Read bura-pabir Zabura 107 Bible Online

Zabura 107 - bura-pabir bible

Zabura 107

¹Usar gir MTHLAKU, kamnyar tsa ana hara ɓɗakkur, kamnyar ba saka madi hirkurərni aɗi ana palidzi wa!

²Ka mji natə MTHLAKU ku pəli ɗa gari, mji natə tsa pəli ɗa akwa tsiya dawayeri arɗa,

³mji tə tsa fwaɓəla ɗa akwa tsəɗiyayeri na akwa raghəi ka ramta, yala ka anəm.

⁴Mji laga akwa nca giri ku kadla akwa hamada, kula wutə lakur ləkwa bərni tə ka da ndzi akwa.

⁵Mi ka thləli ku kətə giri, har giri abaka thləvamtadzi.

⁶Giri ku ləkwa bwani ka hara adduwa aka MTHLAKU, antə tsa ku mbantə giri.

⁷Tsa ku pwar giri akwa laku na dwaɗu, har tə giri mzhitə bərni tə ka giri ndzi akwa.

⁸Ai kalkal ka giri usar MTHLAKU kamnyar hirkurərni ana palidzi wa ni, kamnyar surndatayeri tə tsa hara kamnyar giri.

⁹Kamnyar tsa ana tsi thləliyir mji na ka thləli, ka ndlantə mji na ka məi ka suayeri na ɓɗakɓɗaku.

¹⁰Mji laga akwa nca giri ku ndzi akwa kuthlə na pələku, apa mjir pərsəna na akwa ɗar bwani akwa məsəsal,

¹¹kamnyar giri ku nggəlar kələngkər aka ndərər Hyel, ka nggəlar sauri ar Hyel na ka Səli ta Shang.

¹²An su na hara tə tsa ɓəli giri ka kəthlər mafakur ni, har tə giri ku ndla kula wutə mdər dlara akwa thlentə giri ni.

¹³Giri ku ləkwa bwani ka hara adduwa aka MTHLAKU, antə tsa ku mbantə giri.

¹⁴Tsa ku fwaɓəla giri akwa kuthlu na pələku, ka nthlənthləmta məsəsalayeri na akwa səla giri.

¹⁵Kalkal ka giri usar MTHLAKU, kamnyar hirkurərni ana palidzi wa ni, kamnyar surndatayeri tə tsa hara kamnyar giri.

¹⁶Tsa ku ɓəgələmta nyarmbwayeri tə mdə nam ka əmza, ka tadərəmta liyar tsau nyarmbwayeri ni.

¹⁷Mji laga akwa nca giri ku ndzi kəgaɓu ka hara kər ɓəɓalkur, ka ɗar bwani kamnyar ɗimikurər ɗa.

¹⁸Shanga susəma ku ndzi sur cika ala giri, har tə giri abaka mta.

¹⁹Giri ku ləkwa bwani ka hara adduwa aka MTHLAKU, antə tsa ku mbantə giri.

²⁰Tsa ku gari, antə giri ku mbantədzi, tsuwa tsa ku msərantə giri ta mta.

²¹Kalkal ka giri usar MTHLAKU, kamnyar hirkurərni ana palidzi wa ni, kamnyar surndatayeri tə tsa hara kamnyar giri.

²²Kalkal ka giri hamta saɗakayeri ar gwaɗita, ka giri pəla su tə tsa hara akwa hayeri ka kucali.

²³Mji laga ku ləghəi akwa mnya yimi ka ləkwa sharayeri kəthlərər ɗa an nggur shar ata kəra yimayeri na ol'ola.

²⁴Tsuwa giri ku wutə suayeri tə MTHLAKU hara, surndatayeri tə tsa hara ata kəra mandayeri na zurang.

²⁵Tsa ku ndəra, antə shambar na ka duna ku thlata, ka mbwaltə mpar yimi na ola.

²⁶Sharayeri ku ləmta akwa shambar miu aharhyel, ka jaktə səghəi kə ləghəi zurang akwa yimi, har tə hyala giri nthlə giri kamnyar asar na abaka kəl giri.

²⁷Giri ku tiwurtədzi ka wanggaltədzi ka ndzi apa mji na wikəwikari, shanga masəkukur giri ku ndzi gapani.

²⁸Giri ku ləkwa bwani ka hara adduwa aka MTHLAKU, antə tsa ku mbantə giri.

²⁹Tsa ku thləthlatə ka shambar na mwavər ni, antə kərathla yimi ni ku pwi.

³⁰Antə ɗəffa giri ku ndzi msəra ala giri kamnyar shanga su ku pwi, antə tsa səntə giri lapiya akwa tasha ar sharayeri, apatə giri bara.

³¹Kalkal ka giri usar MTHLAKU, kamnyar hirkurərni ana palidzi wa ni, kamnyar surndatayeri tə tsa hara kamnyar giri.

³²Kalkal ka giri haptə thləmari akwa tsaptədzər giri, ka hu ni akwa tsaptədzi ar mji ol'olər giri.

³³Tsa ana hara ka thlyaghayeri shiwa ka ndzi mtakər hamada, ka shinantə vəi kucirkila ka tsa ndzi vəi ul'ula,

³⁴ka hara ka tsəɗi na ana ya su hil ka ndzi mtakər una, kamnyar kəmanggarkur ar mji na anda.

³⁵Tsa ana mzhi shinantə mtakər hamada ka tsa ndzi kufayeri ar yimi, ka vəi na ul'ula ndzi vəi kucirkila,

³⁶ka zhar ka mji na ka məi ndzəndzi anda ka nthləi bərniyir ɗa.

³⁷Giri ku ɓucitə fakayeri, ka ncimta fakayeri ar anap, ka wutə sur fakə hang apa su gapani.

³⁸Tsa ku vədzə barka ala giri antə giri ku hara hang ka duna, tsa aɗi zhar ka mwaɓiyayeri ar giri kəmtadzi wa.

³⁹Ma dawayeri ar giri ku mula ala giri ka fəi shaha giri, atar na giri bwani, ka asar, ka sur ɓzamtə ɗəffu,

⁴⁰tsa ana kəli səliyir mji ol'ola na hara ala giri bwani ni, ka vu ɗa akwa kadla akwa mtakə na kula laku.

⁴¹Ma sakatə giri ku ləkwa tur su, tsa ana mbantə giri akwa bwaniyir giri, ka vu ka mjir kutakəyayeri ar giri hara hang apa ciɓa ar mwaɓi.

⁴²Mjir jirkur ana wul su nayeri ni ka ɗəffa ɗa ndzi msəra ala ɗa, amma shanga mji na kəmanggar ana dləɓ səri.

⁴³Ka mji na ɗəɗu dzama ata kəra suayeri ngəni, ka da vədzə hangkala ɗa aka hirkur ar MTHLAKU na ana palidzi wa.