Read bura-pabir Zabura 136 Bible Online

Zabura 136 - bura-pabir bible

Zabura 136

¹Usar gir MTHLAKU, kamnyar tsa ana hara ɓɗakkur, kamnyar ba saka madi hirkurərni aɗi ana palidzi wa.

²Usar gir Hyel na ku təramta shanga hyelayeri, kamnyar ba saka madi hirkurərni aɗi ana palidzi wa.

³Usar gir MTHLAKU na ku təramta shanga mthlakayeri, kamnyar ba saka madi hirkurərni aɗi ana palidzi wa.

⁴Tsa duku andər hara surndatayeri na ol'ola, kamnyar ba saka madi hirkurərni aɗi ana palidzi wa.

⁵Tsa an namtə vəi na amtazi atar ɗəɗukurərni, kamnyar ba saka madi hirkurərni aɗi ana palidzi wa.

⁶Tsa an pshari di ata kəra yimayeri, kamnyar ba saka madi hirkurərni aɗi ana palidzi wa.

⁷Tsa an namtə parakayeri na ol'ola, kamnyar ba saka madi hirkurərni aɗi ana palidzi wa.

⁸Pci kamnyar ka tsa hara kuthlikur təpci, kamnyar ba saka madi hirkurərni aɗi ata palidzə wa,

⁹thliya ka sasəlkayeri kamnyar ka da hara kuthlikur aviri, kamnyar ba saka madi hirkurərni aɗi ana palidzi wa.

¹⁰Usar gir mdə na kurəmta maɗashili na yarakəmar mjir Masar ni, kamnyar ba saka madi hirkurərni aɗi ana palidzi wa.

¹¹Tsa an fwaɓəla mjir Israila akwa Masar, kamnyar ba saka madi hirkurərni aɗi ana palidzi wa.

¹²Tsa ndərar tsiyari na ka duna ka kəthlər ka dunari na ola, kamnyar ba saka madi hirkurərni aɗi ana palidzi wa.

¹³Tsa an ndəkəi Manda Duwathlu ka bwa suɗa, kamnyar ba saka madi hirkurərni aɗi ana palidzi wa.

¹⁴Tsa pwar mjirni tə da ləɓəla lapiya, kamnyar ba saka madi hirkurərni aɗi ata palidzə wa,

¹⁵amma tsa shamta Kuthlir Masar kəga sojayeri arni akwa manda, kamnyar ba saka madi hirkurərni aɗi ana palidzi wa.

¹⁶Tsa an pwar mjirni akwa mtakə ni, kamnyar ba saka madi hirkurərni aɗi ana palidzi wa.

¹⁷Usar gir ni kamnyar tsa an kurəmta kuthlyayeri na ol'ola, kamnyar ba saka madi hirkurərni aɗi ana palidzi wa.

¹⁸Tsa an tsəgəi kuthlyayeri na ol'ola, kamnyar ba saka madi hirkurərni aɗi ana palidzi wa.

¹⁹Sihon na kuthlir mjir Amor, kamnyar ba saka madi hirkurərni aɗi ata palidzə wa,

²⁰ka Og na kuthlir Bashan, kamnyar ba saka madi hirkurərni aɗi ana palidzi wa.

²¹Tsa dlutsə tsəɗiyir ɗa na an kifər ɗa, kamnyar ba saka madi hirkurərni aɗi ata palidzə wa,

²²ka hamta tsəɗiyir ɗa ni aka mjirni, Israila, kamnyar ba saka madi hirkurərni aɗi ana palidzi wa.

²³Tsa an ɗangtə mburu sakatə mburu akwa bwani, kamnyar ba saka madi hirkurərni aɗi ana palidzi wa.

²⁴Tsa an msərantə mburu ta dawayeri ar mburu, kamnyar ba saka madi hirkurərni aɗi ana palidzi wa.

²⁵Tsa an hamta susəma aka kəlara su na ka mpika, kamnyar ba saka madi hirkurərni aɗi ana palidzi wa.

²⁶Usar gir Hyel na amtazi, kamnyar ba saka madi hirkurərni aɗi ana palidzi wa.