Read bura-pabir Zabura 10 Bible Online

Zabura 10 - bura-pabir bible

Zabura 10

¹Kamnyar mə tə gə ndzi ciju ri, MTHLAKU? Kamnyar mə tə ga ana ɗuwar kər nga sakatə yeru akwa bwani ri?

²Mji na kəmanggar ana gaya ka hara bwani aka mji turtura, ka ngkəi ɗa akwa dərku tə da ngga aka mji.

³Kamnyar mji na kəmanggar ana gaya ata kəra mwaɓər ɗəffa ɗa, antə mdər mbulamkur ana nggəl ka kyar MTHLAKU.

⁴Mji na kəmanggar aɗi ana damitədzi ka Hyel wa, kamnyar kər olkur tə da kəgari, da ana dzama abbər Hyel aɗi wa.

⁵Mji na kəmanggar ana səma akwa shanga su. Da aɗi ana mzhi nggaɓəla shariyar Hyel wa, da ana kumshi ɗimikur ata kəra dawayeri arɗa.

⁶Tsa ana dzama akwa ɗəffari abbər, “Su aɗi na ata wutə ra wa, tsuwa ba saka madi su aɗi na ata paktə yeru ka bwani wa.”

⁷Gariyir ɗa an ncir nggənggəl su, ka thlandəra, su tə da ana hara an ka da hara ɗimikur ka biku

⁸Da ana ɗuwardzi akwa kuta di akwa thla mji na kula biku. Da ana nggwar wul mji na kula duna.

⁹Da ana ɗuwardzi ka nggwar mji apa su tə tsəngi ana hara akwa mtakəu, kamnyar ka da ngkəi mjir bwani. Da ana səvatə mjir bwani akwa dərku ka ngkəgəi ɗa.

¹⁰Mji na ɗimi ana dlidlirəmta mji na kula duna, tsuwa kamnyar duna tə da kəgari da ana ndlamta ɗa ka dlyaɓəmta ɗa.

¹¹Da ana pəla akwa ɗəffa ɗa, “Hyel aɗi ana damitədzi wa! Tsa ku hartə ncari antə tsa aɗi ata wutə ra wa.”

¹²Mwa kara ɗi mji na kəmanggar ni, MTHLAKU! Ka gə dlar mji na akwa ɗar bwani.

¹³Kamnyar mə tə mji na ɗimi ana rutə Hyel ka pəla akwa ɗəffa ɗa, “Tsa aɗi ata yu mnyi wa” nə ri?

¹⁴Amma ar nga ga ana wutə jili bwani ka ɗəffə ɓzəɓza tə mda akwa ɗarari, tsuwa parang gə ɗəmhəɗəmhari kamnyar dlara. Mji na kula duna ana vəkər ka ga kamnyar dlara, antə parang ga ana dlar mutayeri.

¹⁵Ɓələmta tsiya mji na kəmanggar ka mji na ɗimi, kara ɗi ɗa kamnyar ɗimikur tə da hara tar ma ga ku wuta abbər da aɗi akwa harari kəra wa.

¹⁶MTHLAKU an kuthli har ba saka madi. Mji na ana nu haptu ata sə kura akwa tsəɗiyirni.

¹⁷MTHLAKU, ga ana nggatə adduwar mji na ka tərghəi kər, ga ana psi thləm ala ɗa ka dunautə ɗa.

¹⁸Ga ana nggatə tuwar mutayeri ka mji natə mji akwa na ɗa bwani, ka dlar ɗa ga ana thlamta shariya na ata kəskəra ɗa, kamnyar ta mji na aɗi suma wa aləkəma ka thlivərantə mda.