Read bura-pabir Ayuba 5 Bible Online

Ayuba 5 - bura-pabir bible

Ayuba 5

¹“Kulini wala ga an kəga, mda aɗi na ata amsa ala gə ya? Nənga akwa nca mdərthlentərhyel ni, madi akwa nca ɗa ni an ata dlar ngə ri?

²Jiri dzama ka ɗəffə ɓzəɓza ana tsi caku, tsuwa səlka ana tsi bəlkəu.

³I ku wutə caku na kəta abbər tsa aɗi ku hara səl, amma təkəma təng asar si ata kəra kutakəyirni.

⁴Parang maɗa'ni akwa ndzi akwa asar, mda ata kurəmta ɗa akwa nyarfu, kula mdər mbuli ɗa.

⁵Mji na ka mi an ata sə səməmnya sur fakərni, wala mthli na kəla akwa mtəhəra, antə mji na mbulam an ata sə famnya gənarni.

⁶Kamnyar asar aɗi ana wutə mdə gapani wa, tsuwa bwani aɗi ana ptsa akwa di apa kusar wa.

⁷Awa, ai mdə ka kərari surni andər hara ka bwani wutə ni, tsu apatə hwashim ana fəl akwa u'u ka ləmta.

⁸Ma I an apa ga, I ata bara Hyel, kəi hamta tuwarna alari.

⁹Kamnyar tsa ana hara suayeri na ol'ola na mwavər ka mdə nggaɓəla, surndatayeri tə mda amzhi jikatari wa.

¹⁰Tsa andər hamta yimi akwa duniya, ka thlentə yimi akwa mtakəu,

¹¹Tsa andər haptə mji na ka kanaɗikur, ka hamta kucali aka mji na akwa tuwa.

¹²Tsa ana sharəmta shanga su tə mji na wuyim ɗəmha, ka vu ɗa ghər gapani.

¹³Tsa ana ngkəgəi mji na ɗəɗu akwa kwasherikurər ɗa, tə shanga su tə da ɗəmha aɗi ana kəl kər wa.

¹⁴Da ana kəɓa ka kuthlu təpci, tə wala kərathlər pci da ata tətəm su apa aviri.

¹⁵Amma tsa na msərantə mjir bwani akwa tsiya mji na ɗimi, ka msərantə mji na ka tura akwa tsiya mji na ka kuthlikur.

¹⁶Apani antə mjir tursu ata mzhi vəkər ka su, ka mji na kula jirkur dləɓ səri.

¹⁷“Amma msəra aka mdə tə Hyel ana mnya alari! Apani ga aɗiya rutə ɗir Hyel na ka Duna ta Shang wa.

¹⁸Kamnyar tsa ana hara mbəlkəu aka mda, amma tsu tsa andər mbwiyari. Tsa andər dəkəi mda, amma tsu tsa an ata kuri mbəlkari.

¹⁹Wala ma asar an ata si ata kəra ga ka ngkwa, wala an ka murfa, Hyel ata ngkamta ɗa ta da atsəkwar nga.

²⁰Wala akwa sakar mi, tsa ata suri nga ta mta, akwa mpa tsuwa tsa ata ngkatə ta mda atsi nga.

²¹Hyel ata ngkamta ta mda amnya ɗimi ata kəra ga, wala asar an akwa si ata kəra ga, ga aɗi ata thlivər wa.

²²Wala ma asar ka mi ata si ata kəra ga, ga ata kumshi ɗa, tsuwa ga aɗi ata thlivər mwaɓi mtakəu wa.

²³Fakayeri ar nga aɗi ata ndzi ka pelayeri na ɗimi wa, tsuwa mwaɓi mtakəu aɗi ata mpa ngə wa.

²⁴Apani ga ata ndzi lapiya avəyarngkiri. Ma gə ra wulhə ciɓər nga, ga ata wuta abbər wala duku aɗi sha wa.

²⁵Tsuwa ga ata sə ndzi ka maɗangkyar hang, kəkayeri ar nga ata ndzi hang apa kusar na ana ptsə kəlara vəi.

²⁶Ga ata sə zhar duniya akwa sakatə ga ku hali, tsu apatə alkama ana ng'ha kambəla mdə thla ni.

²⁷Ayuba, yeru ku pu nca yeru akwa su ni, ka wuta abbər su apani ana hara jiri. Antə tar gə dlu sauri ni, kara hara kəthlər kəgari”