Read bura-pabir Zabura 132 Bible Online

Zabura 132 - bura-pabir bible

Zabura 132

¹Ha ar ndləɓəla akwa Urushalima. MTHLAKU, ɗangtə Dauda, ka shanga bwani tə tsa nggita.

²Ɗangtə Alkawal tə tsa hara ala ga, MTHLAKU, alkawal tə tsa kəta ala ga, Hyelər Yakub na ka Duna, abbər

³“I aɗi ata ləvəi aharngkəya wa, wala ra pəpəi ata vəi piyirna wa.

⁴I aɗi ata nar heni aka nci wa, wala hartə nci abbər I akwa nggətə heni wa,

⁵tar ma I ku wutə vəi latə mbwa aka MTHLAKU, vəi tə Hyelər Yakub na ka Duna ata ndzi akwa.”

⁶Nggədza yeru ku nggata abbər, Akwati Alkawal ni ahar Bethlelehem, antə yeru sə wutə ni ciju akwa mtakər Yaar.

⁷Antə yeru pəla, “Mbura mwari akwa vəi ndzəndziyir MTHLAKU, ka mburu zuzuri akəmari!”

⁸Thlata, MTHLAKU, kara mwari akwa vəi ghərəmtaghəra ar nga, ga ka akwatiyir ncantə dunar kuthlikurər nga.

⁹Ka pristayeri ar nga hara su na kalkal tədəku, ka mjir nga hara kucali ka kuraku!

¹⁰Kamnyar Dauda na mafar nga, ga aɗiya nggəlar kuthli tə ga an vəi wa.

¹¹MTHLAKU ku hara alkawal na ɓəɓalari aka Dauda, alkawal tə tsa aɗi ata shariyari wa abbər, “I ata vətə pal akwa nca kəkayeri ar nga ka tsa hara kuthlikur aghəla ga.

¹²Ma maɗashilər nga ku kəsi alkawal arna, ka ɓəlatə shanga tsawayeri tə I hamta ala ɗa, maɗashilər ɗa ma ata sə dlu tsiya ɗa ka hara kuthlikur ba saka madi.”

¹³Kamnyar MTHLAKU ku kurtə carɓəla Urushalima, tsa ku bara ka tsa ndzi apa kəyirni.

¹⁴Tsa pəla, “Ngəni an vəi ghərəmtaghəra arna ba saka madi, azi antə I ata ndzəndzi, kamnyar I ku mwaɓta.

¹⁵I ata hamta alari shanga su tə tsa ata turari, kəi ndlantə shanga mjir tura na anda ka susəma.

¹⁶I ata hamta dunar mbantə mji aka pristayeri, antə mjirni ata sə hara ha ka kuraku kamnyar kucali.

¹⁷Azi antə I ata hara ka Dauda ndzi ka duna, azi antə kəlara kuthli tə I vəi ata sə ndzi apa pitəla aka mjirna.

¹⁸I ata vu ka dawayeri arni ləkwa səli, amma arni tsa ata ndzi kuthli na ka səli.”