Read bura-pabir Zabura 105 Bible Online

Zabura 105 - bura-pabir bible

Zabura 105

¹Usar gir MTHLAKU, ka giri hara adduwa akwa thləmari, ngkər gir aka mji su tə tsa ku hara.

²Hara gir ha alari, hara gir ha ar huwa alari, ngkər giri surndatayeri tə tsa hara!

³Ka giri gaya ka thləmari na ɓɗakkarkara, ka shanga mji na ana vəngkər səli aka MTHLAKU hara kucali.

⁴Bara gir MTHLAKU, tsa na ana dunautə giri, ka giri bara kəmari tədəku.

⁵Giri na kəkar Ibrahim, na an mafarni, giri na kəkar Yakub, giri tə tsa ku carɓəla giri, ɗangtə giri surndatayeri tə tsa hara, surndatayeri, ka shariyayeri tə tsa thlamta.

⁷MTHLAKU an Hyelər mburu, tsa ana hara shariya akwa kəlara vəi akwa duniya.

⁸Tsa ana kəsi alkawalərni ba saka madi, alkawalayeri tə tsa hara ni an kamnyar zamanayeri dəpu.

⁹Ngəni an alkawal tə tsa hara aka Ibrahim ka alkawal tə tsa kəta aka Ishaku.

¹⁰Tsawa tə tsa ku nghyaɓəla aka Yakub, alkawal na ba saka madi tə tsa hara aka mjir Israila.

¹¹Tsa pəla, “I ata hamta ala gə tsəɗi Kanana, antə tsa ata ndzi ar nga ka kəra ga.”

¹²Sakanda mjir Israila ni yiɗauwa daci, Jiri, da aɗi ol wa, tsuwa da mətəpi akwa tsəɗi ni.

¹³Da ku kadla akwa tsəɗiyayeri zumzum, ka təramta akwa kuthlikurayeri zumzum.

¹⁴Amma Hyel aɗi zhar ka mdə hara ala ɗa bwani wa, tsa ku tsaktə kuthlyayeri ta da atsəkwar ɗa,

¹⁵Tsa pəla, “Giri aɗiya tsəkwar mjirna na carcarari ni wa, giri aɗiya tsəkwar naɓiyayeri arna wa.”

¹⁶MTHLAKU ku thlentə məi akwa tsəɗi Kanana ni, ka ɓzamtə shanga lakur wutə susəmər ɗa.

¹⁷Amma tsa ku thlentə mdə laga ka tsa mwari ahar Masar akəmata da, tsa an Yusuf natə mdə ɗələmta ni mafa.

¹⁸Mdə ku mbwahə səlari ka məsəsal, ka mbwahə wulyari ka liya,

¹⁹tar tə su tə tsa pəla ni nghyaɓəladzi, su tə MTHLAKU pəla ni ku sə ndzi jiri.

²⁰Antə kuthli na akwa hara kuthlikur ata kəra mji hang, ku thlentə ka mdə msərantə Yusuf.

²¹Tsa vəngkər ni ata kəra shanga su na akwa kutakəyirni, ka ata kəra shanga su tə tsa kəgari,

²²ka nar olkur ar hamta sauri aka kwakunayeri arni apatə tsa hira, tsuwa ka tsa thlipə ɗəɗukur aka mjirni na ol'ola.

²³Aghəla nda antə Yakub si akwa Masar, ka ndzi akwa tsəɗiyir Ham apa mətəpi.

²⁴MTHLAKU ku hara tə mjirni ku yatədzi hang ka namtə ɗa ka duna ta dawayeri arɗa.

²⁵Hyel vu tə mjir Masar pali hangkala ɗa ka da nggəlar mjirni, ka da ɗəmhə ɗimikur ata kəra ɗa.

²⁶Aghəla nda antə Hyel thlentə Musa na buɗarni ahar Masar, ata kəma duku ka Haruna, natə tsan carɓəla.

²⁷Da hara seɗayeri na ncanta abbər Hyel ku kəthlər ka da akwa nca ɗa, ka hara surndatayeri akwa tsəɗi Ham.

²⁸Tsa thlentə kuthlu, antə tsəɗi ni ku ndzi akwa kuthlu, tsuwa Musa ka Haruna aɗi hara kər ɓəɓalkur wa.

²⁹Tsa shinantə thlyaghayeri arɗa ka mamshi, ka vu tə kəlfayeri arɗa mtəgəmtadzi.

³⁰Tsəɗiyir ɗa ku nghyi ka hwambayeri, har ba akwa mbwar pəi ar kuthlyayeri.

³¹Hyel ku hamta tsawa, antə cirayeri ka jangkarayeri hang ku puɓəladzi ka nghyantə tsəɗiyir ɗa.

³²Tsa thlentə handzəkəla ata vəya yimərhyel, ka wurka akwa shanga tsəɗiyir ɗa.

³³Tsa hilantə yar anapayeri ka nfur kamndayeri arɗa, ka kwacahəmta nfwayeri na akwa tsəɗiyir ɗa.

³⁴Tsa hamta tsawa, antə ntsəkwayeri ku səɓəla, ata kəma duku ka jaɓa na ajikatədzi wa,

³⁵ka ɓɗəmnya shanga thlaliyayeri na akwa tsəɗi ni, ka shanga sur fakər ɗa.

³⁶Tsa tsəgəi shanga maɗashili na yarakəma shanga yarakəmar duna ɗa.

³⁷Antə Hyel fwaɓəla mjir Israila akwa Masar da səɓəla ka adzərfa ka dinar, tsuwa mda aɗi akwa nca ɗa wala duku tə dunari ku kətəi ata laku wa.

³⁸Ɗəffa mjir Masar ku ndzi msəra ala ɗa sakatə mjir Israila təra, kamnyar hwatu da akwa thlivər ɗa ka duna.

³⁹Hyel ku vəi ləmbəku ata kəra mjirni, ka u'u na ata hamta ala ɗa parakəu aviri.

⁴⁰Da kiɗa, antə tsa hamta ala ɗa takulashayeri, ka hamta ala ɗa susəma na thlata amtazi hang ka duna.

⁴¹Tsa ntarar pela, antə yimi ku hwi səɓəla, ka hwi akwa mtakə ni apa zərkəu.

⁴²Kamnyar tsa ɗangtə alkawalərni na ɓɗakkarkara, tə tsa hara aka Ibrahim na buɗarni.

⁴³Apani antə tsa fwaɓəla mjirni, antə da ku hara ha kamnyar kucali.

⁴⁴Antə tsa hamta ala ɗa tsəɗi ar mji damwa, antə da ku səm vəi ufu ar mjir tsəɗi ni,

⁴⁵tsu abbər nuhum da kələngkər alari, ka ɓəlatə tsawayeri arni. Hu gir MTHLAKU!