Read bura-pabir Zabura 139 Bible Online

Zabura 139 - bura-pabir bible

Zabura 139

¹Ha ar Dauda aka mdər pwar ha. MTHLAKU, ga ku wul su na akwa ɗəffi, ka nggaɓəla shanga su ata kəri.

²Ga asəndə sakatə I andzəndzi ka sakatə I athləthlata, ga asəndə dzamərna təng sakatə gə ciju.

³Ga ana ɓəla shanga mwarna ka pəpəyirna, ga ku tsəli ka shanga surhararna.

⁴Tsu akəmta I akəlar mnyi ka gari, ga ku səndə shanga su tə I akwa bara pəlari, MTHLAKU.

⁵Ga ana kalaktə ra bwakəma ka bwahili, ga ana pungkər tsiya ga ali ka ɓəlatə ra.

⁶Jili səndə su ngəni ku hara zurang ali kamta, səndə su ngəni ku təra kərathli.

⁷Ama antə I amzhi hwiyimta mambələr ngə ri? Ama antə I ata mzhi hwiyimta kəma gə ri?

⁸Ma I ləmta akwa vəi na amtazi, ga aɗi anda, ma I namtə dəkələrna akwa nca mjir duniya, ga aɗi anda!

⁹Ma I fəla ka ləmta apa ɗika təbwar raghəi, wala ma I an ra ndzəndzi təbwar ramta ciju,

¹⁰wala anda ma tsiya ga an ata pwar ra, tsi mazəma ga an ata kəsi tsi.

¹¹Ma I pəla ka kuthlu hartə ra, ka parakəu na kalaktə ra ndzi viri,

¹²wala kuthlu ni aɗi kuthlu ala gə wa, tsuwa viri ndzi tsu apa təpci ala ga, kamnyar kuthlə ndzi apa parakəu ala ga.

¹³Kamnyar ga an namtə bwayeri na akwa dzi, ga an pəpakhə ra ata kəma duku akwa kuta mama'na.

¹⁴I akwa hu nga kamnyar laku tə gə namtə ra an sur thlivəra ka surndata. Kəthlərayeri ar nga an sur ndatə ka duna, tsuwa I ku səndə ngəni ata bəbal.

¹⁵Ga akwa wul ra sakatə mda akwa nam ra akwa vəi ɗuwari, sakatə mda akwa pəpakhə ra akwa kuthlu akwa kuta mama'na.

¹⁶Ga ku wutə ra akəmata mda apəpakhə ra, ka rəbuta akwa kakaɗər nga hangkur virayeri tə I ata harari, akəmata wala pal akwa nca ɗa abaɗitə wutədzi.

¹⁷Dzamayeri ar nga an mwavər ali, Hyel ragai! Da hang ka duna ta I amzhi nggaɓəlari!

¹⁸Ma I pəla I ata jikatə ɗa, da ata təramta wuyaku. Wala ma I an mzhi jikatari ma, I aɗi ata mzhi səndə datər nggaɓəla sur ngə wa.

¹⁹Ai Hyel, I tur abbər ga ata tsi mdə na kəmanggar, ka ndəkəmta daɓwa yeru ka mjir tsi mdə ni!

²⁰Da ana pəla ndərayeri na ɗimi ɗimi ata kəra ga, ka mnya gapangapani ata kəra ga.

²¹MTHLAKU, I aɗi ana nggəlar mji na nggəlar ngə wa ya? I aɗi ana cikə mji na ana hara kər ɓəɓalkur ala gə wa ya?

²²I ku nggəlar ɗa ɗimi ɗimi, ka namtə ɗa dawayeri arna.

²³Wul ra bu, Hyel ragai, kara səndə su na akwa ɗəffi, ngkərtə ra, kara səndə suayeri tə I akwa dzama ata kər.

²⁴Wul ra, kara ncaɓəla kəlara su na ɗimi akwa ndzəndziyirna, ka gə pwar ra akwa laku na kalkalari ba saka madi!