Read bura-pabir Zabura 116 Bible Online

Zabura 116 - bura-pabir bible

Zabura 116

¹I hir MTHLAKU, kamnyar tsa ana nggatə kurakəi, ka psi thləm aka adduwarna.

²Kamnyar tsa ana psi thləmari ali, antə I ata hara adduwa apatə I ka mpika.

³Sur tsi ra ku kalaktə ra akwa kəlara bwa, thlivər ləkwa kula ku tamtə ra, bwani ka sur ɓzamtə ɗəffu ku wutə ra.

⁴Antə I hara adduwa akwa thləma MTHLAKU abbər, “MTHLAKU, dlar ra kara mbantə ra bu!”

⁵MTHLAKU ana kətadzə mda ka hara ɓɗakkur aka mda, Hyelər mburu ana kətadzə mda.

⁶MTHLAKU ana ɓəlatə mji na ka tərghəi kər, sakatə I akwa asar tsa ku mbantə ra.

⁷Ɗəffi, peri hangkala ga, kamnyar MTHLAKU ku hara ɓɗakkur ala ga.

⁸Kamnyar MTHLAKU ku mbantə ra ta mta ka famta shimwi ata nci, ka ngkatə ta I atsamta səli.

⁹Kamnyar ngəni I ata mwa akəma MTHLAKU akwa duniyar mji na mpikə ni.

¹⁰I ku kəsi hamta jirərna, wala tə I pəla, “I ku dəkəidzi ka duna” ni.

¹¹Akwa sakatə hangkali ndəndatədzi, I ku pəla, “Mda aɗi tə mda amzhi mbərsatə ka tsa wa.”

¹²Man tə I ata mzhi hamtari aka MTHLAKU, kamnyar ɓɗakkur tə tsa ana hara ali ri?

¹³I ata səntə saɗakar yimər anap aka MTHLAKU, kəi usar ni kamnyar mbantədzi tə tsa hara ali.

¹⁴I ata nghyaɓəla alkawalərna aka MTHLAKU, akwa tsaptədzi ar mjirni.

¹⁵Ana ndzi sur damitədzi ka duna aka MTHLAKU, kəlara sakatə mji na hir ni ku mti.

¹⁶Jiri, MTHLAKU, I buɗar nga, jiri, I mafar nga, ɓzər mwala mafar nga. Ga an mpəli ra akwa məsəsal ni.

¹⁷I ata hamta ala gə saɗakar gwaɗita kəi hara adduwa ala ga, MTHLAKU.

¹⁸I ata nghyaɓəla alkawal natə I kəta aka MTHLAKU, akəma tsaptədzi ar mjir nga,

¹⁹akwa bəbal kutakəi ar MTHLAKU, na akwa Urushalima. Hu gir MTHLAKU!