Read bura-pabir Zabura 142 Bible Online

Zabura 142 - bura-pabir bible

Zabura 142

¹Ha ar Dauda kamnyar thlipə ɗəɗukur aka mda. Ha ni ata kəra su na wutə ni akwa ku laga. Adduwa. I akwa hara adduwa ka kuraku ala ga, MTHLAKU, I akwa kiɗə nga kara kətadzə ra.

²I akwa puɓəla shanga damitədzərna akəma ga, akəma ga antə I akwa pəla damitədzərna.

³Kəlara sakatə dzi abaka mta ata kəra su, gə duku andər səndə su tə kalkal kəi hara. Akwa laku tə I ana nuwa, dawayeri arna ku nggəi ali dərku.

⁴I wul ka wula abwa mazəm abbər nuhum I awutə mdər dlar ra, amma mda aɗi na damitədzi kamnyar na wa. Vəi hwi ka ɗuwardzi aɗi ali wa, mda aɗi na akwa damitədzi kamnyar na wa.

⁵I ana hara adduwa ala ga, MTHLAKU! Ga an vəi ɗuwardzərna, gə shinga antə I kəgari akwa ndzəndziyirna.

⁶Nggatə tuwarna kara dlar ra, məi wa dzi ku mti ka duna! Mbuli ra ta mji na akwa bara tsi ra ni, kamnyar da ku təra duni.

⁷Kəɓəla ra akwa pərsəna ngəni, kamnyar kəi mzhi fwal thləma ga. Antə ma sakatə mjir nga ku wutə ɓɗakkur tə gə hara ali ni, da ata sə tsaptədzi adzə ra.