Read bura-pabir Zabura 110 Bible Online

Zabura 110 - bura-pabir bible

Zabura 110

¹Ha ar Dauda. MTHLAKU ku pəla aka mthlakərna, “Ndzəndzi abwa mazəmi, tar ma I ku namtə dawayeri ar nga ka da ndzi kulahər putə səla ga.”

²MTHLAKU na akwa Sihiyona ata hamta ala gə zwalər kuthlikur. Ga ata hara kuthlikur ata kəra dawayeri ar nga!

³Vir tə ga ata ra dlər dawayeri ar nga, mjir nga ata hamta kərɗa ka hirər ɗəffa ɗa. Ga ata hatə ləptər olkurər nga ka mbəlmbəla apa pcir balti ka duna ga.

⁴MTHLAKU ku kurtə kətə alkawal, antə tsa aɗi ata ɓəliyari wa, abbər, “Ga ku ndzi prist har ba saka madi, tsu apa Melkizedek.”

⁵MTHLAKU aɗi abwar mazəma ga, tsa ata kurəmta kuthlyayeri ma vir tə ɗəffari ku ɓzi.

⁶Tsa ata thlamta shariya aka mjir duniya, ka jaɓumta kəra shanga dawayeri arni, ka zhar mshiyir ɗa leɓleɓu akwa kəlara bwa akwa duniya.

⁷Tsa ata sa yimər zərkəu ar mnya laku antə tsa ata səma akwa shanga su.