Read bura-pabir Zabura 106 Bible Online

Zabura 106 - bura-pabir bible

Zabura 106

¹Hu gir MTHLAKU! Usar gir MTHLAKU, kamnyar ɓɗakkur tə tsa ana hara, kamnyar hirkurərni ba saka madi aɗi palidzi wa!

²Wan ata mzhi jikaɓəla suayeri na ol'ola tə MTHLAKU hara ri? Wan ata mzhi hu ni kalkal ri?

³Msəra aka mji na ana hara su ka jirkur, mji na ana hara su kalkal kəlara saka!

⁴Ɗangtə ra, MTHLAKU, kəlara sakatə ga akwa dlar mjir nga, dlar ra kəlara sakatə ga akwa mbantə ɗa.

⁵Hara kəi wutə ləkəma ata kəma duku kəga mjir nga na carcarari, kamnyar ka shanga yeru nggatə msərakur tsəɗiyir nga, kəi hu nga ata kəma duku kəga mjir nga.

⁶Yeru ku hara biku tsu apa kəkayeri ar yeru, yeru ku hara ɗimikur, ka hara kəmanggarkur.

⁷Sakatə kəkayeri ar yeru tsu akwa Masar, da aɗi vədzə hangkal aka surndatayeri tə gə hara wa, wala ɗangta abbər ga ku hir ɗa ka duna wa. Ata vəya ndaga, da hara kər ɓəɓalkur ala ga ata mnya Manda Duwathlu.

⁸Amma wala apani ga ku mbantə ɗa kamnyar səliyir thləma ga, tsuwa kamnyar ka gə ncantə olkur dunar nga.

⁹Ga ku mpa aka Manda Duwathlu, antə tsa ku shiwa, antə ga ku ləɓəla ka da akwa manda na shiwu ni apa akwa mtakər hamada.

¹⁰Apani tsa ku mbuli ɗa akwa tsiya dawar ɗa, ka msərantə ɗa ta dunar dawayeri arɗa.

¹¹Antə yimi ni ku ngka ka hartə dawayeri arɗa, tə wala duku aɗi mbili akwa nca ɗa ka mpikə wa.

¹²Sakanda antə da mbərsa ka ndərər nga, tə da hara ha ar huwa ala ga.

¹³Amma aɗi fəi wa təng da fwari su tə gə hara ni, ka hara su kula səkə sauri akəla ga.

¹⁴Antə nggukər susəma ku tam ɗa mulmulari, har tə da ku ngkərtə nga anda akwa mtakə ni.

¹⁵Ga ku hamta ala ɗa su tə da kiɗa, amma aghəla nda ga ku thlentə shilku na mwavər akwa nca ɗa.

¹⁶Antə shanga mji na akwa vəi fəliyir ɗa ni ku səlkər Musa ka Haruna, na prist tə ga an carɓəla, MTHLAKU.

¹⁷Antə di ku ntarardzi ka ndasəmnya Dathlan, ka hartə Abiram ka mjir kutakəyirni.

¹⁸Tsuwa u'u ku thlata akwa nca mjir nuwa arɗa, ka mbagamta mji na kəmanggar.

¹⁹Mji ni namtə dludzər kəna ka liya ahar Horeb, ka vəngkər səli aka haptu tə da ɓdlətə ni.

²⁰Da palɓəla nga, Hyelər ɗa, na ka səli, ka haptu na dludzər thla na ana ɓɗə kusar.

²¹Da fwari abbər ga an mbantə ɗa, abbər ga an hara suayeri na ol'ola akwa Masar,

²²surndatayeri tə gə hara akwa tsəɗiyir Ham, ka suayeri na akwa thlivərantə mda tə gə hara ata mnya Manda Duwathlu.

²³Apani ɗəffa ga ku ɓzi har tə gə pəla ga ata kurəmta ɗa, amma Musa natə gan carɓəla ku thlatə ka kiɗə kəra ga, abbər ka gə mbwi ɗəffa ga, ka gə zhar kurəmta ɗa.

²⁴Antə da nggəlar ləkwa tsəɗi na ɓɗaku ni, kamnyar da aɗi mbərsa ka ndərər ngə wa.

²⁵Da ku nggungguni akwa tentayeri arɗa, da aɗi ngga ndərər ngə, MTHLAKU, wa.

²⁶Antə ga ku kahyel abbər ga ata kurəmta ɗa akwa mtakə ni,

²⁷ka gə titiləmta durər ɗa akwa nca durayeri damwa, ka da titiltədzi akwa tsəɗiyayeri na aɗi arɗa wa.

²⁸Da ku paktə kəra ɗa ka haptər Baal na ahar Peyor, ka səm saɗakayeri tə mdə hamta aka mshiyir haptayeri.

²⁹Da ku thlentə hangkala gə ka suayeri na ɗimi ɗimi tə da hara, antə gə vu tə shilku na mwavər ku səɓəla akwa nca ɗa.

³⁰Amma Finehas ku thlatə ka hau mnya, antə shilkə ni ku thləthlata.

³¹Apani antə mda ana jikau ni apa mdə na ka jirkur, təng akwa zaman ndaga har ba saka madi.

³²Tsuwa mji ni ku ɓzamtə ɗəffa MTHLAKU ata mnya yimayeri ar Meriba, antə Musa ku ɗar bwani kamnyar ɗa.

³³Da vu tə ɗəffari ku ɓzə ka duna, har tə tsa ku mnya ka ɗəffu kula dzama.

³⁴Da aɗi kurəmta durayeri na gapani, apatə gə na MTHLAKU ku tsawa ala ɗa wa.

³⁵Ata vəya ndaga da ləkwa kəldzi kəga da, ka thliptə surharar ɗa.

³⁶Da ku vəngkər səli aka haptayeri ar durayeri na damwa ni, antə su ngəni ku ndəkərəngkər ala ɗa asar.

³⁷Da ku hamta maɗashilər ɗa kəga maɗa' ɗa na mwanki aka shatanayeri.

³⁸Da ku tsəgəi maɗangkyarər ɗa na kula biku, maɗashili kəga maɗangkwi tə da an ya sur ɗa, ka hamta ɗa saɗaka aka haptayeri ar mjir Kanana, antə tsəɗi ni ku diɓərantədzi ka mamshi.

³⁹Atar ɗimikur ngəni tə da hara ni da ku ndzi dlimbur, ka ndzi kula jirkur apa surharar karwa.

⁴⁰Antə MTHLAKU, ɗəffa ga ku ɓzi ata kəra mjir nga, har tə da ku ndzi sur cika ala ga.

⁴¹Antə ga ku hamta ɗa akwa tsiya tsəɗi damwa, kamnyar ka dawayeri arɗa hara kuthlikur ata kəra ɗa.

⁴²Antə dawayeri arɗa ku hara ala ɗa bwani, ka hara kuthlikur na mwavər ata kəra ɗa.

⁴³Ka hang antə ga ku mbantə ɗa, amma hangkala ɗa akwa hara kər ɓəɓalkur ala ga, antə bikər ɗa ku pwasəngkər ala ɗa asar.

⁴⁴Amma wala apani sakatə ga ku nggatə tuwar ɗa, ga ku kətadzə ɗa.

⁴⁵Ga ku ɗangtə alkawalər nga ka da, antə kamnyar hirkurər nga na ana palidzi wa ni, ga ku kətadzə ɗa,

⁴⁶ka vu tə shanga mji na ngkəi ɗa, ku kətadzə ɗa.

⁴⁷Mbantə yeru, MTHLAKU na Hyelər yeru, ka gə fwaɓəla yeru akwa tsəɗiyir mji damwa. Tsaptə yeru ka gə ngka ka yeru akwa tsəɗiyir yeru, kamnyar ka yeru mzhi usar nga, ka hu thləma gə na ɓɗakkarkara ni.

⁴⁸Hu gir MTHLAKU, na Hyelər Israila, fwal gir ni baɗitə kulini har ba saka madi! Ndzi ka shanga mji pəla, “Amin!” Fwal gir MTHLAKU!