Read bura-pabir Ayuba 42 Bible Online

Ayuba 42 - bura-pabir bible

Ayuba 42

¹Antə Ayuba shinau aka MTHLAKU abbər,

²“I asənda abbər gə ka dunar hara shanga su, natə su aɗi na amzhi sharəmta su tə ga ku ɗəmhə wa.

³Ga ku yu ra abbər kamnyar mə tə I akwa yu su ata kəra ɗəɗukurər ngə ri? I akwa pəla suayeri natə I aɗi səndə wa, surndatayeri na ku təra kərathla nggaɓəla su arna.

⁴Ga ku pəla ali kəi psi thləm ma sakatə ga akwa gari, kəi hamta amsar suayeri tə ga ata yuwari.

⁵Akwa saka na təramta I ana nggatə su ata kəra ga ka thləm daci, amma kulini I ku wutə nga ka nci.

⁶Apani I akwa ngga səliyir shanga su tə I pəla, antə I akwa tubi ala ga, ka pungkər bərbər ka pənju ata kəri.”

⁷Aghəla tə MTHLAKU ku kuri gari aka Ayuba, antə tsa pəla aka Elifaz na mdər Teman, “Ɗəffi ku ɓzi adzə nga ka pazhayeri ar nga na suɗə ni, kamnyar giri aɗi pəla jirkur ata kəri apatə buɗarna Ayuba ku hara wa.

⁸Antə kulini ka giri fatə gyal murfa ka gam murfa ka giri mwari adzə buɗarna Ayuba, ka giri hamta ɗa saɗaka kamnyar kər giri. Ayuba ata hara adduwa kamnyar giri, antə I ata dlu adduwarni. Apani I aɗi ata ɗi giri kalkal ka ɗimikur giri wa. I ata ɗi giri kamnyar giri aɗi pəla jirkur ata kəri apatə buɗarna Ayuba ku hara wa.”

⁹Antə Elifaz na mdər Teman, ka Bildad na mdər Shuwa, ka Zofar na mdər Naamath ku mwari adzə Ayuba, ka hara apatə MTHLAKU ku pəla ala ɗa, antə MTHLAKU ku nggatə adduwar Ayuba.

¹⁰Aghəla tə Ayuba ku hara adduwa kamnyar pazhayeri arni, antə MTHLAKU ku jaktə ngka alari ka shanga gənarni. MTHLAKU ku hamta alari shanga su tə tsa kəgari waci ka bwa suɗa.

¹¹Antə shanga maɗa'mani shili ka mwanki ka shanga pazhayeri arni na waci ku sə thlawar ni. Antə da səm susəmər kucali ka tsa avəyarngkiɗa. Da thlawarni ka shiktə ni ata kəra shanga bwaniyayeri tə MTHLAKU ku sənta ata kərari, antə kəlara mdə ku hamta alari kwaba ka lenduwar dinar.

¹²Apani MTHLAKU ku vədzə barka aka Ayuba ka təramta na sakanda. Antə Ayuba ku ndzi mthlakər təma dəpu kumnya nfwar, ka dləkəmau dəpu ngkwa, ka thlar kukula dəpu suɗa, ka kwara dəpu pal.

¹³Tsuwa Ayuba ku wutə maɗashili murfa ka maɗangkwi makər.

¹⁴Thləma ngkwarni na olta shang an Yemima, na suɗkur an Keziya, ka gajir ɗa Keren Happuk.

¹⁵Antə akwa shanga tsəɗi ni maɗangkwi aɗi na ɓɗakɓɗaku apa maɗa' Ayuba wa. Antə baba' ɗa ku hamta ala ɗa kifa apatə tsa hamta aka maɗa'shili ni.

¹⁶Antə aghəla nda Ayuba ku jaktə hara məva aru ka nfwarkumari. Tsa ku fəi ka wutə kəkayeri arni, ka kəka humba, ka kəka ɓunji ka kəka pənju, zamanayeri zumzum nfwar.

¹⁷Antə aghəla nda Ayuba ku mti akwa sakatə tsa ku hal ka hali.