Read bura-pabir Zabura 115 Bible Online

Zabura 115 - bura-pabir bible

Zabura 115

¹Aɗi ala yeru wa, MTHLAKU, aɗi ala yeru wa, amma ka shanga səli ndzi ala gə shinga, kamnyar hirkurər nga na ana palidzə wa ka jirkurər nga.

²Kamnyar mə tə mjir duniya ana pəla, “Ama Hyelər giri nə ri?

³Hyelər yeru akwa vəi na amtazi, tsa ana hara su tə ɗəffari hira.

⁴Haptayeri arɗa an adzərfa ka dinar, tsiya mda an nam ɗa.

⁵Da ka mnya, amma ar gari wa, da ka nca, amma ar wutə su wa.

⁶Da ka thləm, amma ar nggatə su wa, da ka kucir, amma ar nggatə shiwur su wa.

⁷Da ka tsi, amma ar kəsi su wa, da ka səl, amma ar mwa wa, kuraku amzhi səɓəla akwa ghwarghwara ɗa wa.

⁸Mji na namtə ɗa, ka mji na mbərsa ka da, shanga ɗa ndzi apa haptayeri ni.”

⁹Giri na mjir Israila ka giri mbərsa ka MTHLAKU! Tsa andər dlar giri ka ɓəlatə giri.

¹⁰Giri na kutakəyir Haruna, ka giri mbərsa ka MTHLAKU! Tsa andər dlar giri ka ɓəlatə giri.

¹¹Giri na ana thlivər ɗəffa MTHLAKU, ka giri mbərsa ka tsa, Tsa andər dlar giri ka ɓəlatə giri.

¹²MTHLAKU akwa ɗangtə mburu, antə tsa ata vədzə barka ala mburu. Tsa ata vədzə barka aka mjir Israila, ka vədzə barka aka kutakəyir Haruna.

¹³Tsa ata vədzə barka aka mji na ana thlivər ɗəffari, ola ka ntsaha ata kəma duku.

¹⁴Ka MTHLAKU hara ka giri jaka, giri kəga maɗa' giri!

¹⁵Ka MTHLAKU vədza ala giri barka, tsa na namtə vəi na amtazi ka duniya!

¹⁶Vəi na amtazi an ar MTHLAKU, amma duniya tsa hamta aka shanga mji.

¹⁷Mji mtəmta aɗi ana hu MTHLAKU wa, tsu apani tsuwa mji na ku ləghəi akwa kula.

¹⁸Amma mburu na ka mpika an ata mzhi hu MTHLAKU, kulini ka har ba saka madi. Hu gir MTHLAKU!