Read bura-pabir Zabura 118 Bible Online

Zabura 118 - bura-pabir bible

Zabura 118

¹Usar gir MTHLAKU, kamnyar tsa ana hara ɓɗakkur, kamnyar hirkurərni na ana palidzi wa an ba saka madi.

²Ka mjir Israila pəla, “Ba saka madi hirkurərni aɗi ana palidzi wa.”

³Ka kutakəi Haruna pəla, “Ba saka madi hirkurərni aɗi ana palidzi wa.”

⁴Ka mji na ana thlivər ɗəffa MTHLAKU pəla, “Ba saka madi hirkurərni aɗi ana palidzi wa.”

⁵Sakatə I akwa ɗar bwani I ku hara adduwa aka MTHLAKU, antə tsa shinau ali ka msərantə ra.

⁶Təng tə I ka MTHLAKU adzə ra, su aɗi tə I ata thlivərari wa. Man tə mda ata mzhi hara ali ri?

⁷MTHLAKU adzə ra kamnyar ka tsa dlar ra, antə I ata nggyari dawayeri arna kasəla.

⁸Kuji ka mdə mbərsa ka MTHLAKU, ta ka mdə mbərsa ka mda.

⁹Kuji ka mdə bara ɗuwardzi adzə MTHLAKU, ta ka mdə mbərsa ka mjir kuthlikur.

¹⁰Wala tə tsəɗiyayeri na ɗimi ku kalaktə ra, I ku kuri ka da tə barkar dunar MTHLAKU!

¹¹Da kalaktə ra akwa kəlara bwa, amma I ku kuri ka da tə barkar dunar MTHLAKU!

¹²Da kalaktə ra ka pungkərdzi ali apa cirməma, amma mdə ku mbamta ɗa təkəma apa kusar akwa u'u, I ku kuri ka da tə barkar dunar MTHLAKU!

¹³Mdə ku ngyingyihə ra ka duna, har tə I abaka ndla, amma MTHLAKU ku dlar ra.

¹⁴MTHLAKU andər dunautə ra ka ɓəlatə ra, tsa mdər mbantə ra.

¹⁵Kurakər kucali ka nggyari su akwa səɓəla akwa tentər mjir Hyel akwa pəla, “MTHLAKU an kəthlər ka dunari, ka haratə suayeri ngəni ol'ol ni!

¹⁶Mdə ku haptə tsiya MTHLAKU na abwa mazəm, MTHLAKU an kəthlər ka dunari, ka haratə suayeri ngəni ol'ol ni!”

¹⁷I aɗi ata mtə wa, I ata ndzi ka mpika kəi ngkər su tə MTHLAKU ku hara.

¹⁸MTHLAKU ku ɗi ra ka duna, amma tsa aɗi hir zhar ra kəi mtə wa.

¹⁹Kəlar ali nyarfayeri natə mjir jirkur ana ləkwa ni, kamnyar kəi ləvəi akwa da, ka usar MTHLAKU!

²⁰Ngəni an nyarfur mwari adzə MTHLAKU, natə mjir Hyel ana nu ka ləvəi akwa ni.

²¹I akwa usar nga, kamnyar ga ku amsa ali adduwarna, kamnyar ga andər mbantə ra.

²²Pela natə mjir hən mbwa ku nggəlari, ku sə ndzi pela na ɓɗakta shang ar kuɗəmar səla mbwa.

²³Ngəni an su tə MTHLAKU hara, tsuwa tsa ku ndzi surndata ala mburu!

²⁴Ngəni an vir kucali na ola tə MTHLAKU ɗəmha, antə mburu ahara kucali ka ɓathla!

²⁵Mbantə yeru bu, MTHLAKU, mbantə yeru bu, usa! Hara ka yeru səm bu, MTHLAKU!

²⁶Ka Hyel vədzə barka aka kuthli na ata si akwa thləma MTHLAKU ni! Yeru akwa kiɗa ala giri barka azi akwa mbwar MTHLAKU.

²⁷MTHLAKU an Hyel, tsa an hamta ala mburu parakəu. Ləkwa giri layi ka thlali dipənau akwa tsiya giri ka giri baɗitə ɓathla, har ka giri mwari adzə təmbəla bagaɗi ni.

²⁸Ga an Hyelərna, antə I ata usar nga, ga an Hyelərna, antə I ata haptə thləma ga.

²⁹Usar gir MTHLAKU, kamnyar tsa ana hara ɓɗakkur! Kamnyar ba saka madi hirkurərni aɗi ana palidzi wa!