Read bura-pabir Ayuba 7 Bible Online

Ayuba 7 - bura-pabir bible

Ayuba 7

¹“Aɗi shanga ndziyir mda akwa duniya ni ndzi apa tsa akwa kəthlər ar dwalikurari wa ya? Tsuwa aɗi shanga ndzəndziyirni ni apa ndziyir lebərakur wa ya?

²Mdə ndzi apa mafa na akwa bara shanggur, apa lebəra na akwa sək watsəɓər kəthlərərni!

³Apani Hyel ku ɗəmha ali kəi hara thliya ata kəra thliya akwa ndzəndzi gapani, tsuwa mdə ku ɗəmha ali abbər parang viri kəi kəɓa ka sur ɓzamtə ɗəffu.

⁴Kəlara sakatə I pəpəi aviri I ana pəla, ‘Nawa tə viri ata kur ali ri?’ Amma təng viri ni ana jakjakə hara saɓəl, antə I ana ghəra akwa shinardzi kwabə viri akura.

⁵Shanga dzi ku hartədzi ka kulamnya ka diɗi, dzi akwa ndəla ka hwi lu.

⁶“Sakarna akwa huvə kur taktar ta shar tsa puwa, har kəi mta kula wutə su tə I mwaɓta.

⁷Ka gə ɗangta abbər mpikəi ndzi tsu apa shambar tə mda ana mpikəɓəla, nci aɗi ata jaktə wutə su na ɓɗaku kəra wa.

⁸Kəlara mdə na akwa wul ra kulini, tsa aɗi ata jaktə wutə ra kəra wa, ga ata sə pakə ra, amma ga aɗi ata jaktə wutə ra kəra wa.

⁹Apatə dlamba ana wuya ka təra, antə mdə na ku mti tsa aɗi ata ngka wa.

¹⁰Tsa aɗi ata ngka avəyarngkiɗa kəra wa, antə wala mjir diyirni ata fwari su ata kərari.

¹¹“Kamnyar ngəni I aɗi ata hartə mnyi wa, dwali kəi mnya kamnyar bwani tə I akwa ɗarari, dwali kəi jikamnya kamnyar ɗəffi akwa ɓzə ka duna.

¹²Ga ana wuta apa I shatan kutayimi ya, wala mwaɓi na ɗimi ar manda laga, tə ga ana vəi mdər səka ata kəri ni?

¹³Wala ma I pəla abbər I ata ra pəpəi kəi ghərəmtaghəra, abbər kəi ɗar fwari ata kəra bwaniyirna ni,

¹⁴təng ga ata thlivərantə ra akwa suni. ka thlentə suayeri na ana nthlə hyali akwa wulsu,

¹⁵har tə I ata pəla mnyar tə I andzi ka mpikə ni, kuji ka mdə ndwaləmta wulyi ka tsi ra.

¹⁶I akwa hir laku tə I akwa wa, I aɗi ata bara ndzi ka mpikə kəra wa. Antə zhar ra daci apani, kamnyar ampaniyir ndziyirna aɗi wa.

¹⁷Mdə mə laga ri, tə har ga ana damitədzi ka tsa ni?

¹⁸Ga ana wul su tə tsa akwa harari tədək ɗəɗəpa, ka ngkərtə ni kəlara saka.

¹⁹Kamnyar mə tə ga afəi nca ga ata iya, ka azhar ra kəi sarar mpikə wa ri?

²⁰Wala I an hara biku ma, man tə I ɓzamta ala giri ri, gə na ana wul kəra mji? Kamnyar mə tə gə vuɓəla ra apani ri? Akwa laku madi tə I ndzi kəla ala gə ri?

²¹Kamnyar mə tə ga amzhi yafitə ra, ka kələmta ali bikərna wa nə ri? Kamnyar aɗi ata fəi wa I ata mta, antə ga ata sə bara ra apa yimi akwa mpəla, amma ga aɗi ata jaktə wutə ra kəra wa.”