɗa ya?

¹⁴Atar səyir parakəu antə mda ana nggaɓəla dludzər duniya ni, apa həi tə mdə ntsari ka seɗar tsiya kuthlikur, tə mdə pali ni tə tsa ndzi apa ləptər dəɓa.

¹⁵Parakər pci ana damitə mji na ɗimi akwa hara kəthlərər ɗa, ka ngkatə ɗa ta da ahara ɗimikur.

¹⁶“Ayuba, ga ku ɗar ləghəi akwa vəi səɓəlar yimər manda na ola, wala mwa ata kutari ka wulɓəla su na akwa ya?

¹⁷Ga ku ɗar wutə nyarfur duniyar mji mtəmtə ya, nyarfur vəi tə kuthlu an harta?

¹⁸Ga asəndə baukur ka olkur duniya ya? Pəla ali ma ga asənda.”

¹⁹“Ga asəndə vəi tə parakə ni thlata akwa, ka vəi tə kuthlu ana ndzəndzi akwa ya?

²⁰Ga asəndə laku tə da ana nuwa har ka gə mzhi pwar ɗa ka mwantə ɗa avəi ya?

²¹Ga asəndə su nayeri ni, kamnyar sakanda ai ga aɗi! Jiri, ga ku fəi akwa duniya ni!”

²²“Ga ku ɗar ləkwa mbwar pwi handzəkəla, wala ɗar wutə mbwar pwi ɗa ya?

²³I ana pwi ɗa kamnyar sakar bwani, kamnyar sakar dləra ka sakar mpa.

²⁴Laku madi an ata mwantə mda akwa vəi thlatər pci ri, wala vəi tə shambar bwar raghəi ana baɗitə fya akwa ri?

²⁵“Wan kəlar laku aka dlərər hyel, ka thluhwi lakur səghəyir yimərhyel ri?

²⁶Wa andər hamta yimi ba akwa mtakəu, vəi tə mji aɗi akwa ni wa ri?

²⁷Wa andər hamta yimi aka di ul'ula na ka thləli, kamnyar ka di ləɓa ka ptsantə kusar ri?

²⁸Yimərhyel ka baba ya, nənga mda aɗi na ya kəlangkə ri?

²⁹Kuta mwala madi an ya handzəkəla ri? Tsuwa wan ya kəlangkə na ana təri nə ri?

³⁰Yimi ana ngkaɓtədzi ka ndzi ɓəɓal apa pela, ka mtathləmta kəra yimi.

³¹“Ga ata mzhi mbwamta mambəlkulcayeri ka səwu ya, nənga ga ata mzhi mpələmta səwu tə mdə mbwamta sasəlkayeri ni kəgari ri?

³²Ga ata mzhi tsawa aka sasəlkayeri sakatə kalkal ka da səɓəla ya, wala ncantə laku aka sasəlka natə mda ana kəga thləmari Tənvwa kəga maɗa'ni nə ri?

³³Ga asəndə tsawayeri na ana mwa ka vəi na amtazi ya? Ga ata mzhi kəthlər ka tsawayeri ndaga ata kəra duniya ya?”

³⁴“Ga ata mzhi haptə kuraka ga aka dlambayeri ka tsawa ala ɗa ka da pughəi yimi na ata ləɓantə ngə ya?

³⁵Ga ata mzhi thlentə wurkayeri ka da ra tsa su, har ka da si ka pəla, ‘Yeru ku mwari ka ngka’ ya?

³⁶Wan na ɗəɗukurər tər yimi aka dlamba, ka ncantə lakur səɓəla aka kəlangkə nə ri?

³⁷Wan ka ɗəɗukurər jikatə dlambayeri ri? Wan ata mzhi mbumbwi gəlamayeri na amtazi ka yimi səghəi,

³⁸sakatə bərbər ana hərtədzi ata kəma duku, ka ndzi maɓu na ata bartə nvwa ɗa ri?”

³⁹“Ga ata mzhi ra bara susəma aka mwala tsəngi ya, wala mzhi ndlantə maɗa'ni na ka məi,

⁴⁰sakatə da akwa shukti akwa kur ɗa, wala sakatə da ɗuwardzi akwa dlədləku kamnyar thla mwaɓi ya?

⁴¹Wa andər hamta susəma aka zəlakayeri, sakatə da akwa kadlə ka mi akwa pakə susəma, sakatə maɗa'ni akwa tuwa aka Hyel nə ri?”