Read bura-pabir Ayuba 40 Bible Online

Ayuba 40 - bura-pabir bible

Ayuba 40

¹Antə MTHLAKU ləkəma ka pəla aka Ayuba,

²“Mdər bara pungkər biku aka na aka Duna ta Shang ni, ata mzhi kampiku ka tsa ya? Kəlara mdə na akwa beɗi ka tsa, ka tsa hamta amsa.”

³Antə Ayuba shinau aka MTHLAKU abbər,

⁴“I mə laga ri tə I ata mzhi shinau ala ga? I ata dləɓ səri, I aɗi ata ndər kəra wa.

⁵I ku kəɗar mnya ka ghəra, antə I aɗi ka su tə I ata jaktə pəlari wa.”

⁶Antə MTHLAKU pəla akwa kəwal aka Ayuba, abbər,

⁷“Dzahədzi apa mdə sal, kamnyar I ata yu nga, antə dwali kara hamta amsari.

⁸Har ga akwa bara pəla abbər I an ka biku ni ya? Ga ata pəla I an ka biku, kamnyar ka mdə pəla abbər ga an ka jiri ya?

⁹Gə ɓəɓal apa i'i ya, ga ata mzhi dlər ka kuraku apa i'i ya?

¹⁰“Ma an apani ja, ncanta abbər gə mdə ola na ka səli, ka ra dəɓatədzi ka ləptər olkur.

¹¹Ncanta aka mji abbər ɗəffa gə ku ɓzi, pumta ɗəffə bwarbwarkurər nga ata kəra mjir gaya, kara kəli səliyir ɗa.

¹²Kəlara mdə na ka kər olkur tə gə wuta, kara kəli səliyirni, kara hadləmta shanga mji na kəmanggar tsu ata vəyari.

¹³Harəmta ɗa shang ata kəma duku, kara mbwamta ɗa akwa duniyar mji mtəmta.

¹⁴Antə wala I ma I ata hu nga, abbər gə ka dunar mbantə kəra ga.

¹⁵“Wul lagha na ol ka duna, natə I namtə ni tsu apatə I namtə nga, təng kusar antə tsa ana ɓɗa apa thla.

¹⁶Wul jili duna tə tsa kəgari, dunari an akwa kumər yimər kutari.

¹⁷Tsa ana thlentə kurari dwaɗu apa nfur seda, bwangayerari ka pərɗayeri na ɓəɓal ɓəɓal ka duna.

¹⁸Ɗethlərni ɓəɓal apa zwalər əmza, kiɗayerari ɓəɓal ɓəɓal apa zwalər liya mənggəl.

¹⁹“Tsa an mwaɓi na ntangkəma tə I namta, tar I na nam ni an ka dunar tsi ni.

²⁰Kamnyar tsa ana səm susəmərni akwa garayeri, sakatə mambila mwaɓiyayeri na adzə ni akwa gyali.

²¹Tsa ana pəpəi akwa shanggurər nfur mtəhəra, ka ɗuwardzi ata mnya zərkəu akwa kusar duwathlu.

²²Nfur thlali ana hartə ni, nfur mnya zərku andər kalaktə ni.

²³Antə wala sakatə zərkə ni ku nghyi akwa tsa kərni tsa aɗi ata thlivər wa, wala Jodan an akwa nghyi ka puɓəla tsa aɗi ata thlivər wa.

²⁴Ga ata mzhi hartə ncari ka ngkəi ni ya? Ga ata mzhi ngkəi ni ka anggilku ka ntuləmta kucirari ya?”