Read bura-pabir Ayuba 6 Bible Online

Ayuba 6 - bura-pabir bible

Ayuba 6

¹Antə Ayuba pəla,

²“Ma mda an ata ngkərtə kəgəɓkur ar ɗəffə ɓzəɓzəkurərna ka bwaniyirna ata səkel,

³da ata ndzi kəgəɓu ta shanga wuyakər mnya manda! An su na hara tə ga akwa wula apa I akwa gari kula kər ni.

⁴Kamnyar Hyel ku shu afər bwani akwa dzi, antə gwarər afə ni akwa dlarhə dzi. Hyel ku ɗəmhə ka asarayeri ni nu ra ata ata.

⁵“Aɗi kalkal kəi jikamnya wa ya? Kwaramtaku ana tuwa sakatə tsa ka kusar ya? Tsuwa gyal ana tuwa ata kəra buktər ya?

⁶Mda ana səm səkwar na ləmtər kula un ya? Su aɗi na msəra akwa yimər thlithli hadlu tə mdə jaɓumta ya?

⁷I aɗi akwa ngguk jili susəm ngəni wa, da ku ndzi apa susəma na ata shar ɗəffi.

⁸“I tura abbər Hyel ata na ali su tə I kiɗa, I bara ka tsa hamta ali su tə I akwa barari.

⁹Abbər ma an ahara ka tsa tsi ra kasha, ka tsa psi tsiyari ka tsa thlamta səwur mpikəi.

¹⁰Parang I ana ɓəla su tə Hyel tsawa ali, antə ma I an ata mta, I ata fəlfəla kamnyar kucali, kula dzama ata kəra dzi na akwa kətə ra, təng tə I ka səndari abbər I aɗi nggəlar, ndərər Na Ɓɗakkarkar ni wa.

¹¹I ata wuta ama duna tə I ata mzhi ləkəma ka nggitari nə ri? Man riɓar tsikəra ndzəndziyirna tə kəi ləkəma ka mbwi ɗəffi nə ri?

¹²Arna mdə nam ra ka pela ya, nənga kumər dzi ni əmzə ri?

¹³Jiri, su aɗi tə I amzhi dlar kərna akwa wa, tsuwa vəi aɗi tə I amzhi wutə dlara akwa wa.

¹⁴“Ɓɗakkurari ka mdə na akwa bwani apani wutə dlara akəla pazhayeri arni, wala ma tsa an ku fwari ata kəra Hyel.

¹⁵Amma ar giri, giri aɗi ka jiri wa, giri ndzi apa zərkə na ana nghyi ka puɓəladzi, apa thlyagha na ana nghya, ka ula afaku.

¹⁶Apa zərkəu na hentədzi kamnyar mtathlakkurərni, kamnyar mtathlakkurər ɗuzə na hartə ni.

¹⁷Amma ma pci ku hara gərgər, da ata wuya ma sakar vəi gərgər ku hara kuta ɗa ata ula.

¹⁸I ndzi apa mjir lənggu ata dləkəmauwayeri, na ku sha ka mta akwa hamada, sakatə da akwa pakə yimər sa.

¹⁹Mjir lənggu na thlata ahar Tema, ku pakə yimi ngəni akwa mtakəu. Mjir lənggu na thlata ahar Sheba tamata abbər da ata wutə yimi ni.

²⁰Amma ɗəffa ɗa ku ɓzi, kamnyar da tamata abbər da ata wutə yimi ni, amma sakatə da si ata vəi ni, təng hamta jirər ɗa kura ata mnya zərku na ul ni.

²¹Ngəni an laku tə giri akwa ali kulini! Giri ku wutə asar tə I akwa, amma təng giri akwa faradzi kamnyar thlivəra.

²²I ku ɗar kiɗə cauta akəla giri ya, wala pəla ka giri hamta sur dzəɓ mnya kamnyar na ri?

²³Nənga I ku ɗar pəla ka giri msərantə ra akwa tsiya dawarna, wala pəla ka giri mbuli ra akwa tsiya mji na akwa ni bwani ya?

²⁴“To, mwa gir ja ka giri thlipa ali! I ata dləɓ səri kəi ngga giri, ncaɓəla gir ali vəi sharna ni. I ata dləɓ səri kəi ngga nga.

²⁵Ndərər jirkur ana kəta! Amma ar giri, man su tə mpar giri ni ata namtari ri?

²⁶Giri ana wuta apa giri ata mzhi mnya aka mdə ya, təng tə giri aɗi akwa wutə bwaniyir mda, natə apa ka ɗəffari ləɓəla ni wa ni?

²⁷Ar giri diya giri ana mzhi ndzəh kuriya wala ata kəra muta, ka hara gəna ata hila pazhayeri ar giri!

²⁸“Kulini wulhə giri ra ɓɗaku bu! Kamnyar jiri I ahir thlandər ala giri wa.

²⁹Zhar giri dzama abbər su aɗi tə I ɓzamtə ni, Zhar giri, kamnyar su aɗi tə I ɓzamtə wa.

³⁰Man su tə I pəla na aɗi kalkal wa nə ri? Apa I amzhi ndəkɓəla daɓwa su na ɓɗaku ka su na ɗimi wa ya?”