Read bura-pabir Zabura 109 Bible Online

Zabura 109 - bura-pabir bible

Zabura 109

¹Ha ar Dauda aka mdər pwar ha. Ai Hyel ragai, Hyel tə I ana huwa, ga aɗiya dləɓ səri wa!

²Kamnyar kəmanggarayeri ka mjir thlandəra akwa ngkər ra, da akwa thlandəra ata kəri,

³Da akwa ngkər ndərayeri na ɗimi ata kəri, ka mpa ra kula suari aɗi.

⁴Da ana nta ali hirkur ka nggənggəla, wala tə I ana hara adduwa kamnyar ɗa.

⁵Da ana nta ali ɓɗakkur ka ɗimikur, ka nta ali hirkur ka kəmanggarkur.

⁶Vu ka kəmanggar laga ngkəi ni ka ɗimikur, ka alkali tə tsa an kəla jaktə ndzi kəmanggarərni.

⁷Ma mdə ku hara alari shariya, ka mdə ngkəi ni ka biku, wala adduwar ni ka tsa ndzi biku ka kərari!

⁸Vu ka far ni ndzi kwadang, ka mdə hamta vəi kəthlərərni aka mdə damwa!

⁹Vu ka maɗa'ni ndzi muta, ka mwalankiɗa ndzi kughung!

¹⁰Vu ka maɗa'ni ndzi mjir kadlə ka mjir kiɗa, har ka da sə kiɗə ciju kazhar fir ɗa!

¹¹Vu ka mji na akwa nu ni təmbəl famnya shanga surni, ka mətəpiyayeri famnya shanga su tə tsa wutə ka vəi ufur ni.

¹²Ga aɗiya zhar ka mdə wala duku dlar ni wa, wala ka mdə laga kətadzə maɗa'ni na muta ni wa.

¹³Vu ka shanga mji na akwa nyarmbwarni mtəgəmtadzi, ka mdə fwari ata kərari akwa zaman na ata si.

¹⁴MTHLAKU, ga aɗiya fwari ata kəra ɗimikur tə kəkayeri arni hara wa, tsuwa ga aɗiya yafitə mama'ni wa.

¹⁵Ka gə ɗangtə bikər ɗa parang MTHLAKU, amma ka mdə fwari ata kəra ɗa turəku!

¹⁶Kamnyar mdə ngəni aɗi ɗar dzama abbər ka tsa dlar mdə wa, tsa ku kədlə mjir bwani, ka mji na ngguɗi, ka mji na ka ɗəffə ɓzəɓza har ka tsi ɗa.

¹⁷Tsa hir shuwumta mji, antə ka gə shuwumta ni! Tsa aɗiya ana bara su ɓɗaku aka mdə wa, antə ga aɗiya hara alari ɓɗakkur wa.

¹⁸Tsa hir shuwumta mda ka duna apa ləptər ha arni, antə ka shushukur ləkwa dzari apa yimi ka səm dzari ba akwa ɗethlər ni apa mal.

¹⁹Ka shushukur tam ni ka mbwahə ni apa zhaɓi, ka ndzi adzə ni parang apa sur mbwa kusara mda!

²⁰MTHLAKU, ka gə ɗi dawayeri arna ka suayeri ngəni, ka suayeri ngəni wutə mji na ana mnya ata kəri ni!

²¹Amma MTHLAKU, ga an mthlakərna, dlar ra usa, kamnyar səliyir thləma ga, kara msərantə ra kamnyar hirkurər nga na ana palidzə wa ni!

²²Kamnyar I mdər bwani ka tursu antə ɗəffi akwa mba ra.

²³I abaka sha apatə shanggur ana sha ma pci ku təri, mda akwa ɓumta ra apatə shambar ana ɓumta ntsəkwa.

²⁴Ɓunji ku ndzi kula duna kamnyar asham, dzi ku thlarəmtadzi kazhar ɗethlu.

²⁵I ku ndzi sur kumshi aka mji, da ana kənggələmta kəra ɗa ma da wutə ra.

²⁶Dlar ra bu, MTHLAKU na Hyelərna, mbantə ra kamnyar hirkurər nga na ana palidzi wa ni.

²⁷Hara ka da sənda abbər ga an akwa hara su ngəni, abbər MTHLAKU, gə sur nga an mbantə ra.

²⁸Antə zhar ɗa ka da shuwumta ra ma da hira, amma ar nga ga ata ləkəma ka vədzə ali barka, ma da ku si ka mpa ra, kara kəli səliyir ɗa, antə ga ata hara kəi nggatə msərakur ndzi buɗar nga!

²⁹Hara ka mjir nggənggəl ra ləkwa sur səli, ka sur səli ndzi ala ɗa apa ləptər ɗa.

³⁰I ata usar nga tədəku, MTHLAKU, I ata hu nga akwa tsaptədzər mjir nga.

³¹Kamnyar ga ana dlar mjir bwani, ka mbantə ɗa ta mji athlamta ala ɗa shariyar mta.