Read bura-pabir Ayuba 39 Bible Online

Ayuba 39 - bura-pabir bible

Ayuba 39

¹“Ga asəndə sakatə kwi kərgar ana ya ya? Ga ana wutə sakatə mwi ana ya ya?

²Ga asəndə hangkur thliya tə da ana hara ka hur ya? Tsuwa ga səndə sakatə da ana ya akwa ya?

³Ga asəndə sakatə da ana nggyarghəidzi ata di, ka yaɓəla maɗa' ɗa ya?

⁴Maɗa' ɗa ana kəla ata bəbal akwa mtakəu ka ndzi ɓəɓal, da ana təra kazhar məma' ɗa kula jaktə ngka adzə ɗa.

⁵“Wan hamta msərmsərkur aka kwaramtaku nə ri? Wan mpəli ɗa, ka zhar ɗa ka da kadlə kəlara vəi nə ri?

⁶I ya an hamta ala ɗa mtakə na kula mji ka da ndzəndzi akwa ni, vəi una tə mda aɗi ana thləka wa,

⁷Da aɗi ana hir kuraka mjir kutadi wa, da aɗi ata nggatə kuraka mdər ɗi ɗa ka kukul ka da wa.

⁸Garayeri an vəi ɓəla arɗa na ka susəma hang, antə da ana carcar kusar mirakəu tə da ata ɓɗari.

⁹“Gyal thla mtakəu aɗi na ata hir kəthlər ala gə ya? Tsa ata hir kələngkər ka tsa pi akwa mbwar taku ya?

¹⁰Ga ata mzhi mbwau alari səwa ka vu ni ka tsa kukul ya? Tsa ata hir kukula ala gə fakər ngə ya?

¹¹Ga ata mzhi vəkər ka tsa kamnyar duna tə tsa kəgari, har ka gə zhar ni ka tsa hara ala gə kəthlər na mwavər ya?

¹²Ga ata mzhi mbərsa abbər tsa ata hir mwari ka ngka, abbər ka tsa ra səvəi ala gə ka sur fakər ngə na ata lali ya?

¹³“Zhimnaku ana ɓu ɓəɓəkari ka gaya, amma mda agira shishir ɓəɓəkari ka ar shaduwar wa.

¹⁴Kamnyar zhimnaku ana psə thlithlirni ata di, ka zhari aka bərbər ka tsan təlanta.

¹⁵Tsa fwari abbər səla mda ata mzhi jaɓumta ɗa, wala nuhum mwaɓi mtakəu laga asə ntsarəmta ɗa.

¹⁶Tsa ana hara kəmanggarkur aka maɗa'ni apa da aɗi maɗa'ni wa, tsa aɗi damitədzi abbər ghərərni ni ata ndzi gapani wa.

¹⁷Su ngəni hara ni kamnyar I aɗi hamta alari ɗəɗukur wa, tsuwa I aɗi hamta alari kər ar nggaɓəla su wa.

¹⁸Kəlara sakatə tsa thlata abbər tsa ata hwi, tsa ana dlu kəma akəla taku ka mdər fəlari ka kumshi ɗa.

¹⁹“Ayuba, ga an hamta duna aka taku ni ya, nənga gan hartə wulyari ka shishi na ɓɗaku nə ri?

²⁰Gan namtə ni ka tsa fəlfəla apa hawa, ka kurakər tuwarni thlivərantə mji ni ya?

²¹Tsa ana la di ka mpəlari akwa ngga msərakur dunari, sakatə ɗəffari ku mbwi tə tsa ata ləkwa mpa.

²²Tsa aɗi ana thlivər wala raka wa, antə su aɗi na ana fəi dunari wa, katsakar aɗi ana thlivərantə ni ka tsa ngka ka bwahili wa.

²³Afayeri ana tsa kərɗa ka kuraku ata kərari, mwasu ka gali na ana mbəlmbəla akəmari.

²⁴Sakatə ɗəffari ku mbwi tə dzari ku ləkwa kədza, tsa ata pthli hwi ka ləkəma, tsa amzhi nggatə kuraka təmbəl ka thləthlatə tsəkəm wa.

²⁵Kəlara sakatə mdə ku mbur təmbəl, taku ni ana amsa ka kuraku, tsa ana mzhi kəl shiwur mpa təng tə tsa tsu ciju, ka nggatə su tə mji ol'olər mpa arɗa akwa tsawa ala ɗa.

²⁶“Gan thlipə ɗəɗukur fəla ata hyel aka kadapu, ka tsa kəlar ɓəɓəkayerari ka fəla təbwar anəm nə ya?

²⁷Gan tsawa aka duku ka tsa lətə kərgar, ka latə mbwarni amta ni ya?

²⁸Tsa ana latə mbwarni ata kəra pela na nal ta shang, ka namtə jikwara gar ni vəi ɗuwardzərni.

²⁹Amta anda antə tsa ana nggwar susəmayeri arni, na ata təramta ciju ata di ka tsa ngkəi.

³⁰Maɗa' kutəkcivəi ana tsaptədzi adzə mshiyir mwaɓi ni ka da sa mamshari, antə kəlara vəi tə mshiyir mwaɓi ata, ga ata wutə kutəkcivəi anda.”