Read bura-pabir Zabura 143 Bible Online

Zabura 143 - bura-pabir bible

Zabura 143

¹Ha ar Dauda. Nggatə adduwarna bu, MTHLAKU! Psi thləma ga aka tuwarna, kara amsa ali, kamnyar gə ka jirkur, tsuwa ga ana hara ɓɗakkur.

²I an buɗar nga, antə ga aɗiya hara ali shariya wa, kamnyar mda aɗi na ata ndzi kula biku akəma gə wa.

³Dawayeri arna ku həla ra ka da tsi ra, ka da dlidlirəmta ra ata di. Da ku vu ra tə I ndzi akwa kuthlu, apa mji na ku mtə waci.

⁴Antə su ngəni akwa tsi dzi, har hyali akwa nthlə ra kamnyar thlivəra.

⁵I ana ɗangtə suayeri tə gə hara waci, ka dzama ata kəra kəthlərayeri ar nga na ol'ola, ata kəra suayeri tə gə hara ka tsiya ga.

⁶I ana haptə tsi ala ga akwa adduwa, kamnyar apatə di na ul'ulari ana bara yimi, antə I akwa bara nga.

⁷Mwa taktar bu, MTHLAKU, kara shinau ali, kamnyar diya dzi akwa mta! Ga aɗiya ɗuwardzi ali wa, kamnyar ma ga ku zhar ra, I ata mta.

⁸Ɗangtə ali ɗəɗəp ɗəɗəpa ata kəra hirkurər nga na ana palidzi wa ni, kamnyar ka ga antə I ana vəkər. I akwa hara adduwa ala ga, ka gə ncanta ali laku tə kəi nuwa.

⁹Msərantə ra bu, MTHLAKU, ta dawayeri arna, kamnyar adzə nga antə I hwi sə ɗuwardzi.

¹⁰Thlipa ali kəi hara su na ata kəskəra ga, kamnyar ga an Hyelərna. Hara ali ɓɗakkur, ka gə mwantə ra akwa vəi na patərathlu.

¹¹Mbuli ra, MTHLAKU, kamnyar səliyir thləma ga, hara ali ɓɗakkur, kara kəɓəla ra akwa bwani ngəni!

¹²Apatə gə hir ra ka duna ni, kara kurəmta ali dawayeri arna, kara shamta shanga kəmanggarayeri arna, kamnyar I an buɗar nga.