Read bura-pabir Zabura 102 Bible Online

Zabura 102 - bura-pabir bible

Zabura 102

¹Adduwar mdər bwani sakatə dunari ku kuri, tsa akwa jika damitədzər ni aka MTHLAKU. Psi thləma ga aka adduwarna bu, MTHLAKU, kara nggatə tuwarna!

²Ga aɗiya ɗuwardzi ali sakatə I ku ləkwa bwani wa! Psi thləma ga ali, kara amsa ali taktar kəlara sakatə I ku hara adduwa ala ga!

³Kamnyar mpikəi akwa kurkura apa ɗer, dzi ku ndzi gərgər ka duna apa I akwa u'ur kəthla.

⁴Nggawakur ku thlarəmta ra tə I ndzi apa kusar tə ulta tsa ni ka tətəɓumta ni, har məyir susəma aɗi akwa kuti wa.

⁵Kamnyar nggyinggyi tə I akwa harari ka duna, har dzi ku thlarəmtadzi tə I ndzi ncir ɗethlu.

⁶I ndzi shira apa ɗika na akwa mtakər hamada, apa nghyinghyi na akwa fya.

⁷I ku pi ata wula, I ku ndzi apa ɗika na mbil duku shini ata kəra mbwa.

⁸Dawayeri arna ana ɓukci akwa nggənggəl ra, da ana kumshi ra ka hilantə thləmi.

⁹Kamnyar I ana kwasə pənju apa ɗəva, ka gwartə sur sa arna ka shimwi!

¹⁰Ga ku kətə ra ka ndzəhəmta ra, shang kamnyar mwavərkur ɗəffa gə na ɓza!

¹¹Mpikəi akwa kur taktar apatə shanggur na tahaku ana hwi ka sha, dzi ku thlarəmtadzi ka ndzi apa kusar ul'ula.

¹²Amma MTHLAKU, ga an kuthli ba saka madi. Shanga zamanayeri ata sə ngkər nga kamnyar thləma gə na ku tuwa.

¹³Ga an ata thlatə ka kətadzə Sihiyona, kamnyar sakatə mda ata kətadzə ni ku hara, sakatə gə thlamta ni ku hara kulini.

¹⁴Kamnyar pelayeri tə mdə hən katangga kəgari ni ka daraja ala yeru na mjir nga, antə yeru akwa kətadzə ni akwa bərbər ni.

¹⁵Mjir duniya ata sə thlivər thləma ga, MTHLAKU, tsuwa shanga kuthlyayeri ar duniya ata sə nar səli ala ga.

¹⁶Kamnyar, MTHLAKU, ma sakatə ga ku jaktə latə Sihiyona, mji ata sə jaktə wutə olkur səliyir nga.

¹⁷Shinardzi, kara nggatə adduwar mjir bwani, ga aɗiya psəngkər thləm aka adduwar ɗa wa.

¹⁸Ka mdə rəbutə labar ngəni kamnyar zamanayeri na ata sə si, kamnyar ka mji tə mda aɗi yaɓəla ɗa katagu wa, sə hu MTHLAKU abbər,

¹⁹MTHLAKU na amtazi akwa vəi ndzəndziyirni na ɓɗakkarkara, ana haghəi ncari ka wul su na akwa duniya,

²⁰kamnyar ka tsa nggatə nggyinggyir mji na akwa pərsəna, ka tsa msərantə mji tə mdə ku thlamta abbər mda ata tsi ɗa.

²¹Antə apani mda ata ngkər thləmari akwa Sihiyona, ka fwal ni akwa Urushalima.

²²Kəlara sakatə mjir duniya ka kuthlikurayeri ku tsaptədzi ata kəma duku kamnyar vəngkər səli aka MTHLAKU.

²³MTHLAKU ku kəmta duni tsu akwa kustakurərna, tsa ku kəmta saɓəlkur fa arna.

²⁴Antə I tuwa alari abbər, “Hyelərna ga an ba saka madi, ga aɗiya kətə ra akwa kustakurərna wa!

²⁵Təng akwa baɗitari, antə gə nci səla duniya, ka namtə vəyayeri na amtazi ka tsiya ga.

²⁶Da ata sə sha, amma ar nga gə tsu aɗi, shanga ɗa ata hala apa ləptu. Ga ata pali ɗa apa ləptu, antə da ata sha.

²⁷Amma ar nga ga aɗi ana palidzi wa, tsuwa məva ga aɗi ana kur wa.

²⁸Maɗa' mjir nga ata ndzi lapiya, tsuwa ga ata kəlantə kəkayeri arɗa lapiya.”