Read bura-pabir Zabura 135 Bible Online

Zabura 135 - bura-pabir bible

Zabura 135

¹Hu gir MTHLAKU! Fwal gir thləma MTHLAKU! Fwal gir ni, giri na mjir hara kəthlər aka MTHLAKU,

²giri na ana kəthlər akwa kəyir MTHLAKU, akwa kuta bəbalər kəyir Hyelər mburu.

³Hu gir MTHLAKU, kamnyar tsa ana hara ɓɗakkur, fwal gir thləmari akwa ha kamnyar tsa ana hara ɓɗakkur.

⁴Kamnyar MTHLAKU ku carɓəla Yakub aka kərari, ka mjir Israila ka da ndzi ar kərari.

⁵Kamnyar I ku sənda abbər MTHLAKU an ola, abbər mthlakər mburu ku təramta shanga haptayeri.

⁶MTHLAKU ana hara shanga su tə tsa hira, amtazi ka akwa duniya, akwa mandayeri ka yimayeri na zurang.

⁷Tsa andər vu ka dlambayeri thlata akwa datər duniya, ka thlentə wurka ata kəma duku ka yimərhyel, ka shambar na ana səɓəla akwa mbwar pwi kariyirni.

⁸Tsa an tsəgəi shanga yarakəmayeri ar mji ka ar mwaɓi na akwa Masar,

⁹Tsa thlentə seɗayeri ka surndatayeri akwa Masar, kamnyar ɗi kuthli ni ka shanga mjir kəthlər alari.

¹⁰Tsa kurəmta mjir tsəɗiyayeri hang, ka thlagamta wulya kuthlyayeri na ka duna.

¹¹Sihon na kuthlir Amor, ka Og na kuthlir Bashan, ka shanga kuthlyayeri na akwa Kanana.

¹²Tsa hamta tsəɗiyir ɗa apa sur kifa aka mjirni Israila ka ndzi ar kəra ɗa.

¹³MTHLAKU, thləma ga ata ndzi har ba saka madi, thləma ga ata tuwa akwa shanga zamanayeri.

¹⁴Kamnyar MTHLAKU ata ncanta abbər mjirni kula biku, ka kətadzə shanga mji na ana kəthlər alari.

¹⁵Haptayeri ar mjir duniya an dinar ka adzərfa, su tə mji an nam ka tsiya ɗa.

¹⁶Da ka mnya, amma da aɗi ana mzhi gari wa, da ka nca, amma da aɗi ana mzhi wutə su wa.

¹⁷Da ka thləm, amma da aɗi ana mzhi nggatə su wa, wala mpikə ma da aɗi ana mpikə wa.

¹⁸Shanga mji na ana nam haptu ka mjir mbərsa ka haptayeri, an kalkal ka haptayeri ni!

¹⁹Hu gir MTHLAKU, shanga giri na mjir Israila, hu gir ni, shanga giri na akwa nyarmbwar Haruna!

²⁰Hu gir MTHLAKU, shanga giri na akwa nyarmbwar Lawi, hu gir ni, shanga giri na ana thlivər ɗəffa MTHLAKU!

²¹Hu gir MTHLAKU na akwa Sihiyona, kamnyar tsa ka ndzi akwa Urushalima! Hu gir MTHLAKU!