Read bura-pabir Zabura 104 Bible Online

Zabura 104 - bura-pabir bible

Zabura 104

¹I ata hu MTHLAKU ka ɗəffi shang, MTHLAKU na Hyelərna, ga an ol ka duna! Səli ka olkur an ləptər ha ar nga.

²Parakəu an ndzi ala ga apa ləptər ha ar nga. Ga ku pəbələmta vəi na amtazi apa səva,

³ka həntə kəyir nga ata kəra yimayeri na amtazi. Ga ana kəthlər ka dlambayeri apa wagən ar nga, natə shambar an ɓəɓəkayerari.

⁴Ga ana kəthlər ka shambar apa da mjirthlentər nga ka kyanggyara u'u apa da an mjir kəthlər ar nga.

⁵Ga ku nci duniya ata səlari gyang, tə ba saka madi sur kənggərantə ni aɗi wa.

⁶Ga ku hartə kəra duniya ni ka yimi apa ka zhaɓi, har tə yimi ni ku hartə kəra garayeri na ol'ola.

⁷Amma sakatə ga ku mpa su antə yimi ni ku hwi, sakatə da nggatə kuraka dlərər nga, antə da pthli hwi ka təra.

⁸Kəra garayeri ku səɓəla, antə yimi ni ku ləghəi akwa mularayeri, akwa vəi tə gə ɗəmha ala ɗa.

⁹Ga ku vəi kəla natə da aɗi ata mzhi fəlɓəlari wa, ta da asə hartə duniya ka damwa.

¹⁰Ga ku hara tə kucirkilayeri ana puɓəla yimi na ana hwi ka ləghəi akwa mularayeri, ka thlyaghayeri hwi akwa daɓwa ɗəɗəgəlayeri.

¹¹Da ana hamta yimər sa aka shanga mwaɓiyayeri ar mtakəu, kwarayeri ar mtakəu ana sa, ka thləliyir ɗa mta.

¹²Akwa nfwayeri na ata mnya yimayeri ni antə ɗikayeri ana latə mbwar ɗa, ka hara ha akwa nca thlaliyayeri ni.

¹³Akwa vəi ndzəndziyir nga na amtazi antə ga ana thlentə yimi ata kəra garayeri, ka nghyantə duniya ka suayeri na ɓɗakɓɗaku.

¹⁴Ga ana hara ka kusar ptsa ka kəla kamnyar mwaɓi, ka su ptsəptsa, kamnyar ka mji səma, ka mji wutə susəma akwa fakər ɗa,

¹⁵ka da sa yimər anap ka ɗəffa ɗa ndzi msəra ala ɗa, ka da wutə mal kəkəra ka dza ɗa ndzi ɓɗaku, ka susəma na ata ndlantə ɗa.

¹⁶Nfwayeri ar MTHLAKU ku wutə yimi na ku mzhi ɗa ka duna, shanga nfur seda tə tsa an thləkamta ahar Lebanon.

¹⁷Akwa da antə ɗikayeri ana latə mbwar ɗa, shaduwarayeri ana latə mbwar ɗa akwa nfur fir.

¹⁸Garayeri na nal an kamnyar kwiyayeri ar mtakəu, daɓwa pelayeri na ol'ola na ku ntaudzi an vəi ɗuwardzi aka pacatayeri.

¹⁹Ga ku namtə thliya kamnyar ncantə sakayeri ar məva pci ma tsa asəndə sakar təriyir ni.

²⁰Ga andər namtə kuthlu, antə tsa ana ndzi aviri, sakatə shanga mwaɓimtaku ana nggwar səɓəla.

²¹Dakwi tsəngiyayeri ana tuwa sakatə da akwa bara, sakatə da akwa pakə susəma tə Hyel hamta ala ɗa.

²²Kəlara sakatə pci ku səɓəla da ana ngka ka ɗuwardzi akwa kur ɗa.

²³Apani mji ana ləɓəla akwa kəthlərər ɗa ka ləkəma ka kəthlər har tahaku.

²⁴MTHLAKU, ga ku namtə suayeri hang! Ga ku namtə ɗa shang atar ɗəɗukur! Duniya an nghyinghyari ka suayeri tə gə namta.

²⁵Tsuwa yimi aɗi na ola ka bau, na nghyinghyari ka suayeri na ajikatədzi wa, suayeri na ka mpika, na ol'ola kəga na raka raka.

²⁶Sharayeri ar yimi aɗi na ana mwa ata, ka Leviyathlan tə gə namtə ka tsa gyali akwa.

²⁷Shanga su nayeri ni ana putə nca ata ga, ka gə na ala ɗa susəmər ɗa akwa saka na kalkal.

²⁸Kəlara sakatə ga ku hamta ala ɗa susəm ni, da ana tsapta, kəlara sakatə ga ku kəlar tsiya gə bwang, da ana ndlə ka suayeri na ɓɗakɓɗaku.

²⁹Amma kəlara sakatə ga ku shinadzə bwahili ala ɗa, da ana thlivəra, ma sakatə ga ku kəɓəla mpika ɗa, da ana mta, ka ngka bərbər ka damwa.

³⁰Amma kəlara sakatə ga ku thlenta ala ɗa mpika, da ana ndzi ka mpika, ga andər hara ka shanga su na akwa duniya jaktə ngka bilən.

³¹Adduwar yeru MTHLAKU, an abbər, ka səliyir ngə ndzi har ba saka madi, tsuwa ka gə hara kucali ata kəra suayeri tə gə namta.

³²Ma ga ku zhwal duniya, duniya ana thlivər ka kədza, ma ga ku tsəkwar garayeri, da ana ɗuzə ɗer.

³³I ata hara ha ala ga, MTHLAKU, tar kurər mpikəi, I ata hara ha ar huwa ala ga, Hyelərna, akwa shanga ndzəndziyirna.

³⁴I akwa kiɗa abbər ka dzamərna ndzi su na ata kəskəra ga, kamnyar, MTHLAKU, ga andər hara kəi kucali.

³⁵Ka mjir biku sha ata kəra duniya, ka mji na kəmanggar kur karkar. I ana hu MTHLAKU ka ɗəffi shang! I ana hu ngə MTHLAKU!