Read bura-pabir Ayuba 41 Bible Online

Ayuba 41 - bura-pabir bible

Ayuba 41

¹Ga ata mzhi ngkəi Leviyathlan ka anggilku, wala mbwahə mnyari ka səwu ya?

²Ga ata mzhi mbwau səwa akwa kucirari, wala vu anggilku akwa mnyari ya?

³Tsa ata hir kiɗə nga ka gə psi ni, wala gari na msəra ala ga, kamnyar kara kətadzə ni ya?

⁴Tsa ata hir mbwi alkawal ka hara kəthlər mafakur ala gə ba saka madi ya?

⁵Ga ata mzhi namtə ni apa ɗika, ka maɗa' kutakəyir ngə na maɗangkwi gyal ka tsa ya?

⁶Mjir ngka kəlfa ata mzhi beɗi ata kəra masərni ya? Mjir fəli ata mzhi thləthlau ni ka ɗələmta ya?

⁷Ga ata mzhi nghyantə kəsəmərni ka afər shi kəlfa, wala dəkəi kərari ka mwasər ngka kəlfa ya?

⁸Ma gə ku tsəkwar ni ka pal, ga aɗi ata fwari mpari wa, antə ga aɗi ata jaktari kəra wa.

⁹Kəlara mdə na ku wutə Leviyathlan ni ka ncari, dzari ata mta antə tsa ata ndla.

¹⁰Antə təng tə mda aɗi na mwavər na ata nggitə thlentə hangkalari wa, wan ata nggitə bara mparni ri?

¹¹Wan an akwa nu ra təmbəl su laga tə dwali kəi nta alari ri, təng tə shanga su na akwa duniya ni arna?

¹²“I aɗi ata dləɓ səri ata kəra kiɗa Leviyathlan ni wa, wala ata kəra dunari, wala ɓɗakkur dzari wa.

¹³Wan ata mzhi fəi kəsəmərni na ɓəɓal ni, wala mzhi ntsəvəi hila kumər dzari na ka bwa suɗə nə ri?

¹⁴Wan ka dunar vu ni ka tsa kəlar mnyari, na nghyinghyari ka thlir na ata thlivərantə mdə nə ri?

¹⁵Hilari an tsatsari ka suayeri laga na kəkəsu apa partau, hahari kudzəhkudzəha dləɓdləɓari ata dzari.

¹⁶Kəlara pal ku ndlətədzi rip ka nvwa ni, natə shambar amzhi təramta akwa daɓwa ɗa wa.

¹⁷Mdə tsatə ɗa kudzəhkudzəha natə sur mzhi ndəkəmta daɓwa ɗa aɗi wa.

¹⁸“Kəlara sakatə tsa ku wacəhəi parakəu ana səɓəla, tsuwa ncari ana ndzi ghəngnga apa pcir balti.

¹⁹U'u ana səɓəla akwa mnyari apa u'ur zafu, ka mambəl u'u fəgəlɓəla.

²⁰Ɗer ana səɓəla akwa kucirari, apa ɗer ar tughum na akwa mbwa ata u'u.

²¹Shambar mpikərni ana mbatə u'ur vina, tsuwa kyanggyara u'u ana fəlɓəla akwa mnyari.

²²“Wulya Leviyathlan ni ɓəɓal ka duna antə shanga mji na ku kəɓa ka tsa ana yakata.

²³Kumər dzari an pakpakari ata kəma duku, dləɓdləɓari ɓəɓal apa mdə fatəfatə ɗa ata dzari.

²⁴Ɗəffari ɓəɓal apa pela, ɓəɓal ka duna apa pela' bur.

²⁵Kəlara sakatə tsa ku thlatə wala haptayeri ana thlivər ka ɓəgəlwadzi.

²⁶Katsakar aɗi na amzhi thli ni wa, mwasu wala janggum wala gali aɗi na amzhi ntsəvəi ni wa.

²⁷Tsa namtə liya mənggəl apa kusar, ka namtə əmza apa udzəm hiɗahiɗa.

²⁸Afa aɗi na amzhi vu ni ka tsa hwi wa, pela' mavinding ndzi alari apa buɗər kusar.

²⁹Su aɗi tə zwal amzhi hara alari wa, da ndzi alari apa kusar, tsa ana kumshi mji na ana thləl ni ka mwasayeri.

³⁰Bwatəlayeri na ata yimərkutari ata səma apa mnya hangdlya, ma tsa akwa mwa da ana thləthla maɓu apa sur dəkə mthli na ka thlir.

³¹“Leviyathlan ana nggurtə kira yimi ka tsa ndzi apa tsa akwa mbwa, tsa ana namtə manda ka tsa mbu apa tughum mal.

³²Tsa ana zhar bwahilari ka lakur yimi akwa mbəlmbəla, ka hartə kəra yimi ni ka mbur yimi shalak mwapu.

³³Akwa duniya ni, su aɗi tə mda agira ni ka tsa wa, su na ka mpika na kula thlivəra apa tsa aɗi wa.

³⁴Tsa ana rutə shanga mwaɓiyayeri na olta tsa, ka ndzi apa kuthlir shanga mwaɓi mtakəu.”