Read bura-pabir Ayuba 8 Bible Online

Ayuba 8 - bura-pabir bible

Ayuba 8

¹Antə Bildad na mdər Shuwa shinau alari abbər,

²“Nawa antə ga ata sə zhar jikamnya ngəni ri? Təng ga akwa mnya gapangapani kula suari aɗi.

³Ai Hyel aɗi ana ndwali jirkur wa, na ka Duna ta Shang aɗi ana shinamta su na kalkal wa.

⁴Sakani maɗa' nga an hara alari biku, antə tsa akwa ɗi ɗa kalkal ka bikər ɗa.

⁵Amma ma gə bara Hyel ka jirkur, ka kiɗa akəlari ka tsa kətadzə nga,

⁶ma ga an kəcəkəcari ka jirkur akwa ɗəffa ga, Hyel ata dlar nga, ka ngka ala gə ka msərakur akwa kutakəyir nga.

⁷Antə hangkur gənar ngə na sha ni ata ndzi tingnga adzə su tə ga ata sə wutari akəmazi.

⁸“Yu mji na sa yimi bu, ka gə vədzə hangkala ga, aka su tə kəkayeri arɗa thliptə waci.

⁹Kamnyar ar mburu, mburu naha naha azi, antə su aɗi shang tə mburu səndə wa! Kamnyar mpika mburu akwa duniya ndzi apa shanggur na akwa təramta daci.

¹⁰Jiri, mji na waci ata thlipa ala gə su akwa kutar səndər ɗa da ata thlipta ala gə su.

¹¹“Veng aɗi ana ptsa ata vəi na kula jijaɓu wa, duwathlu aɗi ana kəla akwa vəi na kula yimi wa.

¹²Sakatə da tsu akwa pukdla, tə aɗi kalkal ka mdə nthləmta ɗa wa, da ana tətəɓwa akəmata shanga kusar damwa.

¹³Tsu apani antə mji na fwari ata kəra Hyel ana ndzi, mwaɓər mji na kula thlivər Hyel ana sha gapani.

¹⁴Da ana mbərsa ka su na ntingnga apa zaku, antə shanga su tə da vəkər kəgari ana ɓza.

¹⁵Mji ana mbərsa ka kəyir ɗa abbər tsa ata msərantə ɗa, amma tsa aɗi su na ana fəi wa. Da ana bartədzi adzə kəyir ɗa ɓəɓal, amma tsa aɗi su na ana nggitə su wa.

¹⁶Mji na ɗimi ana thlatə ka duna apa kusar ata balti, natə tsiyayerari ana hwi ka ndlətə kuta gadina.

¹⁷Nggilanga ɗa ana ləghəi akwa zanggau ka thlurhə kərɗa ka ndzi ɓəɓal.

¹⁸Amma ma mdə ku ntsumta ni, mda ata fwari ata kərari turəku.

¹⁹An kura msərakur tə mji na ɗimi ana wuta, mji damwa an ata si kulini ka kətə vəi ndzəndziyir ɗa.

²⁰“Amma Hyel aɗi ata nggəlar mdə na kula biku wa, wala dlar mjir hara ɗimikur wa.

²¹Tsa ata hara ka gə jaktə kumshi ka damwa, ka nghyantə ɗəffa ga ka kucali.

²²Amma mji na lu nggəlar nga, mda ata pu ɗa akwa sur səli, ka shamta kəyir mji na kəmanggar ba saka madi.”