Read bura-pabir Zabura 119 Bible Online

Zabura 119 - bura-pabir bible

Zabura 119

¹Msəra aka mji na ana hara su akwa laku na kalkalari, mji na ana nu tsawur MTHLAKU.

²Msəra aka mji na ana ɓəla tsawayeri arni mji na ana bara ni ka ɗəffa ɗa shang.

³Da aɗi ana hara su na kalkal wa wa, amma da ana mwa akwa lakurni!

⁴MTHLAKU, ga ku hamta ala yeru tsawayeri ar nga, natə ka yeru kəsi ɓɗaku.

⁵I hir abbər kəi nu nga ka jirkur, akwa ɓəlatə suayeri tə gə tsawa abbər ka mdə hara ni!

⁶Antə I aɗi ata ləkwa səli wa, kamnyar I ku putə nci ata kəra tsawayeri ar nga.

⁷Ma sakatə I ku thliptə tsawayeri ar nga na ka jirkur ni, antə I ata hu nga ka jirkur.

⁸I ata ɓəlatə tsawayeri ar nga, ga aɗiya fwari ata kəri swakti wa.

⁹Apa madi tə maɗadakwi ata mzhi namtə ndzəndziyir ɗa kəcəkəcari ri? Atar kələngkər aka ndərər nga.

¹⁰Ka ɗəffi shang antə I ana bara nga, ga aɗiya zhar ra kəi pəra kazhar tsawayeri ar ngə wa!

¹¹I ku kəsi ndərər nga akwa ɗəffi, kamnyar ta I ahara biku ala ga.

¹²I akwa hu ngə, MTHLAKU, thlipa ali tsawayeri ar nga.

¹³I ana haptə kurakəi kəi jikaɓəla aka mji, shanga tsawayeri tə gə hamta.

¹⁴I ana nggatə msərakur nu tsawayeri ar nga, apatə mda ana kucali kamnyar ndzi ka gəna.

¹⁵I ana dzama ata kəra surthlipayeri ar nga, kəi wul laku tə ga ana hara su akwa.

¹⁶I ana nggatə msərakur tsawayeri ar nga, I aɗi ata fwari ndərər ngə wa.

¹⁷Hara ɓɗakkur ali, I na buɗar nga, kamnyar kəi ndzi ka mpika ka nu ndərər nga.

¹⁸Kəlar nci kamnyar kəi wulɓəla jirkur na ana ndatə mda akwa tsawur nga.

¹⁹I mətəpi akwa duniya ngəni, ga aɗiya ɗuwar tsawayeri ar nga ali wa!

²⁰Ɗəffi akwa mba ra ka duna tədəku, kamnyar mwaɓər tsawayeri ar nga.

²¹Ga ana mpa aka mji na hir gaya, mji na shushuwari, mji na ku pəra kazhar tsawayeri ar nga.

²²Ga aɗiya zhar ka da rutə ra ka nggənggəl ra wa, kamnyar I ku ɓəlatə tsawayeri ar nga.

²³Wala tə kuthlyayeri ku ndzəndzi akwa ɗəmhə ɗimikur ata kəri I ata ləkəma ka dzama ata kəra tsawayeri ar nga.

²⁴I ana nggatə msərakur ar tsawayeri ar nga, da ana hamta ali sauri.

²⁵I ku pəpəi akwa bərbər, mbantə ra apatə ga ku kətə alkawalari!

²⁶I ku jikaɓəla ala gə suayeri tə I hara, antə ga ku hamta ali amsar ɗa. Antə kulini thlipa ali tsawayeri ar nga.

²⁷Dlar ra kəi nggaɓəla tsawayeri ar nga, antə I ata dzama ata kəra surndatayeri tə gə hara ni.

²⁸Ɗəffə ɓzəɓza ku təra duni, dunautə ra apatə ga ku kətə alkawalari.

²⁹Ndəkəmta ra ka halər thlandəra, ka gə dlar ra ka thlipa ali tsawur nga.

³⁰I ku carɓəla abbər I ata ndzi ka jirkur, ka vu hangkali akwa tsawayeri ar nga.

³¹I ku nu tsawayeri ar ngə, MTHLAKU, ga aɗiya zhar ra kəi ləkwa sur səli wa!

³²Ka ufti antə I ata nu tsawayeri ar nga, kamnyar ga ata jaka ali nggaɓəlar su.

³³Thlipa ali karapur tsawayeri ar nga, antə I ata ɓəlatə ɗa har tsikərari.

³⁴Dlar ra kəi nggaɓəla tsawur nga, kəi ɓəlata, antə I ata kəsiyari ka ɗəffi shang.

³⁵Dlar ra kəi nu laku natə tsawur nga pəla kəi nuwa, kamnyar I ana nggatə msərakurari.

³⁶Hara kəi ndzi ka mwaɓər ɓəla tsawayeri ar nga, ata vəya bara kəi ndzi ka gənar ɗimikur.

³⁷Shinamta kəmi kazhar suayeri na gapani, kamnyar kəi wutə mpika atar nu lakur nga.

³⁸Nghyaɓəla alkawal tə ga ku hara ali I na buɗar nga, alkawal natə ga ku hara aka mji na ana thlivər nga.

³⁹Kələmta ali sur səli natə I akwa thlivərari, kamnyar tsawayeri ar nga an ɓɗaku!

⁴⁰I akwa mwaɓər kələngkər aka tsawayeri ar nga, hara ali ɓɗakkur ka gə namtə ndzəndziyirna.

⁴¹Ncanta ali hirkurər nga na ana palidzi wa ni, MTHLAKU, antə kara mbantə ra apatə ga ku hara alkawalari.

⁴²Antə I ata mzhi shinau aka mji na ana nggəl ra, kamnyar tə I ku mbərsa ka ndərər nga.

⁴³Dlar ra kəi pəla jirkur tədək saka, kamnyar I ana vəkər ka tsawayeri ar nga.

⁴⁴I ata ləkəma ka ɓəla tsawur nga har har ba saka madi.

⁴⁵I ata mwa akwa msərmsərkur, kamnyar tə I akwa kələngkər aka tsawayeri ar nga.

⁴⁶I ata pəla tsawayeri ar nga aka kuthlyayeri, kula sur səli.

⁴⁷I ana nggatə msərakur kələngkər aka tsawayeri ar nga, kamnyar tə I hir ɗa.

⁴⁸I ana nar daraja aka tsawayeri ar nga, tsuwa I ana hir ɗa, tsuwa I ata dzama ata kəra tsawayeri ar nga tədəku.

⁴⁹Ɗangtə alkawalər nga ali, I na buɗar nga, kamnyar an su tə I vəkər kari.

⁵⁰Ngəni an su na ana shiktə ra wala akwa bwani, kamnyar alkawalər nga ana dunautə ra.

⁵¹Mjir gaya ana rutə ra ka duna, amma I aɗi ndəkə ka tsawur ngə wa.

⁵²Ma I ɗangtə tsawayeri ar nga na waci, MTHLAKU, da ana shiktə ra.

⁵³Kəlara sakatə I wutə mji na ɗimi akwa ɓəli tsawur nga, ɗəffi ana ɓza ka duna.

⁵⁴Tsawayeri ar nga ku ndzi hayeri ali, akwa shanga ndzəndzi mətəpikurər na akwa duniya.

⁵⁵Aviri I ana ɗangtə thləma ga MTHLAKU, ka ɓəlatə tsawur nga.

⁵⁶Ngəni an su tə I ana hara tədəku, I ana ɓəla tsawayeri ar nga.

⁵⁷MTHLAKU, ga an su tə I carɓəla, I ku kətə alkawal ar ɓəlatə tsawayeri ar nga.

⁵⁸I akwa kiɗə nga ka ɗəffi shang, kara kətadzə ra apatə ga ku kətə alkawalari!

⁵⁹I ku dzama ata kəra surhararna, antə I ku tubi kəi nu tsawayeri ar nga.

⁶⁰Kula shamta saka, I ata hangkər kəi ɓəlatə tsawayeri ar nga.

⁶¹Wala tə mji na ɗimi ku mbwahə ra ka səwa, I aɗi fwari tsawur ngə wa.

⁶²Akwa kərathlər viri, I ana thlata, kəi hu nga, kamnyar ga ana hara shariyar nga ka jirkur.

⁶³I an pazhir shanga mji na ana thlivər nga, ka pazhir shanga mji na ana ɓəla tsawur nga.

⁶⁴MTHLAKU, hirkurər nga na ana palidzi wa ni ku nghyantə duniya ni, thlipa ali tsawayeri ar nga.

⁶⁵Ga ana hara ali ɓɗakkur, MTHLAKU, apatə ga ku pəla.

⁶⁶Hamta ali ɗəɗukur ar səndər su, kamnyar I ku mbərsa ka tsawayeri ar nga.

⁶⁷Akəma ta kəi ɗar bwani, I ku pəra kazhar lakur nga, amma kulini I akwa ɓəla ndərər nga.

⁶⁸Ga ana hara ɓɗakkur, antə ga akwa hara ɓɗakkur, thlipa ali tsawayeri ar nga.

⁶⁹Mjir gaya ana thlandər ata kəri, amma ka ɗəffi shang antə I ana ɓəlatə tsawayeri ar nga.

⁷⁰Ɗəffa ɗa ku ndzi ɓəɓal apa pela, amma arna I ana nggatə msərakur tsawur nga.

⁷¹Ku hara kalkal tə I ɗar bwani, kamnyar ku vu ra kəi thlipə tsawayeri ar nga.

⁷²Tsawur nga ku təramta ali dinar ka adzərfa dəpu dəpu.

⁷³Ga an ɗəmhə laku tə I ata ndzi akwa ka həntə ra, Na ali dunar nggaɓəla su kəi thliptə tsawayeri ar nga.

⁷⁴Mji na ana thlivər nga ata wutə ra ka da hara kucali, kamnyar I ana mbərsa ka alkawalər nga.

⁷⁵I asənda, MTHLAKU, abbər tsawayeri ar nga an kalkal, tsuwa akwa jirkurər nga antə ga ku hara bwani ali.

⁷⁶Antə kulini ka hirkurər nga na ana apalidzi wa ni shiktə ra, apatə ga ku kətə alkawalari ali, I na buɗar nga.

⁷⁷Kətadzə ra, kamnyar kəi ndzi ka mpika, kamnyar tə I ana nggatə msərakur tsawur nga.

⁷⁸Hara ka mjir gaya ləkwa səli kamnyar thlandəra ata kəri, amma arna I ata vədzə hangkali aka tsawayeri ar nga.

⁷⁹Hara ka mji na ana thlivər nga ngka adzə ra, shanga mji na asəndə tsawayeri ar nga.

⁸⁰Hara kəi ndzi mdər kələngkər aka tsawayeri ar nga ka jirkur, kamnyar ta I aləkwa səli.

⁸¹I ku ghəri akwa səkə nga ka ra mbantə ra, I akwa vəkər ka su tə gə pəla.

⁸²Nci ku ghəra akwa sək kəma ga ata kəra alkawal tə gə hara ali. Nawa antə ga ata sə shiktə ra ri?

⁸³Wala tə I ku ndzi apa zamzamiya na tatədzi ka ɗer, I aɗi fwari tsawayeri ar ngə wa.

⁸⁴Har ka mwanta aka saka madi antə I ata ləkəma ka səkari nə ri? Nawa antə ga ata ɗi mji na ana hara bwani ali nə ri?

⁸⁵Mjir gaya ku lamta ali kur ɗimikur, mji na aɗi ana kələngkər aka tsawur ngə wa.

⁸⁶Shanga tsawayeri ar nga mda ata mbərsatari, dlar ra, kamnyar mji akwa hara bwani ali kula suari aɗi!

⁸⁷Mbil raka ka da kuri ka iya, amma I aɗi zhar nu tsawayeri ar ngə wa.

⁸⁸Atar hirkurər nga na ana palidzi wa ni ka gə tsəlpi ra, kamnyar kəi mzhi ləkəma ka ɓəla tsawayeri ar nga.

⁸⁹MTHLAKU, ndərər nga ata ndzi ba saka madi tsa an ncinciyari gyang akwar amtazi.

⁹⁰Jirkurər nga ata ndzi aka shanga zamanayeri, ga ku vəi duniya antə tsa ku nci dzi gyang.

⁹¹Tsawayeri ar nga an gyang ba ashina, kamnyar shanga ɗa akwa hara kəthlər ala ga.

⁹²Ma abbər I an ka nggatə msərakur tsawur ngə wa, sakani I ku mti akwa bwaniyayeri tə I ɗari ni.

⁹³I aɗi ata fwari tsawayeri ar ngə wa, kamnyar atar nu ɗa antə ga ku mbantə ra.

⁹⁴I an ar nga, mbantə ra! Kamnyar I ku kəɗari abbər kəi ɓəlatə tsawayeri ar nga.

⁹⁵Mji na ɗimi akwa səkə ka da tsi ra, amma I akwa dzama ata kəra tsawayeri ar nga.

⁹⁶I ku nggaɓəla abbər shanga su ka datari, amma tsawur nga an kula vəi data.

⁹⁷I hir tsawur nga ka duna! I ana ɓukci akwa dzama ata kər.

⁹⁸Tsawur nga akwa kəri parang saka, tsa ana namtə ra ɗəɗu ta dawayeri arna.

⁹⁹I ana nggaɓəla su ta shanga maləmayeri arna, kamnyar tə I ana dzama ata kəra tsawayeri ar nga.

¹⁰⁰I ku təramta mji na maɗiya ka nggaɓəlar su, kamnyar tə I ana ɓəlatə tsawayeri ar nga.

¹⁰¹I ku nggəlar hara shanga su na ɗimi, kamnyar kəi ɓəlatə ndərər nga.

¹⁰²I aɗi zhar nu tsawayeri ar ngə wa, kamnyar ga ku thliptə ɗa ali ɓɗaku.

¹⁰³Msərakur ndər ar nga ku təramta ali, msərakur cirməma!

¹⁰⁴Akwa tsawayeri ar nga antə I ku nggaɓəla su, har tə I ku nggəlar shanga laku na ɗimi.

¹⁰⁵Ndərər nga an pitəla na ana pwar ra, ka parakəu ar lakurna.

¹⁰⁶I ata kəsi alkawal tə I kəta, kəi kələngkər aka tsawayeri ar nga kamnyar da an kalkal.

¹⁰⁷I akwa ɗar bwani ka duna, MTHLAKU, mbantə ra usa apatə ga ku kətə alkawalari.

¹⁰⁸Dlu saɗakayeri ar huwa arna, MTHLAKU, kara thlipa ali tsawayeri ar nga.

¹⁰⁹Parang I akwa kəl mpikəi akwa tsi, amma I aɗi ana fwari tsawur ngə wa.

¹¹⁰Mji na ɗimi ku nggəi dərku ali, amma I aɗi zhar nu tsawayeri ar ngə wa.

¹¹¹Tsawayeri ar nga an gənarna ba saka madi, da andər hara kəi ndzi ka kucali.

¹¹²I ku vu ɗəffi abbər I ata ɓəla tsawayeri ar nga, ba saka madi, har kurər mpikəi.

¹¹³I ku nggəlar mji na ana nu nga ka ɗəffa ɗa suɗsuɗa, amma I hir tsawur nga.

¹¹⁴Ga an vəi ɗuwardzi arna ka partauwurna, I akwa vəkər ka alkawal tə ga hara ali.

¹¹⁵Tərar girdzi kazhar ra, giri na mjir ɗimikur. I ata ɓəla tsawur Hyelərna.

¹¹⁶Na ali duna apatə ga ku kətə alkawalari, antə I ata ndzi ka mpika, ga aɗiya zhar kəi ləkwa səli ata kəra su tə I vəkər kari wa!

¹¹⁷Kəsi ra antə I ata ndzi lapiya, kəi ləkəma ka vədzə hangkal aka tsawayeri ar nga.

¹¹⁸Ga ana nggəlar shanga mji na ana nggəlar tsawayeri ar nga, Jiri, kwasherikurər ɗa ni shang gapani.

¹¹⁹Ga ana pumta shanga mjir ɗimikur apatə mda ana pumta diɗi, apani arna I hir tsawayeri ar nga.

¹²⁰Dzi akwa kədza kamnyar I akwa thlivər nga, I akwa thlivər shariyar nga.

¹²¹I ku hara su na ɓɗaku ka kalkal, ga aɗiya zhar ra akwa tsiya mjir hara bwani ali wa.

¹²²Kəta alkawal abbər ga ata dlar ra I na buɗar nga, ga aɗiya hir ka mji na ka ɗəffər olkurər ɗar bwani ali wa.

¹²³Nci ku ghəra akwa sək kəma ga ka gə mbantə ra, ka kamnyar ka gə nghyaɓəla alkawalər jirkur tə gə kəta.

¹²⁴Ncantə hirkurər nga na ana palidzi wa ni aka buɗar nga, ka gə thlipa ali tsawayeri ar nga.

¹²⁵I an buɗar nga, na ali nggaɓəlar su, kamnyar kəi səndə tsawayeri ar nga.

¹²⁶MTHLAKU, ngəni an sakatə kalkal ka gə hara su, kamnyar mji akwa nggəlar kələngkər aka tsawur nga

¹²⁷I hir tsawayeri ar nga təramta dinar, har təramta dinar na ɓɗakta shang.

¹²⁸Antə I akwa nu shanga tsawayeri ar nga, I ana nggəlar shanga lakwayeri na aɗi kalkal wa.

¹²⁹Tsawayeri ar nga ana ndatə mda, an su na hara tə I ana kələngkər ala ɗa.

¹³⁰Nggaɓəla surthlipər nga ana hamta parakəu, ka hara ka mji na kula səndə ndzi ɗəɗu.

¹³¹I ana mwaɓə tsawur nga ka duna, I ana kələmta mnyi hakhaku kamnyar dluwari.

¹³²Shinar kəma ga təbwarna kara kətadzə ra, apatə ga ana hara aka mji na ana hir thləma ga.

¹³³Tsəlpitə mwar na apatə ga ku kətə alkawalari, ga aɗiya zhar ka biku mula ali wa.

¹³⁴Msərantə ra ta mjir hara ali bwani kamnyar kəi ɓəlatə tsawayeri ar nga.

¹³⁵Wul ra ka ncar hirkur, kara thlipa ali tsawayeri ar nga.

¹³⁶Shimwiyirna akwa pumtadzi apa yimər zərkəu, kamnyar tə mji aɗi akwa kələngkər aka tsawur ngə wa.

¹³⁷Ga ana hara su na kalkal, MTHLAKU, tsuwa shariyayeri tə ga ana thlamta an kalkal.

¹³⁸Ga ku pwi tsawayeri na ka jirkur, shanga ɗa mda ata mbərsa ka da.

¹³⁹Ɗəffi ata mba ra apa u'u, kamnyar dawayeri arna akwa gyal ka tsawayeri ar nga.

¹⁴⁰Alkawalayeri ar nga an kətərkətərari, antə I hir ɗa ka duna!

¹⁴¹I aɗi suma wa, mdə ku rutə ra, amma wala apani I aɗi fwari surthlipər ngə wa.

¹⁴²Jirkurər nga an jirkur na ata ndzi ba saka madi, surthlipər nga tsuwa an jiri.

¹⁴³Bwani ka damitədzi ku pungkərdzi ali, amma I ana nggatə msərakur tsawayeri ar nga.

¹⁴⁴Tsawayeri ar nga an kalkal har ba saka madi, na ali nggaɓəlar su kəi ndzi ka mpika!

¹⁴⁵I akwa hara adduwa ala gə ka ɗəffi shang, shinau ali, MTHLAKU, antə I ata ɓəlatə tsawayeri ar nga.

¹⁴⁶I akwa kiɗə kara mbantə ra, antə I ata nu tsawayeri ar nga.

¹⁴⁷I thlata akəmata viri akura ka hara adduwa ka gə dlar ra, I akwa vəkər ka alkawalayeri ar nga.

¹⁴⁸I ku pi ata wula pangndlang viri, akwa dzama ata kəra tsawayeri ar nga.

¹⁴⁹Kamnyar hirkurər nga na ana palidzi wa ni, psi thləm ali, MTHLAKU, kətadzə ra, kara mbantə mpikəi!

¹⁵⁰Mji na ka ɗimikur akwa ɗəffa ɗa akwa shahədzi kudzəha, mji na aɗi ana ɓəla tsawur ngə wa.

¹⁵¹Amma ga kudzəhə ka iya MTHLAKU, tsuwa shanga tsawayeri ar nga an jiri.

¹⁵²Təng waci antə I thliptə tsawayeri ar nga, abbər ga ku pwi ɗa ka da ndzi har ba saka madi.

¹⁵³Wul jili bwani tə I akwa, kara mbantə ra, kamnyar tə I aɗi nggəlar tsawur ngə wa.

¹⁵⁴Mbuli ra, kara msərantə ra, mbantə ra apatə ga ku kətə alkawalari.

¹⁵⁵Ata ndzi mwavər ka mji na ɗimi wutə mbantədzi, kamnyar da aɗi ana kələngkər aka tsawayeri ar ngə wa.

¹⁵⁶MTHLAKU, ga ana kətadzə mda ka duna, mbantə ra apatə ga ku tsəli ka harari.

¹⁵⁷I ka dawayeri ka mjir bwani ali hang, amma wala apani I aɗi zhar kələngkər aka tsawayeri ar ngə wa.

¹⁵⁸I ana wul mji na kula jirkur apa sur cika, kamnyar tə da aɗi ana kəsi tsawayeri ar ngə wa.

¹⁵⁹Wuta apatə I ku hir tsawayeri ar nga MTHLAKU. Mbantə ra kamnyar hirkurər nga na ana palidzi wa ni!

¹⁶⁰Shanga tsawayeri ar nga an jirkur, tsuwa shanga shariyar jirkur tə ga ana hara ata ndzi ba saka madi.

¹⁶¹Mjir kuthlikur akwa hara ali bwani kula suari aɗi, amma I akwa thlivər tsawur nga.

¹⁶²I ka kucali ata kəra alkawalayeri ar nga apa mdə na wutə gəna hang.

¹⁶³I ana nggəlar ka cikə thlandəra, amma I ana hir tsawur nga.

¹⁶⁴I ana hu nga akwa vir pal ka murfa, kamnyar shariyayeri ar nga ka jirkur.

¹⁶⁵Mji na hir tsawur nga ana ndzi akwa msərakur na ola, su aɗi na ata vu ɗa ka da tsamta səla ɗa wa.

¹⁶⁶I akwa səkə nga kara mbantə ra, MTHLAKU, tsuwa I akwa hara shanga su tə gə tsawa.

¹⁶⁷I ana kələngkər aka thlipayeri ar nga, I hir ɗa ka duna.

¹⁶⁸I ana kələngkər aka tsawayeri ar nga, ka suayeri tə ga ana pəla, kamnyar ga ana wutə kəlara su tə I ana hara.

¹⁶⁹Nggatə tuwarna bu, MTHLAKU. Na ali nggaɓəla su apatə ga ku hara alkawalari!

¹⁷⁰Psi thləm ali kara nggatə adduwarna, kara mbantə ra apatə ga ku kətə alkawalari.

¹⁷¹I ata hu nga tədəku, kamnyar ga ana thlipa ali tsawayeri ar nga.

¹⁷²I ata hara ha ata kəra tsawur nga, kamnyar tsawayeri ar nga an kalkal.

¹⁷³Ndzi ɗəmhəɗəmhari tədəku kamnyar dlar ra, kamnyar I ku carɓəla abbər I ata nu tsawayeri ar nga.

¹⁷⁴I akwa səkə nga kara dlar ra MTHLAKU, tsuwa I ana nggatə msərakur tsawur nga.

¹⁷⁵Zhar ra ka mpika, kamnyar kəi hu nga, tsuwa ka tsawayeri ar nga dlar ra.

¹⁷⁶I ku pəra kazhar laku apa təma na ku sha, antə mwa kara sə pakə buɗar nga, kamnyar I aɗi ana fwari tsawayeri ar ngə wa.