Read bura-pabir Zabura 103 Bible Online

Zabura 103 - bura-pabir bible

Zabura 103

¹Ha ar Dauda. I ana hu MTHLAKU ka ɗəffi shang, ka dzi swakti antə I ata fwal thləmari na ɓɗakkarkara!

²I ana hu MTHLAKU ka ɗəffi shang, tsuwa I aɗi ata fwari shanga ɓɗakkur tə tsa hara ali wa.

³Tsa ana tifəmta ali shanga bikayeri arna, ka kuri ali shanga shilkayeri arna,

⁴Tsa andər msərantə mpikəi ta mta, ka hara ali ɓɗakkur kamnyar hirkurərni ka kətadzərni.

⁵Tsa ana hamta ali suayeri na ɓɗakɓɗaku akwa shanga ndzəndziyirna, har tə I ndzi kusta na ka duna apa duku.

⁶MTHLAKU ana hara su na kalkal aka mji tə mdə ku zambatə ɗa, ka ncantə jirkur ala ɗa kula nca zumzumkur.

⁷Tsa ku ncanta aka Musa su tə tsa akwa bara harari, ka kəthlərayeri arni tsuwa aka mjir Israila.

⁸MTHLAKU ana kətadzə mda, tsuwa tsa ana hara ɓɗakkur aka mda, ɗəffari ana ɓzə mbwaɗi wa, tsa nghyinghyari ka hirkur na ana palidzi wa.

⁹Aɗi parang antə tsa ana mpa ala mburu wa, tsuwa ɗəffari aɗi ana ɓzə ba saka madi wa.

¹⁰Tsa aɗi ana ɗi mburu kalkal ka bikayeri ar mburu wa, wala ntə dawa ata kəra mburu kalkal ka ɗimikurər mburu wa.

¹¹Kamnyar hirkurərni na ana palidzi wa an ola aka mji na ana thlivər ni, Ol ka duna ta cijukur daɓwa vəi na amtazi ka duniya.

¹²Apa daɓwa ramta ka raghəi, antə tsa ndəkəmta daɓwa mburu ka bikayeri ar mburu.

¹³Apatə baba ana kətadzə maɗa'ni, antə MTHLAKU ana kətadzə mji na ana thlivər ni.

¹⁴Kamnyar tsa asəndə su tə tsa nam mburu kəgari, tsa ana ɗangta abbər mburu an bərbər.

¹⁵Kamnyar mpika mburu ndzi apa kusar mirakəu, mburu ana kəla ka pəbəlardzi apa pukdla na akwa mtakəu,

¹⁶amma ma shambar ku fya, pukdlə ni ata suta ka təri, har ka mdə fwari ata kəra vəi ndzəndziyirni turəku.

¹⁷Amma mji na ana thlivər MTHLAKU, tsa ana hir ɗa ka hirkur na ana palidzə wa ba saka madi, ka hara ɓɗakkur ba aka kəkayeri arɗa,

¹⁸mji na ana kəsi alkawalərni ka jirkur, ka ɓəla tsawayeri arni ka jirkur.

¹⁹MTHLAKU ku nci dəkəl kuthlikurərni amtazi, tsa an ka kuthlikur ata kəra shanga su.

²⁰Hu gir MTHLAKU, giri na mjirthlentərni, giri na ka duna na ana ɓəla tsawurni, giri na ana psi thləm aka ndərərni.

²¹Hu gir MTHLAKU, shanga giri na dlamar sojayeri arni, giri na mjir kəthlər alari, na ana hara su na akwa ɗəffari.

²²Hu gir MTHLAKU, shanga giri natə tsa an namtə giri ka tsiyari, akwa shanga vəi tə tsa ka kuthlikur ata. I ata hu MTHLAKU ka ɗəffi shang!