Read bura-pabir Ayuba 9 Bible Online

Ayuba 9 - bura-pabir bible

Ayuba 9

¹Antə Ayuba pəla,

²“Jiri, I ka səndari apani. Amma apa madi tə mda ata mzhi ndzi ka jirkur akəma Hyel ri?

³Wala ma mda an ata bara kampiku ka tsa, ma tsa yu suayeri zumzum dəpu pal, mda aɗi na ata mzhi hamta amsar pal akwa nca ɗa wa.

⁴Kamnyar Hyel ni ɗəɗu ka duna, tsuwa tsa ka kuthlikur ka duna. Mda aɗi na ata hara kər ɓəɓalkur alari ka mdari kuri lapiya wa.

⁵“Hyel ana famta garayeri kula səndər ɗa, ka shamta ɗa atar ɗəffə bwarbwarkurərni.

⁶Tsa ana kənggərantə duniya kazhar kur nggilangayerari, ka zhimbwalayerari kənggərantədzi.

⁷Tsa ata mzhi ngkatə pci ta tsa asəɓəla, ka ngkatə sasəlkayeri ta da mbəla aviri.

⁸Hyel duku shini an namtə vəi na amtazi, ka mwa ata kəra mpar yimər manda.

⁹Hyel an pwi sasəlkayeri amtazi, na abwar anəm, ka na ata ɗəffa hyel tekateka, ka na abwar yala.

¹⁰Kamnyar tsa ana hara suayeri na ol'ola na mwavər ka mdə nggaɓəla, surndatayeri tə mda amzhi jikatari wa.

¹¹“Hyel akwa təramta adzə ra amma I amzhi wutə ni wa, tsa akwa ləkəma ka mwa, amma I amzhi nggaɓəla ni wa.

¹²Tsa ana kətə su tə tsa akwa barari, tsuwa mdər mzhi ngkatə ni aɗi wa. Wan ata mzhi nggitə yu ni abbər, ‘Man tə ga akwa hara ri?’

¹³Ma ɗəffa Hyel ku ɓzi tsa aɗi ata kətə kəmar wa, har kəga mjir dlar shatan na ol'ola akwa manda tsa ata hadləmta ɗa akira səlari.

¹⁴Antə apani I amzhi ma kampiku ka tsa ri? I ata wuta ama jili ndər tə kəi amsa alari kəgari ri?

¹⁵Wala tə I aɗi ka biku wa, I amzhi beɗi ka tsa wa. Sai dai kəi kiɗa akəla alkaliyirna ni ka tsa kətadzə ra.

¹⁶Wala I an burkatə ni akwa mbwar shariya, har tə tsa kələngkər ka si, I aɗi mbərsa tsa ata psi thləm ali wa.

¹⁷Kamnyar ana tsa ra ka shambar na ka duna, ka dəkəi ra ka bwa hang kula suari aɗi.

¹⁸Tsa aɗi ata zhar ra kəi sarar mpikə wala raka wa, amma tsa ana nghyantə ra ka ɗəffə ɓzəɓza.

¹⁹Ma mda ata ngkər duna, wan ata gira dunari ka Hyel ri? Ma mda ata gari jirkur, wan ata mzhi vu ka tsa mwari akəma shariya ri?

²⁰Wala tə I ka jirkur ni, ndər tə I pəla ata mzhi mbwi ra, wala tə I aɗi ka biku wa, tsa ata wutə vəi sharna.

²¹I kula biku, amma su ngəni aɗi damitə ra wa, I aɗi akwa bara ndzi ka mpikə kəra wa.

²²Shang duku ma diya, zumzumkurari aɗi wa, wala mdə na kula biku, wala mdə na ka biku, tsa ata tsi giri japu.

²³Sakatə asar ku tsi mdə na pwa kakər, Hyel ana kumshi asar na wutə mji na kula biku.

²⁴Hyel ku hamta duniya ni akwa tsiya mji na kəmanggar, ka hartə nca alkaliyayeri. Ma aɗi Hyel an hara wa, to wan hara nə ri?

²⁵“Sakarna akwa huvə kur taktar ta mdər hwi, da akwa hwi, tsuwa su aɗi na ɓɗaku akwa da wa.

²⁶Sakarna akwa hwi ka duna apa shar tə mdə nam ka duwathlu, ɓəɓatu apa duku na akwa səghəi kamnyar kəl mti.

²⁷Wala ma I pəla I ata zhar jikamnya, kəi pwi kəmi ka kumshi,

²⁸bwani tə I akwa ni ana thlivərantə ra, kamnyar I asənda abbər tsu ga ata pəla I ka biku.

²⁹Wala mda an hara apadə ri, I an ata ndzi ka biku ni. To kamnyar mə tə I ata ghərantə kərna gapani ri?

³⁰Wala ma I an kəcimta kərna ka sabul, ka kəcimta tsi cau cau ka sabul soda,

³¹tsu ga ata psu ra akwa kur diɗi, har ka ləptərna ləkwa səli kamnyar na.

³²“Ma Hyel an mda apa Iya, sakani I ata shinau alari, ka yeru ra nthləmta beɗi ni akəma alkali.

³³I bara ka mdə ləkwa daɓwa yeru, mdə na ata kuma ala yeru ka Hyel.

³⁴Ka mdari dlutsə zwal na akəla Hyel ni, ka tsa zhar dlaɓu ra apani, ka ngkatə ni ta tsa athlivərantə ra.

³⁵Antə I ata mzhi gari alari kula thlivəra, amma I amzhi harari ka dunar ɗəvə wa.”