Read bura-pabir Zabura 140 Bible Online

Zabura 140 - bura-pabir bible

Zabura 140

¹Ha ar Dauda aka mdər pwar ha. Msərantə ra, MTHLAKU, ta mji na ɗimi. Tsəlpi ra ta mji na hir mpa,

²mji na ana ɗəmhə suayeri na ɗimi ɗimi akwa ɗəffa ɗa, parang da akwa nthləi mpa.

³Kyanggyara ɗa ana səma apa kyanggyara pwapu, apa gwarər fufukər an akwa səɓəla akwa mnya ɗa.

⁴Ɓəlatə ra, MTHLAKU, ta I aləkwa tsiya mji na ɗimi, tsəlpi ra ta mji na hir mpa, mji na akwa bara ka da hilantə ra.

⁵Mjir gaya ku nggəi dərku ali, ka pugəi səwayeri apa shiwa, da pugəi ɗa ata mnya laku kamnyar ka da ngkəi ra.

⁶I pəla aka MTHLAKU, “Ga an Hyelərna.” Psi thləma gə bu, MTHLAKU, kara nggatə adduwarna!

⁷MTHLAKU, mthlaku na olta shang, ga andər mbuli ra na ka duna, ga an ɓəlatə ra akwa sakar mpa.

⁸MTHLAKU, ga aɗiya hamta aka mji na ɗimi su tə da akwa barari wa, ga aɗiya hir ka su tə da ɗəmhə ni wutə ləkwa wa.

⁹Ka ɗimikur tə mji na kalaktə ra ɗəmha ata kəri ni, jaktə ngka ata kəra ɗa sur ɗa ka hilantə ɗa.

¹⁰Ka hakthlir u'u na ghərəsu pungkərdzi ata kəra ɗa, ka mdə pu ɗa akwa kuayeri natə da amzhi səɓəla kəra wa!

¹¹Ga aɗiya zhar ka mjir mnya ɗimi wutə səl akwa tsəɗi ni wa, hara ka asar nu mji na hir mpa ka kurəmta ɗa.

¹²MTHLAKU, I ku sənda abbər ga ana dlar mjir bwani, ka thlamta shariya na ata kəskəra mjir tura.

¹³Jiri, mjir nga ata sə fwal thləma ga, ka ndzəndzi akəma ga.